Ifisiyon 3
paulus kee ghairyahoodiyon men khidmat
1is vajah say main paulus jo aap ghairyahoodiyon kee khaatir maseeh eesa ka qaidee hoon allaah say dua karta hoon. 2aap nay to sun liya hai ki mujhay aap men allaah kay fazl ka intizaam chalaane [a] yaanee khushkhabaree sunaanay. kee khaas zimmaadaaree dee gaee hai. 3jis tarah main nay pahelay hee mukhtasar taur par likha hai, allaah nay khud mujh par yah raaz zaahir kar diya. 4jab aap vah padhengay jo main nay likha to aap jaan lengay ki mujhay maseeh kay raaz kay baaray men kya kya samajh aaee hai. 5guzray zamaanon men allaah nay yah baat zaahir naheen kee, lekin ab us nay isay rooh-ul-quds kay zareeay apnay muqaddas rasoolon aur nabiyon par zaahir kar diya. 6aur allaah ka raaz yah hai ki us kee khushkhabaree kay zareeay ghairyahoodee israaeel kay saath aasmaanee baadshaahee kay vaaris, ek hee badan kay aaza aur usee vaaday men shareek hain jo allaah nay maseeh eesa men kiya hai.
7main allaah kay muft fazl aur us kee qudrat kay izhaar say khushkhabaree ka khaadim ban gaya. 8agarchi main allaah kay tamaam muqaddaseen say kamtar hoon to bhee us nay mujhay yah fazl bakhsha ki main ghairyahoodiyon ko us la-mahdood daulat kee khushkhabaree sunaaoon jo maseeh men dastayaab hai. 9yahee meree zimmaadaaree ban gaee ki main sab par us raaz ka intizaam zaahir karoon jo guzray zamaanon men sab cheezon kay khaaliq khuda men posheeda raha. 10kyoonki allaah chaahata tha ki ab maseeh kee jamaaat hee aasmaanee hukmaraanon aur kuvvaton ko allaah kee vasee hikmat kay baaray men ilm pahunchaaay. 11yahee us ka azlee mansooba tha jo us nay hamaaray khudaavand maseeh eesa kay vaseelay say takmeel tak pahunchaaya. 12us men aur us par eemaan rakh kar ham pooree aazaadee aur etimaad kay saath allaah kay huzoor a saktay hain. 13is liyay meree aap say guzaarish hai ki aap meree museebaten dekh kar bedil na ho jaaen. yah main aap kee khaatir bardaasht kar raha hoon, aur yah aap kee izzat ka baais hain.
maseeh kee muhabbat
14is vajah say main baap kay huzoor apnay ghutnay tekta hoon, 15us baap kay saamnay jis say aasmaan-o-zameen ka har khaandaan naamzad hai. 16meree dua hai ki vah apnay jalaal kee daulat kay muvaafiq yah bakhshay ki aap us kay rooh kay vaseelay say baatinee taur par zabardast taqviyat paaen, 17ki maseeh eemaan kay zareeay aap kay dilon men sukoonat karay. haan, meree dua hai ki aap muhabbat men jad pakden aur is bunyaad par zindagee yoon guzaaren 18ki aap baaqee tamaam muqaddaseen kay saath yah samajhnay kay qaabil ban jaaen ki maseeh kee muhabbat kitnee chaudee, kitnee lambee, kitnee oonchee aur kitnee gaheree hai. 19khuda karay ki aap maseeh kee yah muhabbat jaan len jo har ilm say kaheen afzal hai aur yoon allaah kee pooree maamooree say bhar jaaen.
20allaah kee tamjeed ho jo apnee us qudrat kay muvaafiq jo ham men kaam kar rahee hai aisa zabardast kaam kar sakta hai jo hamaaree har soch aur dua say kaheen baahar hai. 21haan, maseeh eesa aur us kee jamaaat men allaah kee tamjeed pusht-dar-pusht aur azal say abad tak hotee rahay. aameen.