Ifisiyon 2

maut say zindagee tak

¹aap bhee apnee khataaon aur gunaahon kee vajah say ruhaanee taur par murda thay. ²kyoonki pahelay aap in men phansay huay is duniya kay taur-tareeqon kay mutaabiq zindagee guzaartay thay. aap hava kee kuvvaton kay sardaar kay taabay thay, us rooh kay jo is vaqt un men sargarm-ay-amal hai jo allaah kay naaframaan hain. ³pahelay to ham bhee sab un men zindagee guzaartay thay. ham bhee apnee puraanee fitrat kee shahevaten, marzee aur soch pooree karnay kee koshish kartay rahay. doosron kee tarah ham par bhee fitree taur par allaah ka ghazab naazil hona tha.

⁴lekin allaah ka rahem itna vasee hai aur vah itnee shiddat say ham say muhabbat rakhta hai ⁵ki agarchi ham apnay gunaahon men murda thay to bhee us nay hamen maseeh kay saath zinda kar diya. haan, aap ko allaah kay fazl hee say najaat milee hai. ⁶jab ham maseeh eesa par eemaan laaay to us nay hamen maseeh kay saath zinda karkay aasmaan par bitha diya. ⁷eesa maseeh men ham par meharbaanee karnay say allaah aanay vaalay zamaanon men apnay fazl kee la-mahdood daulat dikhaana chaahata tha. ⁸kyoonki yah us ka fazl hee hai ki aap ko eemaan laanay par najaat milee hai. yah aap kee taraf say naheen hai balki allaah kee bakhshish hai. ⁹aur yah najaat hamen apnay kisee kaam kay nateejay men naheen milee, is liyay koee apnay aap par fakhar naheen kar sakta. ¹⁰haan, ham usee kee makhlooq hain jinhen us nay maseeh men nek kaam karnay kay liyay khalaq kiya hai. aur yah kaam us nay pahelay say hamaaray liyay tayyaar kar rakhay hain, kyoonki vah chaahata hai ki ham unhen sar’anjaam detay huay zindagee guzaaren.

maseeh men ek

¹¹yah baat zahen men rakhen ki maazee men aap kya thay. yahoodee sirf apnay liyay lafz makhtoon istemaal kartay thay agarchi vah apna khatna sirf insaanee haathon say karvaatay hain. aap ko jo ghairyahoodee hain vah naamakhtoon qaraar detay thay. ¹²us vaqt aap maseeh kay baghair hee chaltay thay. aap israaeel qaum kay shaheree na ban sakay aur jo vaaday allaah nay ahdon kay zareeay apnee qaum say kiay thay vah aap kay liyay naheen thay. is duniya men aap kee koee ummeed naheen thee, aap allaah kay baghair hee zindagee guzaartay thay. ¹³lekin ab aap maseeh men hain. pahelay aap door thay, lekin ab aap ko maseeh kay khoon kay vaseelay say qareeb laaya gaya hai. ¹⁴kyoonki maseeh hamaaree sulah hai aur usee nay yahoodiyon aur ghairyahoodiyon ko mila kar ek qaum bana diya hai. apnay jism ko qurbaan karkay us nay vah deevaar gira dee jis nay unhen alag karkay ek doosray kay dushman bana rakha tha. ¹⁵us nay shareeat ko us kay ahkaam aur zavaabit samet mansookh kar diya taaki donon gurohon ko mila kar ek naya insaan khalaq karay, aisa insaan jo us men ek ho aur sulah-salaamatee kay saath zindagee guzaaray. ¹⁶apnee saleebee maut say us nay donon gurohon ko ek badan men mila kar un kee allaah kay saath sulah karaaee. haan, us nay apnay aap men yah dushmanee khatm kar dee. ¹⁷us nay a kar donon gurohon ko sulah-salaamatee kee khushkhabaree sunaaee, aap ghairyahoodiyon ko jo allaah say door thay aur aap yahoodiyon ko bhee jo us kay qareeb thay. ¹⁸ab ham donon maseeh kay zareeay ek hee rooh men baap kay huzoor a saktay hain.

¹⁹nateejay men ab aap pardesee aur ajnabee naheen rahay balki muqaddaseen kay hamvatan aur allaah kay gharaanay kay hain. ²⁰aap ko rasoolon aur nabiyon kee bunyaad par taameer kiya gaya hai jis kay konay ka bunyaadee patthar maseeh eesa khud hai. ²¹us men pooree imaarat jud jaatee aur badhtee badhtee khudaavand men allaah ka muqaddas ghar ban jaatee hai. ²²doosron kay saath saath us men aap kee bhee taameer ho rahee hai taaki aap rooh men allaah kee sukoonatgaah ban jaaen.