Vaaiz 2
duniya kee khushiyaan baatil hain
1main nay apnay aap say kaha, “a, khushee ko aazma kar achchhee cheezon ka tajriba kar!” lekin yah bhee baatil hee nikla. 2main bola, “hansna behooda hai, aur khushee say kya haasil hota hai?” 3main nay dil men apna jism mai say tar-o-taaza karnay aur hamaaqat apnaanay kay tareeqay dhoond nikaalay. is kay peechhay bhee meree hikmat maaloom karnay kee koshish thee, kyoonki main dekhna chaahata tha ki jab tak insaan aasmaan talay jeeta rahay us kay liyay kya kuchh karna mufeed hai.
4main nay baday baday kaam anjaam diay, apnay liyay makaan taameer kiay, taakistaan lagaaay, 5mut’addid baagh aur paark laga kar un men mukhtalif qism kay phaldaar darakht lagaaay. 6phalnay phoolnay vaalay jangal kee aabpaashee kay liyay main nay taalaab tayyaar karvaaay. 7main nay ghulaam aur laundiyaan khareed leen. aisay ghulaam bhee bahut thay jo ghar men paida huay thay. mujhay utnay gaay-bail aur bhed-bakriyaan mileen jitnee mujh say pahelay yarooshalam men kisee ko haasil na theen. 8main nay apnay liyay sona-chaandee aur baadshaahon aur soobon kay khazaanay jama kiay. main nay gulookaar mard-o-khavaateen haasil kiay, saath saath kasrat kee aisee cheezen jin say insaan apna dil bahelaata hai.
9yoon main nay bahut taraqqee karkay un sab par sabqat haasil kee jo mujh say pahelay yarooshalam men thay. aur har kaam men meree hikmat meray dil men qaaim rahee. 10jo kuchh bhee meree aankhen chaahatee theen vah main nay un kay liyay muhayya kiya, main nay apnay dil say kisee bhee khushee ka inkaar na kiya. meray dil nay meray har kaam say lutf uthaaya, aur yah meree tamaam mehanat-mashaqqat ka ajr raha.
11lekin jab main nay apnay haathon kay tamaam kaamon ka jaaiza liya, us mehanat-mashaqqat ka jo main nay kee thee to nateeja yahee nikla ki sab kuchh baatil aur hava ko pakadnay kay baraabar hai. sooraj talay kisee bhee kaam ka faaida naheen hota.
sab ka ek hee anjaam hai
12phir main hikmat, behudgee aur hamaaqat par ghaur karnay laga. main nay socha, jo aadmee baadshaah kee vafaat par takhtnasheen hoga vah kya karega? vahee kuchh jo pahelay bhee kiya ja chuka hai!
13main nay dekha ki jis tarah raushnee andheray say behatar hai usee tarah hikmat hamaaqat say behatar hai. 14daanishmand kay sar men aankhen hain jabki ahemaq andheray hee men chalta hai. lekin main nay yah bhee jaan liya ki donon ka ek hee anjaam hai. 15main nay dil men kaha, “ahemaq ka sa anjaam mera bhee hoga. to phir itnee ziyaada hikmat haasil karnay ka kya faaida hai? yah bhee baatil hai.” 16kyoonki ahemaq kee tarah daanishmand kee yaad bhee hamesha tak naheen rahegee. aanay vaalay dinon men sab kee yaad mit jaaegee. ahemaq kee tarah daanishmand ko bhee marna hee hai!
17yoon sochtay sochtay main zindagee say nafrat karnay laga. jo bhee kaam sooraj talay kiya jaata hai vah mujhay bura laga, kyoonki sab kuchh baatil aur hava ko pakadnay kay baraabar hai. 18sooraj talay main nay jo kuchh bhee mehanat-mashaqqat say haasil kiya tha us say mujhay nafrat ho gaee, kyoonki mujhay yah sab kuchh us kay liyay chhodna hai jo meray baad meree jagah aaega. 19aur kya maaloom ki vah daanishmand ya ahemaq hoga? lekin jo bhee ho, vah un tamaam cheezon ka maalik hoga jo haasil karnay kay liyay main nay sooraj talay apnee pooree taaqat aur hikmat sarf kee hai. yah bhee baatil hai.
20tab mera dil maayoos ho kar himmat haarnay laga, kyoonki jo bhee mehanat-mashaqqat main nay sooraj talay kee thee vah bekaar see lagee. 21kyoonki khwaah insaan apna kaam hikmat, ilm aur mahaarat say kyoon na karay, aakhirkaar usay sab kuchh kisee kay liyay chhodna hai jis nay us kay liyay ek unglee bhee naheen hilaaee. yah bhee baatil aur badee museebat hai. 22kyoonki aakhir men insaan kay liyay kya kuchh qaaim raheta hai, jabki us nay sooraj talay itnee mehanat-mashaqqat aur koshishon kay saath sab kuchh haasil kar liya hai? 23us kay tamaam din dukh aur ranjeedgee say bharay rahetay hain, raat ko bhee us ka dil aaraam naheen paata. yah bhee baatil hee hai.
24insaan kay liyay sab say achchhee baat yah hai ki khaaay piay aur apnee mehanat-mashaqqat kay phal say lutf’andoz ho. lekin main nay yah bhee jaan liya ki allaah hee yah sab kuchh muhayya karta hai. 25kyoonki us kay baghair kaun kha kar khush ho sakta hai? koee naheen! 26jo insaan allaah ko manzoor ho usay vah hikmat, ilm-o-irfaan aur khushee ata karta hai, lekin gunaahgaar ko vah jama karnay aur zakheera karnay kee zimmaadaaree deta hai taaki baad men yah daulat allaah ko manzoor shakhs kay havaalay kee jaaay. yah bhee baatil aur hava ko pakadnay kay baraabar hai.