Vaaiz 9
1in tamaam baaton par main nay dil say ghaur kiya. in kay muaainay kay baad main nay nateeja nikaala ki raastbaaz aur daanishmand aur jo kuchh vah karen allaah kay haath men hain. khwaah muhabbat ho khwaah nafrat, is kee bhee samajh insaan ko naheen aatee, donon kee jaden us say pahelay maazee men hain. 2sab kay naseeb men ek hee anjaam hai, raastbaaz aur bedeen kay, nek aur bad kay, paak aur naapaak kay, qurbaaniyaan pesh karnay vaalay kay aur us kay jo kuchh naheen pesh karta. achchhay shakhs aur gunaahgaar ka ek hee anjaam hai, halaf uthaanay vaalay aur is say dar kar gurez karnay vaalay kee ek hee manzil hai.
3sooraj talay har kaam kee yahee museebat hai ki har ek kay naseeb men ek hee anjaam hai. insaan ka mulaahaza kar. us ka dil buraaee say bhara raheta balki umr bhar us kay dil men behudgee rahetee hai. lekin aakhirkaar usay murdon men hee ja milna hai.
4jo ab tak zindon men shareek hai usay ummeed hai. kyoonki zinda kuttay ka haal murda sher say behatar hai. 5kam az kam jo zinda hain vah jaantay hain ki ham marengay. lekin murday kuchh naheen jaantay, unhen mazeed koee ajr naheen milna hai. un kee yaaden bhee mit jaatee hain. 6un kee muhabbat, nafrat aur ghairat sab kuchh badee der say jaatee rahee hai. ab vah kabhee bhee un kaamon men hissa naheen lengay jo sooraj tulay hotay hain.
zindagee kay mazay lay!
7chunaanchay ja kar apna khaana khushee kay saath kha, apnee mai zindaadilee say pee, kyoonki allaah kaafee der say teray kaamon say khush hai. 8teray kapday har vaqt safed [a] yaanee khushee manaanay kay kapday. hon, tera sar tel say maheroom na rahay. 9apnay jeevansaathee kay saath jo tujhay piyaara hai zindagee kay mazay leta rah. sooraj talay kee baatil zindagee kay jitnay din allaah nay tujhay bakhsh diay hain unhen isee tarah guzaar! kyoonki zindagee men aur sooraj talay teree mehanat-mashaqqat men yahee kuchh teray naseeb men hai. 10jis kaam ko bhee haath lagaaay usay pooray josh-o-khurosh say kar, kyoonki paataal men jahaan too ja raha hai na koee kaam hai, na mansooba, na ilm aur na hikmat.
duniya men hikmat kee qadar naheen kee jaatee
11main nay sooraj talay mazeed kuchh dekha. yaqeenee baat naheen ki muqaablay men sab say tez daudnay vaala jeet jaaay, ki jang men pahelavaan fatah paaay, ki daanishmand ko khuraak haasil ho, ki samajhdaar ko daulat milay ya ki aalim manzooree paaay. naheen, sab kuchh mauqay aur ittifaaq par munhasir hota hai. 12neez, koee bhee insaan naheen jaanta ki museebat ka vaqt kab us par aaega. jis tarah machhliyaan zaalim jaal men ulajh jaatee ya parinday phanday men phans jaatay hain usee tarah insaan museebat men phans jaata hai. museebat achaanak hee us par a jaatee hai.
13sooraj talay main nay hikmat kee ek aur misaal dekhee jo mujhay ahem lagee.
14kaheen koee chhota shaher tha jis men thoday say afraad bastay thay. ek din ek taaqatvar baadshaah us say ladnay aaya. us nay us ka muhaasara kiya aur is maqsad say us kay ird-gird baday baday burj khaday kiay. 15shaher men ek aadmee raheta tha jo daanishmand alabatta ghareeb tha. is shakhs nay apnee hikmat say shaher ko bacha liya. lekin baad men kisee nay bhee ghareeb ko yaad na kiya. 16yah dekh kar main bola, “hikmat taaqat say behatar hai,” lekin ghareeb kee hikmat haqeer jaanee jaatee hai. koee bhee us kee baaton par dhyaan naheen deta. 17daanishmand kee jo baaten aaraam say sunee jaaen vah ahemaqon kay darmiyaan rahenay vaalay hukmaraan kay zordaar elaanaat say kaheen behatar hain. 18hikmat jang kay hathiyaaron say behatar hai, lekin ek hee gunaahgaar bahut kuchh jo achchha hai tabaah karta hai.