Ḵẖurooj 24
rabb israaeel say ahd baandhta hai
1rabb nay moosa say kaha, “too, haaroon, nadab, abeehoo aur israaeel kay 70 buzurg meray paas oopar aaen. kuchh faasilay par khaday ho kar mujhay sijda karo. 2sirf too akela hee meray qareeb a, doosray door rahen. aur qaum kay baaqee log teray saath pahaad par na chadhen.”
3tab moosa nay qaum kay paas ja kar rabb kee tamaam baaten aur ahkaam pesh kiay. javaab men sab nay mil kar kaha, “ham rabb kee in tamaam baaton par amal karengay.”
4tab moosa nay rabb kee tamaam baaten likh leen. aglay din vah subah-saveray utha aur pahaad kay paas gaya. us kay daaman men us nay qurbaangaah banaaee. saath hee us nay israaeel kay har ek qabeelay kay liyay ek ek patthar ka satoon khada kiya. 5phir us nay kuchh israaeelee naujvaanon ko qurbaanee pesh karnay kay liyay bulaaya taaki vah rabb kee taazeem men bhasm honay vaalee qurbaaniyaan chadhaaen aur javaan bailon ko salaamatee kee qurbaanee kay taur par pesh karen. 6moosa nay qurbaaniyon ka khoon jama kiya. us ka aadha hissa us nay baasnon men daal diya aur aadha hissa qurbaangaah par chhidak diya.
7phir us nay vah kitaab lee jis men rabb kay saath ahd kee tamaam sharaait darj theen aur usay qaum ko padh kar sunaaya. javaab men unhon nay kaha, “ham rabb kee in tamaam baaton par amal karengay. ham us kee sunengay.” 8is par moosa nay baasnon men say khoon lay kar usay logon par chhidka aur kaha, “yah khoon us ahd kee tasdeeq karta hai jo rabb nay tumhaaray saath kiya hai aur jo us kee tamaam baaton par mabnee hai.”
9is kay baad moosa, haaroon, nadab, abeehoo aur israaeel kay 70 buzurg seena pahaad par chadhay. 10vahaan unhon nay israaeel kay khuda ko dekha. lagta tha ki us kay paaon kay neechay sang-ay-laajvard ka sa takhta tha. vah aasmaan kee maanind saaf-o-shaffaaf tha. 11agarchi israaeel kay raahanumaaon nay yah sab kuchh dekha to bhee rabb nay unhen halaak na kiya, balki vah allaah ko dekhtay rahay aur us kay huzoor ahd ka khaana khaatay aur peetay rahay.
patthar kee takhtiyaan
12pahaad say utarnay kay baad rabb nay moosa say kaha, “meray paas pahaad par a kar kuchh der kay liyay thaheray rahena. main tujhay patthar kee takhtiyaan doonga jin par main nay apnee shareeat aur ahkaam likhay hain aur jo israaeel kee taaleem-o-tarbiyat kay liyay zarooree hain.”
13moosa apnay madadgaar yashooa kay saath chal pada aur allaah kay pahaad par chadh gaya. 14pahelay us nay buzurgon say kaha, “hamaaree vaapsee kay intizaar men yahaan thaheray raho. haaroon aur hoor tumhaaray paas rahengay. koee bhee muaamala ho to log un hee kay paas jaaen.”
moosa rabb say milta hai
15jab moosa chadhnay laga to pahaad par baadal chha gaya. 16rabb ka jalaal koh-ay-seena par utar aaya. chhah din tak baadal us par chhaaya raha. saatven din rabb nay baadal men say moosa ko bulaaya. 17rabb ka jalaal israaeeliyon ko bhee nazar aata tha. unhen yoon laga jaisa ki pahaad kee chotee par tez aag bhadak rahee ho. 18chadhtay chadhtay moosa baadal men daakhil hua. vahaan vah chaalees din aur chaalees raat raha.