Ifisiyon 6
bachchon aur vaalidain ka taalluq
1bachcho, khudaavand men apnay maan-baap kay taabay rahen, kyoonki yahee raastbaazee ka taqaaza hai. 2kalaam-ay-muqaddas men likha hai, “apnay baap aur apnee maan kee izzat karna.” yah pahela hukm hai jis kay saath ek vaada bhee kiya gaya hai, 3“phir too khushhaal aur zameen par der tak jeeta rahega.”
4ai vaalido, apnay bachchon say aisa sulook mat karen ki vah ghussay ho jaaen balki unhen khudaavand kee taraf say tarbiyat aur hidaayat day kar paalen.
ghulaam aur maalik
5ghulaamo, dartay aur kaamptay huay apnay insaanee maalikon kay taabay rahen. khuloosdilee say un kee khidmat yoon karen jaisay maseeh kee. 6na sirf un kay saamnay hee aur unhen khush rakhnay kay liyay khidmat karen balki maseeh kay ghulaamon kee haisiyat say jo pooree lagan say allaah kee marzee pooree karna chaahatay hain. 7khushee say khidmat karen, is tarah jaisa ki aap na sirf insaanon kee balki khudaavand kee khidmat kar rahay hon. 8aap to jaantay hain ki jo bhee achchha kaam ham nay kiya us ka ajr khudaavand dega, khwaah ham ghulaam hon ya aazaad. 9aur maaliko, aap bhee apnay ghulaamon say aisa hee sulook karen. unhen dhamkiyaan na den. aap ko to maaloom hai ki aasmaan par aap ka bhee maalik hai aur ki vah jaanibdaar naheen hota.
ruhaanee ziraabaktar
10ek aakhiree baat, khudaavand aur us kee zabardast quvvat men taaqatvar ban jaaen. 11allaah ka poora ziraabaktar pahen len taaki iblees kee chaalon ka saamna kar saken. 12kyoonki hamaaree jang insaan kay saath naheen hai balki hukmaraanon aur ikhtiyaar vaalon kay saath, is taareek duniya kay haakimon kay saath aur aasmaanee duniya kee shaitaanee kuvvaton kay saath hai. 13chunaanchay allaah ka poora ziraabaktar pahen len taaki aap museebat kay din iblees kay hamlon ka saamna kar saken balki sab kuchh sar’anjaam denay kay baad qaaim rah saken.
14ab yoon khaday ho jaaen ki aap kee kamar men sachchaaee ka patka bandha hua ho, aap kay seenay par raastbaazee ka seenaaband laga ho 15aur aap kay paaon men aisay jootay hon jo sulah-salaamatee kee khushkhabaree sunaanay kay liyay tayyaar rahen. 16is kay ilaava eemaan kee dhaal bhee uthaaay rakhen, kyoonki is say aap iblees kay jaltay huay teer bujha saktay hain. 17apnay sar par najaat ka khod pahen kar haath men rooh kee talvaar jo allaah ka kalaam hai thaamay rakhen. 18aur har mauqay par rooh men har tarah kee dua aur minnat kartay rahen. jaagtay aur saabitqadmee say tamaam muqaddaseen kay liyay dua kartay rahen. 19meray liyay bhee dua karen ki jab bhee main apna munh kholoon allaah mujhay aisay alfaaz ata karay ki pooree dileree say us kee khushkhabaree ka raaz suna sakoon. 20kyoonki main isee paighaam kee khaatir qaidee, haan zanjeeron men jakda hua maseeh ka elchee hoon. dua karen ki main maseeh men utnee dileree say yah paighaam sunaaoon jitna mujhay karna chaahiay.
aakhiree salaam
21aap meray haal aur kaam kay baaray men bhee jaanna chaahengay. khudaavand men hamaara azeez bhaaee aur vafaadaar khaadim tukhikus aap ko yah sab kuchh bata dega. 22main nay usay isee liyay aap kay paas bhej diya ki aap ko hamaaray haal ka pata chalay aur aap ko tasallee milay.
23khuda baap aur khudaavand eesa maseeh aap bhaaiyon ko salaamatee aur eemaan kay saath muhabbat ata karen. 24allaah ka fazl un sab kay saath ho jo anmit muhabbat kay saath hamaaray khudaavand eesa maseeh ko piyaar kartay hain.