Vaaiz 7
achchha kya hai?
1achchha naam khushboodaar tel say aur maut ka din paidaaish kay din say behatar hai.
2ziyaafat karnay vaalon kay ghar men jaanay kee nisbat maatam karnay vaalon kay ghar men jaana behatar hai, kyoonki har insaan ka anjaam maut hee hai. jo zinda hain vah is baat par khoob dhyaan den. 3dukh hansee say behatar hai, utra hua chihara dil kee behatree ka baais hai. 4daanishmand ka dil maatam karnay vaalon kay ghar men thaherta jabki ahemaq ka dil aish-o-ishrat karnay vaalon kay ghar men tik jaata hai.
5ahemaqon kay geet sunnay kee nisbat daanishmand kee jhidkiyon par dhyaan dena behatar hai. 6ahemaq kay qahqahay degchee talay chatakhnay vaalay kaanton kee aag kee maanind hain. yah bhee baatil hee hai.
7naarva nafa daanishmand ko ahemaq bana deta, rishvat dil ko bigaad detee hai.
8kisee muaamalay ka anjaam us kee ibtida say behatar hai, sabr karna maghroor honay say behatar hai.
9ghussa karnay men jaldee na kar, kyoonki ghussa ahemaqon kee god men hee aaraam karta hai.
10yah na poochh ki aaj kee nisbat puraana zamaana behatar kyoon tha, kyoonki yah hikmat kee baat naheen.
11agar hikmat kay ilaava meeraas men milkiyat bhee mil jaaay to yah achchhee baat hai, yah un kay liyay soodmand hai jo sooraj dekhtay hain. 12kyoonki hikmat paison kee tarah panaah detee hai, lekin hikmat ka khaas faaida yah hai ki vah apnay maalik kee jaan bachaaay rakhtee hai.
13allaah kay kaam ka mulaahaza kar. jo kuchh us nay pechdaar banaaya kaun usay suljha sakta hai?
14khushee kay din khush ho, lekin museebat kay din khayaal rakh ki allaah nay yah din bhee banaaya aur vah bhee is liyay ki insaan apnay mustaqbil kay baaray men kuchh maaloom na kar sakay.
intihaapasandon say daregh kar
15apnee abas zindagee kay dauraan main nay do baaten dekhee hain. ek taraf raastbaaz apnee raastbaazee kay baavujood tabaah ho jaata jabki doosree taraf bedeen apnee bedeenee kay baavujood umrraseeda ho jaata hai. 16na hadd say ziyaada raastbaazee dikha, na hadd say ziyaada daanishmandee. apnay aap ko tabaah karnay kee kya zaroorat hai? 17na hadd say ziyaada bedeenee, na hadd say ziyaada hamaaqat dikha. muqarrara vaqt say pahelay marnay kee kya zaroorat hai? 18achchha hai ki too yah baat thaamay rakhay aur doosree bhee na chhoday. jo allaah ka khauf maanay vah donon khatron say bach niklega.
19hikmat daanishmand ko shaher kay das hukmaraanon say ziyaada taaqatvar bana detee hai. 20duniya men koee bhee insaan itna raastbaaz naheen ki hamesha achchha kaam karay aur kabhee gunaah na karay.
21logon kee har baat par dhyaan na day, aisa na ho ki too naukar kee laanat bhee sun lay jo vah tujh par karta hai. 22kyoonki dil men too jaanta hai ki too nay khud mut’addid baar doosron par laanat bhejee hai.
kaun daanishmand hai?
23hikmat kay zareeay main nay in tamaam baaton kee jaanch-padtaal kee. main bola, “main daanishmand banna chaahata hoon,” lekin hikmat mujh say door rahee. 24jo kuchh maujood hai vah door aur nihaayat gahera hai. kaun us kee tah tak pahunch sakta hai? 25chunaanchay main rukh badal kar pooray dhyaan say is kee tahqeeq-o-tafteesh karnay laga ki hikmat aur mukhtalif baaton kay saheeh nataaij kya hain. neez, main bedeenee kee hamaaqat aur behudgee kee deevaangee maaloom karna chaahata tha.
26mujhay maaloom hua ki maut say kaheen talkh vah aurat hai jo phanda hai, jis ka dil jaal aur haath zanjeeren hain. jo aadmee allaah ko manzoor ho vah bach niklega, lekin gunaahgaar us kay jaal men ulajh jaaega.
27vaaiz farmaata hai, “yah sab kuchh mujhay maaloom hua jab main nay mukhtalif baaten ek doosray kay saath munsalik keen taaki saheeh nataaij tak pahunchoon. 28lekin jisay main dhoondta raha vah na mila. hazaar afraad men say mujhay sirf ek hee diyaanatdaar mard mila, lekin ek bhee diyaanatdaar aurat naheen [a] diyaanatdaar izaafa hai taaki aayat ka jo ghaaliban matlab hai vah saaf ho jaaay. .
29mujhay sirf itna hee maaloom hua ki go allaah nay insaanon ko diyaanatdaar banaaya, lekin vah kaee qism kee chaalaakiyaan dhoond nikaaltay hain.”