Vaaiz 11

muhabbat ka faaidaa

¹apnee rotee paanee par phaink kar jaanay day to mut’addid dinon kay baad vah tujhay phir mil jaaegee. ²apnee milkiyat saat balki aath mukhtalif kaamon men laga day, kyoonki tujhay kya maaloom ki mulk kya kya museebat say dochaar hoga.

³agar baadal paanee say bharay hon to zameen par baarish zaroor hogee. darakht junoob ya shimaal kee taraf gir jaaay to usee taraf pada rahega.

⁴jo har vaqt hava ka rukh dekhta rahay vah kabhee beej naheen boega. jo baadlon ko takta rahay vah kabhee fasal kee kataaee naheen karega.

⁵jis tarah na tujhay hava kay chakkar maaloom hain, na yah ki maan kay pet men bachcha kis tarah tashkeel paata hai usee tarah too allaah ka kaam naheen samajh sakta, jo sab kuchh amal men laata hai.

⁶subah kay vaqt apna beej bo aur shaam ko bhee kaam men laga rah, kyoonki kya maaloom ki kis kaam men kaamyaabee hogee, is men, us men ya donon men.

apnee javaanee say lutf’andoz ho

⁷raushnee kitnee bhalee hai, aur sooraj aankhon kay liyay kitna khushgavaar hai. ⁸jitnay bhee saal insaan zinda rahay utnay saal vah khushbaash rahay. saath saath usay yaad rahay ki taareek din bhee aanay vaalay hain, aur ki un kee badee taadaad hogee. jo kuchh aanay vaala hai vah baatil hee hai.

⁹ai naujavaan, jab tak too javaan hai khush rah aur javaanee kay mazay leta rah. jo kuchh tera dil chaahay aur teree aankhon ko pasand aaay vah kar, lekin yaad rahay ki jo kuchh bhee too karay us ka javaab allaah tujh say talab karega. ¹⁰chunaanchay apnay dil say ranjeedgee aur apnay jism say dukh-dard door rakh, kyoonki javaanee aur kaalay baal dam bhar kay hee hain.