Vaaiz 10
mukhtalif hidaayaat
1maree huee makkhiyaan khushboodaar tel kharaab kartee hain, aur hikmat aur izzat kee nisbat thodee see hamaaqat ka ziyaada asar hota hai.
2daanishmand ka dil saheeh raah chun leta hai jabki ahemaq ka dil ghalat raah par a jaata hai. 3raastay par chaltay vaqt bhee ahemaq samajh say khaalee hai, jis say bhee milay usay bataata hai ki vah bevuqoof hai [a] ibraanee zoomaanee hai. doosra matlab ki main bevuqoof hoon ho sakta hai. .
4agar hukmaraan tujh say naaraaz ho jaaay to apnee jagah mat chhod, kyoonki pursukoon ravayya badee badee ghaltiyaan door kar deta hai.
5mujhay sooraj talay ek aisee buree baat nazar aaee jo aksar hukmaraanon say sarzad hotee hai. 6ahemaq ko baday uhdon par faaiz kiya jaata hai jabki ameer chhotay uhdon par hee rahetay hain. 7main nay ghulaamon ko ghoday par savaar aur hukmaraanon ko ghulaamon kee tarah paidal chaltay dekha hai.
8jo gadha khoday vah khud us men gir sakta hai, jo deevaar gira day ho sakta hai ki saamp usay dasay. 9jo kaan say patthar nikaalay usay chot lag saktee hai, jo lakdee cheer daalay vah zakhmee ho jaanay kay khatray men hai.
10agar kulhaadee kund ho aur koee usay tez na karay to ziyaada taaqat darkaar hai. lihaaza hikmat ko saheeh taur say amal men la, tab hee kaamyaabee haasil hogee.
11agar is say pahelay ki sapera saamp par qaaboo paaay vah usay dasay to phir sapera honay ka kya faaida?
12daanishmand apnay munh kee baaton say doosron kee meharbaanee haasil karta hai, lekin ahemaq kay apnay hee hont usay hadap kar letay hain. 13us ka bayaan ahemaqaana baaton say shuroo aur khatarnaak bevuqoofiyon say khatm hota hai. 14aisa shakhs baaten karnay say baaz naheen aata, go insaan mustaqbil kay baaray men kuchh naheen jaanta. kaun usay bata sakta hai ki us kay baad kya kuchh hoga? 15ahemaq ka kaam usay thaka deta hai, aur vah shaher ka raasta bhee naheen jaanta.
16us mulk par afsos jis ka baadshaah bachcha hai aur jis kay buzurg subah hee ziyaafat karnay lagtay hain. 17mubaarak hai vah mulk jis ka baadshaah shareef hai aur jis kay buzurg nashay men dhut naheen rahetay balki munaasib vaqt par aur nazm-o-zabt kay saath khaana khaatay hain.
18jo sust hai us kay ghar kay shaheteer jhuknay lagtay hain, jis kay haath dheelay hain us kee chhat say paanee tapaknay lagta hai.
19ziyaafat karnay say hansee-khushee aur mai peenay say zindaadilee paida hotee hai, lekin paisa hee sab kuchh muhayya karta hai.
20khayaalon men bhee baadshaah par laanat na kar, apnay sonay kay kamray men bhee ameer par laanat na bhej, aisa na ho ki koee parinda teray alfaaz lay kar us tak pahunchaaay.