Ḵẖurooj 29

imaamon kee makhsoosiyat

¹imaamon ko maqdis men meree khidmat kay liyay makhsoos karnay ka yah tareeqa hai :

ek javaan bail aur do beaib mendhay chun lena. ²behtareen maiday say teen qism kee cheezen pakaana jin men khameer na ho. pahelay, saada rotee. doosray, rotee jis men tel daala gaya ho. teesray, rotee jis par tel lagaaya gaya ho. ³yah cheezen tokree men rakh kar javaan bail aur do mendhon kay saath rabb ko pesh karna. ⁴phir haaroon aur us kay beton ko mulaaqaat kay khaimay kay darvaazay par la kar ghusal karaana. ⁵is kay baad zerjaama, chogha, baalaaposh aur seenay ka keesa lay kar haaroon ko pahenaana. baalaaposh ko us kay mahaarat say bunay huay patkay kay zareeay baandhna. ⁶us kay sar par pagdee baandh kar us par sonay kee muqaddas takhtee lagaana. ⁷haaroon kay sar par masah ka tel undel kar usay masah karna.

⁸phir us kay beton ko aagay la kar zerjaama pahenaana. ⁹un kay pagdiyaan aur kamarband baandhna. yoon too haaroon aur us kay beton ko un kay mansab par muqarrar karna. sirf vah aur un kee aulaad hamesha tak maqdis men meree khidmat kartay rahen.

¹⁰bail ko mulaaqaat kay khaimay kay saamnay laana. haaroon aur us kay betay us kay sar par apnay haath rakhen. ¹¹usay khaimay kay darvaazay kay saamnay rabb kay huzoor zabah karna. ¹²bail kay khoon men say kuchh lay kar apnee unglee say qurbaangaah kay seengon par lagaana aur baaqee khoon qurbaangaah kay paaay par undel dena. ¹³antadiyon par kee tamaam charbee, jodkalejee aur donon gurday un kee charbee samet lay kar qurbaangaah par jala dena. ¹⁴lekin bail kay gosht, khaal aur antadiyon kay gobar ko khaimaagaah kay baahar jala dena. yah gunaah kee qurbaanee hai.

¹⁵is kay baad pahelay mendhay ko lay aana. haaroon aur us kay betay apnay haath mendhay kay sar par rakhen. ¹⁶usay zabah karkay us ka khoon qurbaangaah kay chaar pahelooon par chhidakna. ¹⁷mendhay ko tukday tukday karkay us kee antadiyon aur pindaliyon ko dhona. phir unhen sar aur baaqee tukdon kay saath mila kar ¹⁸pooray mendhay ko qurbaangaah par jala dena. jalnay vaalee yah qurbaanee rabb kay liyay bhasm honay vaalee qurbaanee hai, aur us kee khushboo rabb ko pasand hai.

¹⁹ab doosray mendhay ko lay aana. haaroon aur us kay betay apnay haath mendhay kay sar par rakhen. ²⁰us ko zabah karna. us kay khoon men say kuchh lay kar haaroon aur us kay beton kay dahenay kaan kee lau par lagaana. isee tarah khoon ko un kay dahenay haath aur dahenay paaon kay angoothon par bhee lagaana. baaqee khoon qurbaangaah kay chaar pahelooon par chhidakna. ²¹jo khoon qurbaangaah par pada hai us men say kuchh lay kar aur masah kay tel kay saath mila kar haaroon aur us kay kapdon par chhidakna. isee tarah us kay beton aur un kay kapdon par bhee chhidakna. yoon vah aur us kay betay khidmat kay liyay makhsoos-o-muqaddas ho jaaengay.

²²is mendhay ka khaas maqsad yah hai ki haaroon aur us kay beton ko maqdis men khidmat karnay ka ikhtiyaar aur uhda diya jaaay. mendhay kee charbee, dum, antadiyon par kee saaree charbee, jodkalejee, donon gurday un kee charbee samet aur dahenee raan alag karnee hai. ²³us tokree men say jo rabb kay huzoor yaanee khaimay kay darvaazay par padee hai ek saada rotee, ek rotee jis men tel daala gaya ho aur ek rotee jis par tel lagaaya gaya ho nikaalna. ²⁴mendhay say alag kee gaee cheezen aur bekhameeree rotee kee tokree kee yah cheezen lay kar haaroon aur us kay beton kay haathon men dena, aur vah unhen hilaanay vaalee qurbaanee kay taur par rabb kay saamnay hilaaen. ²⁵phir yah cheezen un say vaapas lay kar bhasm honay vaalee qurbaanee kay saath qurbaangaah par jala dena. yah rabb kay liyay jalnay vaalee qurbaanee hai, aur us kee khushboo rabb ko pasand hai.

