Ḵẖurooj 23
adaalat men insaaf aur doosron say muhabbat
1ghalat afwaahen na phailaana. kisee shareer aadmee ka saath day kar jhootee gavaahee dena mana hai. 2agar aksariyat ghalat kaam kar rahee ho to us kay peechhay na ho lena. adaalat men gavaahee detay vaqt aksariyat kay saath mil kar aisee baat na karna jis say ghalat faisla kiya jaaay. 3lekin adaalat men kisee ghareeb kee tarafdaaree bhee na karna.
4agar tujhay teray dushman ka bail ya gadha aavaara phirta hua nazar aaay to usay har soorat men vaapas kar dena. 5agar tujh say nafrat karnay vaalay ka gadha bojh talay gir gaya ho aur tujhay pata lagay to usay na chhodna balki zaroor us kee madad karna.
6adaalat men ghareeb kay huqooq na maarna. 7aisay muaamalay say door rahena jis men log jhoot boltay hain. jo begunaah aur haq par hai usay saza-ay-maut na dena, kyoonki main qusoorvaar ko haq-ba-jaanib naheen thaheraaoonga. 8rishvat na lena, kyoonki rishvat dekhnay vaalay ko andha kar detee hai aur us kee baat bannay naheen detee jo haq par hai.
9jo pardesee teray mulk men mehamaan hai us par dabaao na daalna. tum aisay logon kee haalat say khoob vaaqif ho, kyoonki tum khud misr men pardesee rahay ho.
sabat ka saal aur sabat
10chhah saal tak apnee zameen men beej bo kar us kee paidaavaar jama karna. 11lekin saatven saal zameen ko istemaal na karna balki usay paday rahenay dena. jo kuchh bhee ugay vah qaum kay ghareeb log khaaen. jo un say bach jaaay usay janglee jaanvar khaaen. apnay angoor aur zaitoon kay baaghon kay saath bhee aisa hee karna hai.
12chhah din apna kaam-kaaj karna, lekin saatven din aaraam karna. phir tera bail aur tera gadha bhee aaraam kar sakengay, teree laundee ka beta aur teray saath rahenay vaala pardesee bhee taazaadam ho jaaengay.
13jo bhee hidaayat main nay dee hai us par amal kar. deegar maaboodon kee parastish na karna. main teray munh say un kay naamon tak ka zikr na sunoon.
teen khaas eeden
14saal men teen dafa meree taazeem men eed manaana. 15pahelay, bekhameeree rotee kee eed manaana. abeeb kay maheene [a] maarch ta aprail. men saat din tak teree rotee men khameer na ho jis tarah main nay hukm diya hai, kyoonki is maheenay men too misr say nikla. in dinon men koee meray huzoor khaalee haath na aaay. 16doosray, fasalakataaee kee eed us vaqt manaana jab too apnay khet men boee huee pahelee fasal kaatega. teesray, jama karnay kee eed fasal kee kataaee kay ikhtitaam [b] sitambar ta aktoobar. par manaana hai jab too nay angoor aur baaqee baaghon kay phal jama kiay hongay. 17yoon teray tamaam mard teen martaba rabb qaadir-ay-mutlaq kay huzoor haazir hua karen.
18jab too kisee jaanvar ko zabah karkay qurbaanee kay taur par pesh karay to us kay khoon kay saath aisee rotee pesh na karna jis men khameer ho. aur jo jaanvar too meree eedon par chadhaaay un kee charbee aglee subah tak baaqee na rahay.
19apnee zameen kee pahelee paidaavaar ka behtareen hissa rabb apnay khuda kay ghar men laana.
bhed ya bakree kay bachchay ko us kee maan kay doodh men na pakaana.
rabb ka farishta raahanumaaee karegaa
20main teray aagay aagay farishta bhejta hoon jo raastay men teree hifaazat karega aur tujhay us jagah tak lay jaaega jo main nay teray liyay tayyaar kee hai. 21us kee maujoodgee men ehatiyaat baratna. us kee sunna, aur us kee khilaafvarzee na karna. agar too sarkash ho jaaay to vah tujhay muaaf naheen karega, kyoonki mera naam us men haazir hoga. 22lekin agar too us kee sunay aur sab kuchh karay jo main tujhay bataata hoon to main teray dushmanon ka dushman aur teray mukhaalifon ka mukhaalif hoonga.
23kyoonki mera farishta teray aagay aagay chalega aur tujhay mulk-ay-kan’aan tak pahuncha dega jahaan amoree, hittee, farizzee, kan’aanee, hivvee aur yaboosee aabaad hain. tab main unhen roo-ay-zameen par say mita doonga. 24un kay maaboodon ko sijda na karna, na un kee khidmat karna. un kay rasm-o-rivaaj bhee na apnaana balki un kay buton ko tabaah kar dena. jin satoonon kay saamnay vah ibaadat kartay hain un ko bhee tukday tukday kar daalna. 25rabb apnay khuda kee khidmat karna. phir main teree khuraak aur paanee ko barkat day kar tamaam beemaariyaan tujh say door karoonga. 26phir teray mulk men na kisee ka bachcha zaaay hoga, na koee baanjh hogee. saath hee main tujhay taveel zindagee ata karoonga.
27main teray aagay aagay dahshat phailaaoonga. jahaan bhee too jaaega vahaan main tamaam qaumon men abtaree paida karoonga. meray sabab say teray saaray dushman palat kar bhaag jaaengay. 28main teray aagay zamboor bhej doonga jo hivvee, kan’aanee aur hittee ko mulk chhodnay par majboor karengay. 29lekin jab too vahaan pahunchega to main unhen ek hee saal men mulk say naheen nikaaloonga. varna poora mulk veeraan ho jaaega aur janglee jaanvar phail kar teray liyay nuqsaan ka baais ban jaaengay. 30is liyay main teray pahunchnay par mulk kay baashindon ko thoda thoda karkay nikaalta jaaoonga. itnay men teree taadaad badhegee aur too rafta rafta mulk par qabza kar sakega.
31main teree sarhadden muqarrar karoonga. baher-ay-qulzum ek hadd hogee aur filistiyon ka samundar doosree, junoob ka registaan ek hogee aur darya-ay-furaat doosree. main mulk kay baashindon ko teray qabzay men kar doonga, aur too unhen apnay aagay aagay mulk say door karta jaaega. 32laazim hai ki too un kay saath ya un kay maaboodon kay saath ahd na baandhay. 33un ka teray mulk men rahena mana hai, varna too un kay sabab say mera gunaah karega. agar too un kay maaboodon kee ibaadat karega to yah teray liyay phanda ban jaaega’.”