Ḵẖurooj 17
chataan say paanee
1phir israaeel kee pooree jamaaat seen kay registaan say niklee. rabb jis tarah hukm deta raha vah ek jagah say doosree jagah safar kartay rahay. rafeedeem men unhon nay khaimay lagaaay. vahaan peenay kay liyay paanee na mila. 2is liyay vah moosa kay saath yah kah kar jhagadnay lagay, “hamen peenay kay liyay paanee do.” moosa nay javaab diya, “tum mujh say kyoon jhagad rahay ho? rabb ko kyoon aazma rahay ho?” 3lekin log bahut piyaasay thay. vah moosa kay khilaaf budbudaanay say baaz na aaay balki kaha, “aap hamen misr say kyoon laaay hain? kya is liyay ki ham apnay bachchon aur revdon samet piyaasay mar jaaen?”
4tab moosa nay rabb kay huzoor faryaad kee, “main in logon kay saath kya karoon? haalaat zara bhee aur bigad jaaen to vah mujhay sangasaar kar dengay.” 5rabb nay moosa say kaha, “kuchh buzurg saath lay kar logon kay aagay aagay chal. vah laathee bhee saath lay ja jis say too nay darya-ay-neel ko maara tha. 6main horib yaanee seena pahaad kee ek chataan par teray saamnay khada hoonga. laathee say chataan ko maarna to us say paanee niklega aur log pee sakengay.”
moosa nay israaeel kay buzurgon kay saamnay aisa hee kiya. 7us nay us jagah ka naam massa aur mareeba yaanee ‘aazmaana aur jhagadna’ rakha, kyoonki vahaan israaeelee budabudaaay aur yah poochh kar rabb ko aazmaaya ki kya rabb hamaaray darmiyaan hai ki naheen?
amaaleeqiyon kee shikast
8rafeedeem vah jagah bhee thee jahaan amaaleeqee israaeeliyon say ladnay aaay. 9moosa nay yashooa say kaha, “ladnay kay qaabil aadmiyon ko chun lo aur nikal kar amaaleeqiyon ka muqaabla karo. kal main allaah kee laathee pakday huay pahaad kee chotee par khada ho jaaoonga.”
10yashooa moosa kee hidaayat kay mutaabiq amaaleeqiyon say ladnay gaya jabki moosa, haaroon aur hoor pahaad kee chotee par chadh gaay. 11aur yoon hua ki jab moosa kay haath uthaaay huay thay to israaeelee jeettay rahay, aur jab vah neechay thay to amaaleeqee jeettay rahay. 12kuchh der kay baad moosa kay baazoo thak gaay. is liyay haaroon aur hoor ek chataan lay aaay taaki vah us par baith jaaay. phir unhon nay us kay daaeen aur baaeen taraf khaday ho kar us kay baazooon ko oopar uthaaay rakha. sooraj kay ghuroob honay tak unhon nay yoon moosa kee madad kee. 13is tarah yashooa nay amaaleeqiyon say ladtay ladtay unhen shikast dee.
14tab rabb nay moosa say kaha, “yah vaaqia yaadgaaree kay liyay kitaab men likh lay. laazim hai ki yah sab kuchh yashooa kee yaad men rahay, kyoonki main duniya say amaaleeqiyon ka naam-o-nishaan mita doonga.” 15us vaqt moosa nay qurbaangaah bana kar us ka naam ‘rabb mera jhanda hai’ rakha. 16us nay kaha, “rabb kay takht kay khilaaf haath uthaaya gaya hai, is liyay rabb kee amaaleeqiyon say hamesha tak jang rahegee.”