²⁶ab us mendhay ka seena lena jis kee maarifat haaroon ko imaam-ay-aazam ka ikhtiyaar diya jaata hai. seenay ko bhee hilaanay vaalee qurbaanee kay taur par rabb kay saamnay hilaana. yah seena qurbaanee ka tera hissa hoga. ²⁷yoon tujhay haaroon aur us kay beton kee makhsoosiyat kay liyay mustaamal mendhay kay tukday makhsoos-o-muqaddas karnay hain. us kay seenay ko rabb kay saamnay hilaanay vaalee qurbaanee kay taur par hilaaya jaaay aur us kee raan ko uthaanay vaalee qurbaanee kay taur par uthaaya jaaay. ²⁸haaroon aur us kee aulaad ko israaeeliyon kee taraf say hamesha tak yah milnay ka haq hai. jab bhee israaeelee rabb ko apnee salaamatee kee qurbaaniyaan pesh karen to imaamon ko yah do tukday milengay.

²⁹jab haaroon faut ho jaaega to us kay muqaddas libaas us kee aulaad men say us mard ko denay hain jisay masah karkay haaroon kee jagah muqarrar kiya jaaega. ³⁰jo beta us kee jagah muqarrar kiya jaaega aur maqdis men khidmat karnay kay liyay mulaaqaat kay khaimay men aaega vah yah libaas saat din tak pahenay rahay.

³¹jo mendha haaroon aur us kay beton kee makhsoosiyat kay liyay zabah kiya gaya hai usay muqaddas jagah par ubaalna hai. ³²phir haaroon aur us kay betay mulaaqaat kay khaimay kay darvaazay par mendhay ka gosht aur tokree kee bekhameeree rotiyaan khaaen. ³³vah yah cheezen khaaen jin say unhen gunaahon ka kaffaara aur imaam ka uhda mila hai. lekin koee aur yah na khaaay, kyoonki yah makhsoos-o-muqaddas hain. ³⁴aur agar aglee subah tak is gosht ya rotee men say kuchh bach jaaay to usay jalaaya jaaay. usay khaana mana hai, kyoonki vah muqaddas hai.

³⁵jab too haaroon aur us kay beton ko imaam muqarrar karega to ain meree hidaayat par amal karna. yah taqreeb saat din tak manaaee jaaay. ³⁶is kay dauraan gunaah kee qurbaanee kay taur par rozaana ek javaan bail zabah karna. is say too qurbaangaah ka kaffaara day kar usay har tarah kee naapaakee say paak karega. is kay ilaava us par masah ka tel undelana. is say vah meray liyay makhsoos-o-muqaddas ho jaaega. ³⁷saat din tak qurbaangaah ka kaffaara day kar usay paak-saaf karna aur usay tel say makhsoos-o-muqaddas karna. phir qurbaangaah nihaayat muqaddas hogee. jo bhee usay chhuega vah bhee makhsoos-o-muqaddas ho jaaega.

rozmarra kee qurbaaniyaan

³⁸rozaana ek ek saal kay do bhed kay nar bachchay qurbaangaah par jala dena, ³⁹ek ko subah kay vaqt, doosray ko sooraj kay ghuroob honay kay ain baad. ⁴⁰pahelay jaanvar kay saath dedh kilograam behtareen maida pesh kiya jaaay jo kootay huay zaitoonon kay ek litar tel kay saath milaaya gaya ho. mai kee nazar kay taur par ek litar mai bhee qurbaangaah par undelana. ⁴¹doosray jaanvar kay saath bhee ghalla aur mai kee yah do nazren pesh kee jaaen. aisee qurbaanee kee khushboo rabb ko pasand hai.

⁴²laazim hai ki aanay vaalee tamaam naslen bhasm honay vaalee yah qurbaanee baaqaaidagee say muqaddas khaimay kay darvaazay par rabb kay huzoor chadhaaen. vahaan main tum say mila karoonga aur tum say hamkalaam hoonga. ⁴³vahaan main israaeeliyon say bhee mila karoonga, aur vah jagah meray jalaal say makhsoos-o-muqaddas ho jaaegee. ⁴⁴yoon main mulaaqaat kay khaimay aur qurbaangaah ko makhsoos karoonga aur haaroon aur us kay beton ko makhsoos karoonga taaki vah imaamon kee haisiyat say meree khidmat karen.

⁴⁵tab main israaeeliyon kay darmiyaan rahoonga aur un ka khuda hoonga. ⁴⁶vah jaan lengay ki main rabb un ka khuda hoon, ki main unhen misr say nikaal laaya taaki un kay darmiyaan sukoonat karoon. main rabb un ka khuda hoon.