Ifisiyon 4

badan kee yagaangat

¹chunaanchay main jo khudaavand men qaidee hoon aap ko taakeed karta hoon ki us zindagee kay mutaabiq chalen jis kay liyay khuda nay aap ko bulaaya hai. ²har vaqt haleem aur narmdil rahen, sabr say kaam len aur ek doosray say muhabbat rakh kar usay bardaasht karen. ³sulah-salaamatee kay bandhan men rah kar rooh kee yagaangat qaaim rakhnay kee pooree koshish karen. ⁴ek hee badan aur ek hee rooh hai. yoon aap ko bhee ek hee ummeed kay liyay bulaaya gaya. ⁵ek khudaavand, ek eemaan, ek baptisma hai. ⁶ek khuda hai, jo sab ka vaahid baap hai. vah sab ka maalik hai, sab kay zareeay kaam karta hai aur sab men maujood hai.

⁷ab ham sab ko allaah ka fazl bakhsha gaya. lekin maseeh har ek ko mukhtalif paimaanay say yah fazl ata karta hai. ⁸is liyay kalaam-ay-muqaddas farmaata hai, “us nay bulandee par chadh kar qaidiyon ka hujoom giriftaar kar liya aur aadmiyon ko tuhfay diay.” ⁹ab ghaur karen ki chadhnay ka zikr kiya gaya hai. is ka matlab hai ki pahelay vah zameen kee gaheraaiyon men utra. ¹⁰jo utra vah vahee hai jo tamaam aasmaanon say ooncha chadh gaya taaki tamaam kaainaat ko apnay aap say maamoor karay. ¹¹usee nay apnee jamaaat ko tarah tarah kay khaadimon say navaaza. baaz rasool, baaz nabee, baaz mubashshir, baaz charvaahay aur baaz ustaad hain. ¹²in ka maqsad yah hai ki muqaddaseen ko khidmat karnay kay liyay tayyaar kiya jaaay aur yoon maseeh kay badan kee taameer-o-taraqqee ho jaaay. ¹³is tareeqay say ham sab eemaan aur allaah kay farzand kee pahechaan men ek ho kar baaligh ho jaaengay, aur ham mil kar maseeh kee maamooree aur balooghat ko mun’akis karengay. ¹⁴phir ham bachchay naheen rahengay, aur taaleem kay har ek jhonkay say uchhaltay phirtay naheen rahengay jab log apnee chaalaakee aur dhokebaazee say hamen apnay jaalon men phansaanay kee koshish karengay. ¹⁵is kay bajaay ham muhabbat kee rooh men sachchee baat karkay har lihaaz say maseeh kee taraf badhtay jaaengay jo hamaara sar hai. ¹⁶vahee nason kay zareeay pooray badan kay mukhtalif hisson ko ek doosray kay saath jod kar muttahid kar deta hai. har hissa apnee taaqat kay muvaafiq kaam karta hai, aur yoon poora badan muhabbat kee rooh men badhta aur apnee taameer karta raheta hai.

maseeh men naee zindagee

¹⁷pas main khudaavand kay naam men aap ko aagaah karta hoon ki ab say ghaireemaandaaron kee tarah zindagee na guzaaren jin kee soch bekaar hai ¹⁸aur jin kee samajh andheray kee girift men hai. un ka us zindagee men koee hissa naheen jo allaah deta hai, kyoonki vah jaahil hain aur un kay dil sakht ho gaay hain. ¹⁹behiss ho kar unhon nay apnay aap ko ayyaashee kay havaalay kar diya. yoon vah na bujhnay vaalee piyaas kay saath har qism kee naapaak harkaten kartay hain.

²⁰lekin aap nay maseeh ko yoon naheen jaana. ²¹aap nay to us kay baaray men sun liya hai, aur us men ho kar aap ko vah sachchaaee sikhaaee gaee jo eesa men hai. ²²chunaanchay apnay puraanay insaan ko us kay puraanay chaal-chalan samet utaar dena, kyoonki vah apnee dhokebaaz shahevaton say bigadta ja raha hai. ²³allaah ko aap kee soch kee tajdeed karnay den ²⁴aur naay insaan ko pahen len jo yoon banaaya gaya hai ki vah haqeeqee raastbaazee aur quddoosiyat men allaah kay mushaabeh hai.

²⁵is liyay har shakhs jhoot say baaz rah kar doosron say sachch baat karay, kyoonki ham sab ek hee badan kay aaza hain. ²⁶ghussay men aatay vaqt gunaah mat karna. aap ka ghussa sooraj kay ghuroob honay tak thanda ho jaaay, ²⁷varna aap iblees ko apnee zindagee men kaam karnay ka mauqa dengay. ²⁸chor ab say choree na karay balki khoob mehanat-mashaqqat karkay apnay haathon say achchha kaam karay. haan, vah itna kamaaay ki zarooratmandon ko bhee kuchh day sakay. ²⁹koee bhee buree baat aap kay munh say na niklay balki sirf aisee baaten jo doosron kee zarooriyaat kay mutaabiq un kee taameer karen. yoon sunnay vaalon ko barkat milegee. ³⁰allaah kay muqaddas rooh ko dukh na pahunchaana, kyoonki usee say allaah nay aap par muhar laga kar yah zamaanat day dee hai ki aap usee kay hain aur najaat kay din bach jaaengay. ³¹tamaam tarah kee talkhee, taish, ghussay, shor-sharaaba, gaalee-galoch balki har qism kay buray ravayyay say baaz aaen. ³²ek doosray par meharbaan aur rahemdil hon aur ek doosray ko yoon muaaf karen jis tarah allaah nay aap ko bhee maseeh men muaaf kar diya hai.