Vaaiz 3

har baat ka apna vaqt hai

¹har cheez kee apnee ghadee hotee, aasmaan talay har muaamalay ka apna vaqt hota hai,

²janm lenay aur marnay ka,

pauda lagaanay aur ukhaadnay ka,

³maar denay aur shifa denay ka,

dha denay aur taameer karnay ka,

⁴ronay aur hansnay ka,

aahen bharnay aur raqs karnay ka,

⁵patthar phainknay aur patthar jama karnay ka,

galay milnay aur is say baaz rahenay ka,

⁶talaash karnay aur kho denay ka,

mahfooz rakhnay aur phainknay ka,

⁷phaadnay aur see kar jodnay ka,

khaamosh rahenay aur bolnay ka,

⁸piyaar karnay aur nafrat karnay ka,

jang ladnay aur salaamatee say zindagee guzaarnay ka,

⁹chunaanchay kya faaida hai ki kaam karnay vaala mehanat-mashaqqat karay?

¹⁰main nay vah takleefdih kaam-kaaj dekha jo allaah nay insaan kay sapurd kiya taaki vah us men uljha rahay. ¹¹us nay har cheez ko yoon banaaya hai ki vah apnay vaqt kay liyay khoobsoorat aur munaasib ho. us nay insaan kay dil men jaavidaanee bhee daalee hai, go vah shuroo say lay kar aakhir tak us kaam kee tah tak naheen pahunch sakta jo allaah nay kiya hai. ¹²main nay jaan liya ki insaan kay liyay is say behatar kuchh naheen hai ki vah khush rahay aur jeetay jee zindagee ka maza lay. ¹³kyoonki agar koee khaaay piay aur tamaam mehanat-mashaqqat kay saath saath khushhaal bhee ho to yah allaah kee bakhshish hai.

¹⁴mujhay samajh aaee ki jo kuchh allaah karay vah abad tak qaaim rahega. us men na izaafa ho sakta hai na kamee. allaah yah sab kuchh is liyay karta hai ki insaan us ka khauf maanay. ¹⁵jo haal men pesh a raha hai vah maazee men pesh a chuka hai, aur jo mustaqbil men pesh aaega vah bhee pesh a chuka hai. haan, jo kuchh guzar chuka hai usay allaah dubaara vaapas laata hai.

insaan faanee hai

¹⁶main nay sooraj talay mazeed dekha, jahaan adaalat karnee hai vahaan naainsaafee hai, jahaan insaaf karna hai vahaan bedeenee hai. ¹⁷lekin main dil men bola, “allaah raastbaaz aur bedeen donon kee adaalat karega, kyoonki har muaamalay aur kaam ka apna vaqt hota hai.”

¹⁸main nay yah bhee socha, “jahaan tak insaanon ka taalluq hai allaah un kee jaanch-padtaal karta hai taaki unhen pata chalay ki vah jaanvaron kee maanind hain. ¹⁹kyoonki insaan-o-haivaan ka ek hee anjaam hai. donon dam chhodtay, donon men ek sa dam hai, is liyay insaan ko haivaan kee nisbat ziyaada faaida haasil naheen hota. sab kuchh baatil hee hai. ²⁰sab kuchh ek hee jagah chala jaata hai, sab kuchh khaak say bana hai aur sab kuchh dubaara khaak men mil jaaega. ²¹kaun yaqeen say kah sakta hai ki insaan kee rooh oopar kee taraf jaatee aur haivaan kee rooh neechay zameen men utartee hai?”

²²gharaz main nay jaan liya ki insaan kay liyay is say behatar kuchh naheen hai ki vah apnay kaamon men khush rahay, yahee us kay naseeb men hai. kyoonki kaun usay vah dekhnay kay qaabil banaaega jo us kay baad pesh aaega? koee naheen