Vaaiz 4

murdon ka haal behatar hai

¹main nay ek baar phir nazar daalee to mujhay vah tamaam zulm nazar aaya jo sooraj talay hota hai. mazloomon kay aansoo bahetay hain, aur tasallee denay vaala koee naheen hota. zaalim un say ziyaadtee kartay hain, aur tasallee denay vaala koee naheen hota. ²yah dekh kar main nay murdon ko mubaarak kaha, haalaanki vah arsay say vafaat pa chukay thay. main nay kaha, “vah haal kay zinda logon say kaheen mubaarak hain. ³lekin in say ziyaada mubaarak vah hai jo ab tak vujood men naheen aaya, jis nay vah tamaam buraaiyaan naheen dekheen jo sooraj talay hotee hain.”

ghurbat men sukoon behatar hai

⁴main nay yah bhee dekha ki sab log is liyay mehanat-mashaqqat aur mahaarat say kaam kartay hain ki ek doosray say hasad kartay hain. yah bhee baatil aur hava ko pakadnay kay baraabar hai. ⁵ek taraf to ahemaq haath par haath dharay baithnay kay baais apnay aap ko tabaahee tak pahunchaata hai. ⁶lekin doosree taraf agar koee mutthee bhar rozee kama kar sukoon kay saath zindagee guzaar sakay to yah is say behatar hai ki donon mutthiyaan sirtod mehanat aur hava ko pakadnay kee koshishon kay baad hee bharen.

tanhaaee kee nisbat mil kar rahena behatar hai

⁷main nay sooraj talay mazeed kuchh dekha jo baatil hai. ⁸ek aadmee akela hee tha. na us kay beta tha, na bhaaee. vah behad mehanat-mashaqqat karta raha, lekin us kee aankhen kabhee apnee daulat say mutmain na theen. savaal yah raha, “main itnee sirtod koshish kis kay liyay kar raha hoon? main apnee jaan ko zindagee kay mazay lenay say kyoon maheroom rakh raha hoon?” yah bhee baatil aur naagvaar muaamala hai.

⁹do ek say behatar hain, kyoonki unhen apnay kaam-kaaj ka achchha ajr milega. ¹⁰agar ek gir jaaay to us ka saathee usay dubaara khada karega. lekin us par afsos jo gir jaaay aur koee saathee na ho jo usay dubaara khada karay. ¹¹neez, jab do sardiyon kay mausam men mil kar bistar par let jaaen to vah garm rahetay hain. jo tanha hai vah kis tarah garm ho jaaega? ¹²ek shakhs par qaaboo paaya ja sakta hai jabki do mil kar apna difa kar saktay hain. teen ladiyon vaalee rassee jaldee say naheen toottee.

qaum kee qabooliyat fuzool hai

¹³jo ladka ghareeb lekin daanishmand hai vah us buzurg lekin ahemaq baadshaah say kaheen behatar hai jo tambeeh maannay say inkaar karay. ¹⁴kyoonki go vah boodhay baadshaah kee hukoomat kay dauraan ghurbat men paida hua tha to bhee vah jel say nikal kar baadshaah ban gaya. ¹⁵lekin phir main nay dekha ki sooraj talay tamaam log ek aur ladkay kay peechhay ho liyay jisay pahelay kee jagah takhtnasheen hona tha. ¹⁶un tamaam logon kee intiha naheen thee jin kee qiyaadat vah karta tha. to bhee jo baad men aaengay vah us say khush naheen hongay. yah bhee baatil aur hava ko pakadnay kay baraabar hai.