Ḵẖurooj 15

moosa ka geet

¹tab moosa aur israaeeliyon nay rabb kay liyay yah geet gaaya,

“main rabb kee tamjeed men geet gaaoonga, kyoonki vah nihaayat azeem hai. ghoday aur us kay savaar ko us nay samundar men patakh diya hai.

²rabb meree quvvat aur mera geet hai, vah meree najaat ban gaya hai. vahee mera khuda hai, aur main us kee taareef karoonga. vahee meray baap ka khuda hai, aur main us kee taazeem karoonga.

³rabb soorma hai, rabb us ka naam hai.

⁴firaaun kay rathon aur fauj ko us nay samundar men patakh diya to baadshaah kay behtareen afsaraan baher-ay-qulzum men doob gaay.

⁵gaheray paanee nay unhen dhaank liya, aur vah patthar kee tarah samundar kee tah tak utar gaay.

⁶ai rabb, teray dahenay haath ka jalaal badee qudrat say zaahir hota hai. ai rabb, tera dahena haath dushman ko chikna-choor kar deta hai.

⁷jo teray khilaaf uth khaday hotay hain unhen too apnee azmat ka izhaar karkay zameen par patakh deta hai. tera ghazab un par aan padta hai to vah aag men bhoosay kee tarah jal jaatay hain.

⁸too nay ghussay men a kar phoonk maaree to paanee dher kee soorat men jama ho gaya. baheta paanee thos deevaar ban gaya, samundar gaheraaee tak jam gaya.

⁹dushman nay deeng maar kar kaha, ‘main un ka peechha karkay unhen pakad loonga, main un ka loota hua maal taqseem karoonga. meree laalchee jaan un say ser ho jaaegee, main apnee talvaar khainch kar unhen halaak karoonga.’

¹⁰lekin too nay un par phoonk maaree to samundar nay unhen dhaank liya, aur vah seesay kee tarah zordaar maujon men doob gaay.

¹¹ai rabb, kaun sa maabood teree maanind hai? kaun teree tarah jalaalee aur quddoos hai? kaun teree tarah hairat’angez kaam karta aur azeem mojizay dikhaata hai? koee bhee naheen.

¹²too nay apna dahena haath uthaaya to zameen hamaaray dushmanon ko nigal gaee.

¹³apnee shafqat say too nay ivzaana day kar apnee qaum ko chhutkaara diya aur us kee raahanumaaee kee hai, apnee qudrat say too nay usay apnee muqaddas sukoonatgaah tak pahunchaaya hai.

¹⁴yah sun kar deegar qaumen kaamp uthen, filistee dar kay maaray pech-o-taab khaanay lagay.

¹⁵adom kay raees sahem gaay, moaab kay raahanuma par kapkapee taaree ho gaee, aur kan’aan kay tamaam baashinday himmat haar gaay.

¹⁶dahshat aur khauf un par chha gaya. teree azeem qudrat kay baais vah patthar kee tarah jam gaay. ai rabb, vah na hilay jab tak teree qaum guzar na gaee. vah behiss-o-harkat rahay jab tak teree khareedee huee qaum guzar na gaee.

¹⁷ai rabb, too apnay logon ko lay kar paudon kee tarah apnay mauroosee pahaad par lagaaega, us jagah par jo too nay apnee sukoonat kay liyay chun lee hai, jahaan too nay apnay haathon say apna maqdis tayyaar kiya hai.

¹⁸rabb abad tak baadshaah hai!”

¹⁹jab firaaun kay ghoday, rath aur ghudsavaar samundar men chalay gaay to rabb nay unhen samundar kay paanee say dhaank liya. lekin israaeelee khushk zameen par samundar men say guzar gaay. ²⁰tab haaroon kee bahen mariyam jo nabiya thee nay daf liya, aur baaqee tamaam aurten bhee daf lay kar us kay peechhay ho leen. sab gaanay aur naachnay lageen. mariyam nay yah ga kar un kee raahanumaaee kee,

²¹“rabb kee tamjeed men geet gaao, kyoonki vah nihaayat azeem hai. ghoday aur us kay savaar ko us nay samundar men patakh diya hai.”

maara aur eleem kay chashme

²²moosa kay kahenay par israaeelee baher-ay-qulzum say ravaana ho kar dasht-ay-shoor men chalay gaay. vahaan vah teen din tak safar kartay rahay. is dauraan unhen paanee na mila. ²³aakhirkaar vah maara pahunchay jahaan paanee dastayaab tha. lekin vah kadva tha, is liyay maqaam ka naam maara yaanee kadavaahat pad gaya. ²⁴yah dekh kar log moosa kay khilaaf budbuda kar kahenay lagay, “ham kya pien?” ²⁵moosa nay madad kay liyay rabb say iltija kee to us nay usay lakdee ka ek tukda dikhaaya. jab moosa nay yah lakdee paanee men daalee to paanee kee kadavaahat khatm ho gaee.

maara men rabb nay apnee qaum ko qavaaneen diay. vahaan us nay unhen aazmaaya bhee. ²⁶us nay kaha, “ghaur say rabb apnay khuda kee aavaaz suno! jo kuchh us kee nazar men durust hai vahee karo. us kay ahkaam par dhyaan do aur us kee tamaam hidaayaat par amal karo. phir main tum par vah beemaariyaan naheen laaoonga jo misriyon par laaya tha, kyoonki main rabb hoon jo tujhay shifa deta hoon.” ²⁷phir israaeelee ravaana ho kar eleem pahunchay jahaan 12 chashmay aur khajoor kay 70 darakht thay. vahaan unhon nay paanee kay qareeb apnay khaimay lagaaay.