Vaaiz 5

allaah ka khauf maannaa

¹allaah kay ghar men jaatay vaqt apnay qadmon ka khayaal rakh aur sunnay kay liyay tayyaar rah. yah ahemaqon kee qurbaaniyon say kaheen behatar hai, kyoonki vah jaantay hee naheen ki ghalat kaam kar rahay hain.

²bolnay men jaldbaazee na kar, tera dil allaah kay huzoor kuchh bayaan karnay men jaldee na karay. allaah aasmaan par hai jabki too zameen par hee hai. lihaaza behatar hai ki too kam baaten karay. ³kyoonki jis tarah hadd say ziyaada mehanat-mashaqqat say khwaab aanay lagtay hain usee tarah bahut baaten karnay say aadmee kee hamaaqat zaahir hotee hai.

⁴agar too allaah kay huzoor mannat maanay to usay poora karnay men der mat kar. vah ahemaqon say khush naheen hota, chunaanchay apnee mannat pooree kar. ⁵mannat na maanna mannat maan kar usay poora na karnay say behatar hai.

⁶apnay munh ko ijaazat na day ki vah tujhay gunaah men phansaaay, aur allaah kay paighambar kay saamnay na kah, “mujh say ghairiraadee ghaltee huee hai.” kya zaroorat hai ki allaah teree baat say naaraaz ho kar teree mehanat ka kaam tabaah karay?

⁷jahaan bahut khwaab dekhay jaatay hain vahaan fuzool baaten aur beshumaar alfaaz hotay hain. chunaanchay allaah ka khauf maan!

zaalimon ka zulm

⁸kya tujhay soobay men aisay log nazar aatay hain jo ghareebon par zulm kartay, un ka haq maartay aur unhen insaaf say maheroom rakhtay hain? taajjub na kar, kyoonki ek sarkaaree mulaazim doosray kee nigahbaanee karta hai, aur un par mazeed mulaazim muqarrar hotay hain. ⁹chunaanchay mulk kay liyay har lihaaz say faaida is men hai ki aisa baadshaah us par hukoomat karay jo kaashtkaaree kee fikr karta hai.

daulat khushhaalee kee zamaanat naheen day saktee

¹⁰jisay paisay piyaaray hon vah kabhee mutmain naheen hoga, khwaah us kay paas kitnay hee paisay kyoon na hon. jo zardosat ho vah kabhee aasooda naheen hoga, khwaah us kay paas kitnee hee daulat kyoon na ho. yah bhee baatil hee hai. ¹¹jitna maal men izaafa ho utna hee un kee taadaad badhtee hai jo usay kha jaatay hain. us kay maalik ko us ka kya faaida hai siva-ay-is kay ki vah usay dekh dekh kar maza lay? ¹²kaam-kaaj karnay vaalay kee neend meethee hotee hai, khwaah us nay kam ya ziyaada khaana khaaya ho, lekin ameer kee daulat usay sonay naheen detee.

¹³mujhay sooraj talay ek nihaayat buree baat nazar aaee. jo daulat kisee nay apnay liyay mahfooz rakhee vah us kay liyay nuqsaan ka baais ban gaee. ¹⁴kyoonki jab yah daulat kisee museebat kay baais tabaah ho gaee aur aadmee kay haan beta paida hua to us kay haath men kuchh naheen tha. ¹⁵maan kay pet say nikaltay vaqt vah nanga tha, aur isee tarah kooch karkay chala bhee jaaega. us kee mehanat ka koee phal naheen hoga jisay vah apnay saath lay ja sakay.

¹⁶yah bhee bahut buree baat hai ki jis tarah insaan aaya usee tarah kooch karkay chala bhee jaata hai. usay kya faaida hua hai ki us nay hava kay liyay mehanat-mashaqqat kee ho? ¹⁷jeetay jee vah har din taareekee men khaana khaatay huay guzaarta, zindagee bhar vah badee ranjeedgee, beemaaree aur ghussay men mubtala raheta hai.

¹⁸tab main nay jaan liya ki insaan kay liyay achchha aur munaasib hai ki vah jitnay din allaah nay usay diay hain khaaay piay aur sooraj talay apnee mehanat-mashaqqat kay phal ka maza lay, kyoonki yahee us kay naseeb men hai. ¹⁹kyoonki jab allaah kisee shakhs ko maal-o-mata ata karkay usay is qaabil banaaay ki us ka maza lay sakay, apna naseeb qabool kar sakay aur mehanat-mashaqqat kay saath saath khush bhee ho sakay to yah allaah kee bakhshish hai. ²⁰aisay shakhs ko zindagee kay dinon par ghaur-o-khauz karnay ka kam hee vaqt milta hai, kyoonki allaah usay dil men khushee dila kar masroof rakhta hai.