Ḵẖurooj 2
moosa kee paidaaish aur bachaao
1un dinon men laavee kay ek aadmee nay apnay hee qabeelay kee ek aurat say shaadee kee. 2aurat haamila huee aur bachcha paida hua. maan nay dekha ki ladka khoobsoorat hai, is liyay us nay usay teen maah tak chhupaaay rakha. 3jab vah usay aur ziyaada na chhupa sakee to us nay aabee narsal say tokree bana kar us par taarkol chadhaaya. phir us nay bachchay ko tokree men rakh kar tokree ko darya-ay-neel kay kinaaray par ugay huay sarkandon men rakh diya. 4bachchay kee bahen kuchh faasilay par khadee dekhtee rahee ki us ka kya banega.
5us vaqt firaaun kee betee nahaanay kay liyay darya par aaee. us kee naukraaniyaan darya kay kinaaray tahelnay lageen. tab us nay sarkandon men tokree dekhee aur apnee laundee ko usay laanay bheja. 6usay khola to chhota ladka dikhaaee diya jo ro raha tha. firaaun kee betee ko us par taras aaya. us nay kaha, “yah koee ibraanee bachcha hai.”
7ab bachchay kee bahen firaaun kee betee kay paas gaee aur poochha, “kya main bachchay ko doodh pilaanay kay liyay koee ibraanee aurat dhoond laaoon?” 8firaaun kee betee nay kaha, “haan, jaao.” ladkee chalee gaee aur bachchay kee sagee maan ko lay kar vaapas aaee. 9firaaun kee betee nay maan say kaha, “bachchay ko lay jaao aur usay meray liyay doodh pilaaya karo. main tumhen is ka muaavaza doongee.” chunaanchay bachchay kee maan nay usay doodh pilaanay kay liyay lay liya.
10jab bachcha bada hua to us kee maan usay firaaun kee betee kay paas laaee, aur vah us ka beta ban gaya. firaaun kee betee nay us ka naam moosa yaanee ‘nikaala gaya’ rakh kar kaha, “main usay paanee say nikaal laaee hoon.”
moosa faraar hota hai
11jab moosa javaan hua to ek din vah ghar say nikal kar apnay logon kay paas gaya jo jabree kaam men masroof thay. moosa nay dekha ki ek misree meray ek ibraanee bhaaee ko maar raha hai. 12moosa nay chaaron taraf nazar daudaaee. jab maaloom hua ki koee naheen dekh raha to us nay misree ko jaan say maar diya aur usay ret men chhupa diya.
13aglay din bhee moosa ghar say nikla. is dafa do ibraanee mard aapas men lad rahay thay. jo ghaltee par tha us say moosa nay poochha, “tum apnay bhaaee ko kyoon maar rahay ho?” 14aadmee nay javaab diya, “kis nay aap ko ham par hukmaraan aur qaazee muqarrar kiya hai? kya aap mujhay bhee qatl karna chaahatay hain jis tarah misree ko maar daala tha?” tab moosa dar gaya. us nay socha, “haay, mera bhed khul gaya hai!”
15baadshaah ko bhee pata laga to us nay moosa ko marvaanay kee koshish kee. lekin moosa midiyaan kay mulk ko bhaag gaya. vahaan vah ek kuen kay paas baith gaya. 16midiyaan men ek imaam tha jis kee saat betiyaan theen. yah ladkiyaan apnee bhed-bakriyon ko paanee pilaanay kay liyay kuen par aaeen aur paanee nikaal kar hauz bharnay lageen. 17lekin kuchh charvaahon nay a kar unhen bhaga diya. yah dekh kar moosa utha aur ladkiyon ko charvaahon say bacha kar un kay revad ko paanee pilaaya.
18jab ladkiyaan apnay baap raooel kay paas vaapas aaeen to baap nay poochha, “aaj tum itnee jaldee say kyoon vaapas a gaee ho?” 19ladkiyon nay javaab diya, “ek misree aadmee nay hamen charvaahon say bachaaya. na sirf yah balki us nay hamaaray liyay paanee bhee nikaal kar revad ko pila diya.” 20raooel nay kaha, “vah aadmee kahaan hai? tum usay kyoon chhod kar aaee ho? usay bulaao taaki vah hamaaray saath khaana khaaay.”
21moosa raooel kay ghar men thahernay kay liyay raazee ho gaya. baad men us kee shaadee raooel kee betee saffoora say huee. 22saffoora kay beta paida hua to moosa nay kaha, “is ka naam jairsom yaanee ‘ajnabee mulk men pardesee’ ho, kyoonki main ajnabee mulk men pardesee hoon.”
23kaafee arsa guzar gaya. itnay men misr ka baadshaah intiqaal kar gaya. israaeelee apnee ghulaamee talay karaahatay aur madad kay liyay pukaartay rahay, aur un kee cheekhen allaah tak pahunch gaeen. 24allaah nay un kee aahen suneen aur us ahd ko yaad kiya jo us nay ibraaheem, ishaaq aur yaaqoob say baandha tha. 25allaah israaeeliyon kee haalat dekh kar un ka khayaal karnay laga.