Ifisiyon 1

¹yah khat paulus kee taraf say hai, jo allaah kee marzee say maseeh eesa ka rasool hai.

main ifisus shaher kay muqaddaseen ko likh raha hoon, unhen jo maseeh eesa men eemaandaar hain.

²khuda hamaara baap aur khudaavand eesa maseeh aap ko fazl aur salaamatee bakhshen.

maseeh men ruhaanee barkaten

³khuda hamaaray khudaavand eesa maseeh kay baap kee hamd-o-sana ho! kyoonki maseeh men us nay hamen aasmaan par har ruhaanee barkat say navaaza hai. ⁴duniya kee takhleeq say peshtar hee us nay maseeh men hamen chun liya taaki ham muqaddas aur beaib haalat men us kay saamnay zindagee guzaaren.

yah kitnee azeem muhabbat thee! ⁵pahelay hee say us nay faisla kar liya ki vah hamen maseeh men apnay betay-betiyaan bana lega. yahee us kee marzee aur khushee thee ⁶taaki ham us kay jalaalee fazl kee tamjeed karen, us muft nemat kay liyay jo us nay hamen apnay piyaaray farzand men day dee. ⁷kyoonki us nay maseeh kay khoon say hamaara fidya day kar hamen aazaad aur hamaaray gunaahon ko muaaf kar diya hai. allaah ka yah fazl kitna vasee hai ⁸jo us nay kasrat say hamen ata kiya hai.

apnee pooree hikmat aur daanaaee ka izhaar karke ⁹allaah nay ham par apnee posheeda marzee zaahir kar dee, yaanee vah mansooba jo usay pasand tha aur jo us nay maseeh men pahelay say bana rakha tha. ¹⁰mansooba yah hai ki jab muqarrara vaqt aaega to allaah maseeh men tamaam kaainaat ko jama kar dega. us vaqt sab kuchh mil kar maseeh kay tahet ho jaaega, khwaah vah aasmaan par ho ya zameen par.

¹¹maseeh men ham aasmaanee baadshaahee kay vaaris bhee ban gaay hain. allaah nay pahelay say hamen is kay liyay muqarrar kiya, kyoonki vah sab kuchh yoon sar’anjaam deta hai ki us kee marzee ka iraada poora ho jaaay. ¹²aur vah chaahata hai ki ham us kay jalaal kee sitaaish ka baais banen, ham jinhon nay pahelay say maseeh par ummeed rakhee.

¹³aap bhee maseeh men hain, kyoonki aap sachchaaee ka kalaam aur apnee najaat kee khushkhabaree sun kar eemaan laaay. aur allaah nay aap par bhee rooh-ul-quds kee muhar laga dee jis ka vaada us nay kiya tha. ¹⁴rooh-ul-quds hamaaree meeraas ka baiaana hai. vah hamen yah zamaanat deta hai ki allaah hamaara jo us kee milkiyat hain fidya day kar hamen pooree makhlsee tak pahunchaaega. kyoonki hamaaree zindagee ka maqsad yah hai ki us kay jalaal kee sitaaish kee jaaay.

paulus kee duaa

¹⁵bhaaiyo, main khudaavand eesa par aap kay eemaan aur aap kee tamaam muqaddaseen say muhabbat kay baaray men sun kar ¹⁶aap kay liyay khuda ka shukr karnay say baaz naheen aata balki aap ko apnee duaaon men yaad karta raheta hoon. ¹⁷meree khaas dua yah hai ki hamaaray khudaavand eesa maseeh ka khuda aur jalaalee baap aap ko daanaaee aur mukaashfa kee rooh day taaki aap usay behatar taur par jaan saken. ¹⁸vah karay ki aap kay dilon kee aankhen raushan ho jaaen. kyoonki phir hee aap jaan lengay ki yah kaisee ummeed hai jis kay liyay us nay aap ko bulaaya hai, ki yah jalaalee meeraas kaisee daulat hai jo muqaddaseen ko haasil hai, ¹⁹aur ki ham eemaan rakhnay vaalon par us kee qudrat ka izhaar kitna zabardast hai. yah vahee behad qudrat hai ²⁰jis say us nay maseeh ko murdon men say zinda karkay aasmaan par apnay dahenay haath bithaaya. ²¹vahaan maseeh har hukmaraan, ikhtiyaar, quvvat, hukoomat, haan har naam say kaheen sarfaraaz hai, khwaah is duniya men ho ya aanay vaalee duniya men. ²²allaah nay sab kuchh us kay paaon kay neechay karkay usay sab ka sar bana diya. yah us nay apnee jamaaat kee khaatir kiyaa ²³jo maseeh ka badan hai aur jisay maseeh say pooree maamooree haasil hotee hai yaanee us say jo har tarah say sab kuchh maamoor kar deta hai.