Ḵẖurooj 16

mann aur bateren

¹is kay baad israaeel kee pooree jamaaat eleem say safar karkay seen kay registaan men pahunchee jo eleem aur seena kay darmiyaan hai. vah misr say nikalnay kay baad doosray maheenay kay 15ven din pahunchay. ²registaan men tamaam log phir moosa aur haaroon kay khilaaf budbudaanay lagay. ³unhon nay kaha, “kaash rabb hamen misr men hee maar daalta! vahaan ham kam az kam jee bhar kar gosht aur rotee to kha saktay thay. aap hamen sirf is liyay registaan men lay aaay hain ki ham sab bhookon mar jaaen.”

⁴tab rabb nay moosa say kaha, “main aasmaan say tumhaaray liyay rotee barasaaoonga. har roz log baahar ja kar usee din kee zaroorat kay mutaabiq khaana jama karen. is say main unhen aazma kar dekhoonga ki aaya vah meree suntay hain ki naheen. ⁵har roz vah sirf utna khaana jama karen jitna ki ek din kay liyay kaafee ho. lekin chhatay din jab vah khaana tayyaar karengay to vah aglay din kay liyay bhee kaafee hoga.”

⁶moosa aur haaroon nay israaeeliyon say kaha, “aaj shaam ko tum jaan logay ki rabb hee tumhen misr say nikaal laaya hai. ⁷aur kal subah tum rabb ka jalaal dekhogay. us nay tumhaaree shikaayaten sun lee hain, kyoonki asal men tum hamaaray khilaaf naheen balki rabb kay khilaaf budbuda rahay ho. ⁸phir bhee rabb tum ko shaam kay vaqt gosht aur subah kay vaqt vaafir rotee dega, kyoonki us nay tumhaaree shikaayaten sun lee hain. tumhaaree shikaayaten hamaaray khilaaf naheen balki rabb kay khilaaf hain.”

⁹moosa nay haaroon say kaha, “israaeeliyon ko bataana, ‘rabb kay saamnay haazir ho jaao, kyoonki us nay tumhaaree shikaayaten sun lee hain’.” ¹⁰jab haaroon pooree jamaaat kay saamnay baat karnay laga to logon nay palat kar registaan kee taraf dekha. vahaan rabb ka jalaal baadal men zaahir hua. ¹¹rabb nay moosa say kaha, ¹²“main nay israaeeliyon kee shikaayat sun lee hai. unhen bata, ‘aaj jab sooraj ghuroob honay lagega to tum gosht khaaogay aur kal subah pet bhar kar rotee. phir tum jaan logay ki main rabb tumhaara khuda hoon’.”

¹³usee shaam bateron kay ghol aaay jo pooree khaimaagaah par chha gaay. aur aglee subah khaimay kay chaaron taraf os padee thee. ¹⁴jab os sookh gaee to barf kay gaalon jaisay patlay daanay paalay kee tarah zameen par paday thay. ¹⁵jab israaeeliyon nay usay dekha to ek doosray say poochhnay lagay, “man hoo?” yaanee “yah kya hai?” kyoonki vah naheen jaantay thay ki yah kya cheez hai. moosa nay un ko samjhaaya, “yah vah rotee hai jo rabb nay tumhen khaanay kay liyay dee hai. ¹⁶rabb ka hukm hai ki har ek utna jama karay jitna us kay khaandaan ko zaroorat ho. apnay khaandaan kay har fard kay liyay do litar jama karo.”

¹⁷israaeeliyon nay aisa hee kiya. baaz nay ziyaada aur baaz nay kam jama kiya. ¹⁸lekin jab usay naapa gaya to har ek aadmee kay liyay kaafee tha. jis nay ziyaada jama kiya tha us kay paas kuchh na bacha. lekin jis nay kam jama kiya tha us kay paas bhee kaafee tha. ¹⁹moosa nay hukm diya, “aglay din kay liyay khaana na bachaana.”

²⁰lekin logon nay moosa kee baat na maanee balki baaz nay khaana bacha liya. lekin aglee subah maaloom hua ki bachay huay khaanay men keeday pad gaay hain aur us say bahut badboo a rahee hai. yah sun kar moosa un say naaraaz hua.

²¹har subah har koee utna jama kar leta jitnee usay zaroorat hotee thee. jab dhoop tez hotee to jo kuchh zameen par rah jaata vah pighal kar khatm ho jaata tha.

²²chhatay din jab log yah khuraak jama kartay to vah miqdaar men dugnee hotee thee yaanee har fard kay liyay chaar litar. jab jamaaat kay buzurgon nay moosa kay paas a kar usay ittila dee ²³to us nay un say kaha, “rabb ka farmaan hai ki kal aaraam ka din hai, muqaddas sabat ka din jo allaah kee taazeem men manaana hai. aaj tum jo tanoor men pakaana chaahatay ho paka lo aur jo ubaalna chaahatay ho ubaal lo. jo bach jaaay usay kal kay liyay mahfooz rakho.”

²⁴logon nay moosa kay hukm kay mutaabiq aglay din kay liyay khaana mahfooz kar liya to na khaanay say badboo aaee, na us men keeday paday. ²⁵moosa nay kaha, “aaj yahee bacha hua khaana khaao, kyoonki aaj sabat ka din hai, rabb kee taazeem men aaraam ka din. aaj tumhen registaan men kuchh naheen milega. ²⁶chhah din yah khuraak jama karna hai, lekin saatvaan din aaraam ka din hai. us din zameen par khaanay kay liyay kuchh naheen hoga.”

²⁷to bhee kuchh log haftay ko khaana jama karnay kay liyay niklay, lekin unhen kuchh na mila. ²⁸tab rabb nay moosa say kaha, “tum log kab tak meray ahkaam aur hidaayaat par amal karnay say inkaar karogay? ²⁹dekho, rabb nay tumhaaray liyay muqarrar kiya hai ki sabat ka din aaraam ka din hai. is liyay vah tumhen jumaay ko do din kay liyay khuraak deta hai. haftay ko sab ko apnay khaimon men rahena hai. koee bhee apnay ghar say baahar na niklay.”

³⁰chunaanchay log sabat kay din aaraam kartay thay.

³¹israaeeliyon nay is khuraak ka naam ‘mann’ rakha. us kay daanay dhaniay kee maanind safed thay, aur us ka zaaiqa shahed say banay kek kee maanind tha.

³²moosa nay kaha, “rabb farmaata hai, ‘do litar mann ek martabaan men rakh kar usay aanay vaalee naslon kay liyay mahfooz rakhna. phir vah dekh sakengay ki main tumhen kya khaana khilaata raha jab tumhen misr say nikaal laaya’.” ³³moosa nay haaroon say kaha, “ek martabaan lo aur usay do litar mann say bhar kar rabb kay saamnay rakho taaki vah aanay vaalee naslon kay liyay mahfooz rahay.” ³⁴haaroon nay aisa hee kiya. us nay mann kay is martabaan ko ahd kay sandooq kay saamnay rakha taaki vah mahfooz rahay.

³⁵israaeeliyon ko 40 saal tak mann milta raha. vah us vaqt tak mann khaatay rahay jab tak registaan say nikal kar kan’aan kee sarhadd par na pahunchay. ³⁶(jo paimaana israaeelee mann kay liyay istemaal kartay thay vah do litar ka ek bartan tha jis ka naam omar tha.