Ifisiyon 5
raushnee men zindagee guzaarnaa
1choonki aap allaah kay piyaaray bachchay hain is liyay us kay namoonay par chalen. 2muhabbat kee rooh men zindagee yoon guzaaren jaisay maseeh nay guzaaree. kyoonki us nay ham say muhabbat rakh kar apnay aap ko hamaaray liyay allaah kay huzoor qurbaan kar diya aur yoon aisee qurbaanee ban gaya jis kee khushboo allaah ko pasand aaee.
3aap kay darmiyaan zinaakaaree, har tarah kee naapaakee ya laalach ka zikr tak na ho, kyoonki yah allaah kay muqaddaseen kay liyay munaasib naheen hai. 4isee tarah sharmanaak, ahemaqaana ya gandee baaten bhee theek naheen. in kee jagah shukrguzaaree honee chaahiay. 5kyoonki yaqeen jaanen ki zinaakaar, naapaak ya laalchee maseeh aur allaah kee baadshaahee men meeraas naheen paaengay (laalach to ek qism kee butparastee hai).
6koee aap ko bemaanee alfaaz say dhoka na day. aisee hee baaton kee vajah say allaah ka ghazab un par jo naaframaan hain naazil hota hai. 7chunaanchay un men shareek na ho jaaen jo yah kartay hain. 8kyoonki pahelay aap taareekee thay, lekin ab aap khudaavand men raushnee hain. raushnee kay farzand kee tarah zindagee guzaaren, 9kyoonki raushnee ka phal har tarah kee bhalaaee, raastbaazee aur sachchaaee hai. 10aur maaloom kartay rahen ki khudaavand ko kya kuchh pasand hai. 11taareekee kay bephal kaamon men hissa na len balki unhen raushnee men laaen. 12kyoonki jo kuchh yah log posheedgee men kartay hain us ka zikr karna bhee sharm kee baat hai. 13lekin sab kuchh beniqaab ho jaata hai jab usay raushnee men laaya jaata hai. 14kyoonki jo raushnee men laaya jaata hai vah raushan ho jaata hai. is liyay kaha jaata hai,
“ai sonay vaalay, jaag uth!
murdon men say jee uth,
to maseeh tujh par chamkega.”
15chunaanchay badee ehatiyaat say is par dhyaan den ki aap zindagee kis tarah guzaartay hain - besamajh ya samajhdaar logon kee tarah. 16har mauqay say poora faaida uthaaen, kyoonki din buray hain. 17is liyay ahemaq na banen balki khudaavand kee marzee ko samjhen.
18sharaab men matwaalay na ho jaaen, kyoonki is ka anjaam ayyaashee hai. is kay bajaay rooh-ul-quds say maamoor hotay jaaen. 19zabooron, hamd-o-sana aur ruhaanee geeton say ek doosray kee hausalaaafzaaee karen. apnay dilon men khudaavand kay liyay geet gaaen aur naghamaasaraaee karen. 20haan, har vaqt hamaaray khudaavand eesa maseeh kay naam men har cheez kay liyay shukr karen.
miyaan-beevee ka taalluq
21maseeh kay khauf men ek doosray kay taabay rahen. 22beeviyo, jis tarah aap khudaavand kay taabay hain usee tarah apnay shauhar kay taabay bhee rahen. 23kyoonki shauhar vaisay hee apnee beevee ka sar hai jaisay maseeh apnee jamaaat ka. haan, jamaaat maseeh ka badan hai jisay us nay najaat dee hai. 24ab jis tarah jamaaat maseeh kay taabay hai usee tarah beeviyaan bhee apnay shauharon kay taabay rahen.
25shauharo, apnee beeviyon say muhabbat rakhen, bilkul usee tarah jis tarah maseeh nay apnee jamaaat say muhabbat rakh kar apnay aap ko us kay liyay qurbaan kiyaa 26taaki usay allaah kay liyay makhsoos-o-muqaddas karay. us nay usay kalaam-ay-paak say dho kar paak-saaf kar diyaa 27taaki apnay aap ko ek aisee jamaaat pesh karay jo jalaalee, muqaddas aur beilzaam ho, jis men na koee daagh ho, na koee jhurree, na kisee aur qism ka nuqs. 28shauharon ka farz hai ki vah apnee beeviyon say aisee hee muhabbat rakhen. haan, vah un say vaisee muhabbat rakhen jaisee apnay jism say rakhtay hain. kyoonki jo apnee beevee say muhabbat rakhta hai vah apnay aap say hee muhabbat rakhta hai. 29aakhir koee bhee apnay jism say nafrat naheen karta balki usay khuraak muhayya karta aur paalta hai. maseeh bhee apnee jamaaat kay liyay yahee kuchh karta hai. 30kyoonki ham us kay badan kay aaza hain. 31kalaam-ay-muqaddas men bhee likha hai, “is liyay mard apnay maan-baap ko chhod kar apnee beevee kay saath paivast ho jaata hai. vah donon ek ho jaatay hain.” 32yah raaz bahut gahera hai. main to us ka itlaaq maseeh aur us kee jamaaat par karta hoon. 33lekin is ka itlaaq aap par bhee hai. har shauhar apnee beevee say is tarah muhabbat rakhay jis tarah vah apnay aap say rakhta hai. aur har beevee apnay shauhar kee izzat karay.