Vaaiz 6

¹mujhay sooraj talay ek aur buree baat nazar aaee jo insaan ko apnay bojh talay dabaaay rakhtee hai.

²allaah kisee aadmee ko maal-o-mata aur izzat ata karta hai. gharaz us kay paas sab kuchh hai jo us ka dil chaahay. lekin allaah usay in cheezon say lutf uthaanay naheen deta balki koee ajnabee us ka maza leta hai. yah baatil aur ek badee museebat hai. ³ho sakta hai ki kisee aadmee kay sau bachchay paida hon aur vah umrraseeda bhee ho jaaay, lekin khwaah vah kitna boodha kyoon na ho jaaay, agar apnee khushhaalee ka maza na lay sakay aur aakhirkaar saheeh rusoomaat kay saath dafnaaya na jaaay to is ka kya faaida? main kaheta hoon ki us kee nisbat maan kay pet men zaaay ho gaay bachchay ka haal behatar hai. ⁴beshak aisay bachchay ka aana bemaanee hai, aur vah andheray men hee kooch karkay chala jaata balki us ka naam tak andheray men chhupa raheta hai. ⁵lekin go us nay na kabhee sooraj dekha, na usay kabhee maaloom hua ki aisee cheez hai taaham usay mazkoora aadmee say kaheen ziyaada aaraam-o-sukoon haasil hai. ⁶aur agar vah do hazaar saal tak jeeta rahay, lekin apnee khushhaalee say lutf’andoz na ho sakay to kya faaida hai? sab ko to ek hee jagah jaana hai.

⁷insaan kee tamaam mehanat-mashaqqat ka yah maqsad hai ki pet bhar jaaay, to bhee us kee bhook kabhee naheen mittee. ⁸daanishmand ko kya haasil hai jis kay baais vah ahemaq say bartar hai? is ka kya faaida hai ki ghareeb aadmee zindon kay saath munaasib sulook karnay ka fan seekh lay? ⁹doordaraaz cheezon kay aarzoomand rahenay kee nisbat behatar yah hai ki insaan un cheezon say lutf uthaaay jo aankhon kay saamnay hee hain. yah bhee baatil aur hava ko pakadnay kay baraabar hai.

allaah ka muqaabla koee naheen kar saktaa

¹⁰jo kuchh bhee pesh aata hai us ka naam pahelay hee rakha gaya hai, jo bhee insaan vujood men aata hai vah pahelay hee maaloom tha. koee bhee insaan us ka muqaabla naheen kar sakta jo us say taaqatvar hai. ¹¹kyoonki jitnee bhee baaten insaan karay utna hee ziyaada maaloom hoga ki baatil hain. insaan kay liyay is ka kya faaida?

¹²kis ko maaloom hai ki un thoday aur bekaar dinon kay dauraan jo saay kee tarah guzar jaatay hain insaan kay liyay kya kuchh faaidaamand hai? kaun usay bata sakta hai ki us kay chalay jaanay par sooraj talay kya kuchh pesh aaegaa