Vaaiz 1

har duniyaavee cheez baatil hai

¹zail men vaaiz kay alfaaz qalamband hain, us kay jo daaood ka beta aur yarooshalam men baadshaah hai,

²vaaiz farmaata hai, “baatil hee baatil, baatil hee baatil, sab kuchh baatil hee baatil hai!” ³sooraj talay jo mehanat-mashaqqat insaan karay us ka kya faaida hai? kuchh naheen! ⁴ek pusht aatee aur doosree jaatee hai, lekin zameen hamesha tak qaaim rahetee hai. ⁵sooraj tuloo aur ghuroob ho jaata hai, phir sur’at say usee jagah vaapas chala jaata hai jahaan say dubaara tuloo hota hai. ⁶hava junoob kee taraf chaltee, phir mud kar shimaal kee taraf chalnay lagtee hai. yoon chakkar kaat kaat kar vah baar baar nuqta-ay-aaghaaz par vaapas aatee hai. ⁷tamaam darya samundar men ja miltay hain, to bhee samundar kee satah vahee rahetee hai, kyoonki daryaaon ka paanee musalsal un sarchashmon kay paas vaapas aata hai jahaan say bah nikla hai. ⁸insaan baaten kartay kartay thak jaata hai aur saheeh taur say kuchh bayaan naheen kar sakta. aankh kabhee itna naheen dekhtee ki kahay, “ab bas karo, kaafee hai.” kaan kabhee itna naheen sunta ki aur na sunna chaahay. ⁹jo kuchh pesh aaya vahee dubaara pesh aaega, jo kuchh kiya gaya vahee dubaara kiya jaaega. sooraj talay koee bhee baat naee naheen. ¹⁰kya koee baat hai jis kay baaray men kaha ja sakay, “dekho, yah naee hai”? hargiz naheen, yah bhee ham say bahut der pahelay hee maujood thee. ¹¹jo pahelay zinda thay unhen koee yaad naheen karta, aur jo aanay vaalay hain unhen bhee vah yaad naheen karengay jo un kay baad aaengay.

hikmat haasil karna baatil hai

¹²main jo vaaiz hoon yarooshalam men israaeel ka baadshaah tha. ¹³main nay apnee pooree zahenee taaqat is par lagaaee ki jo kuchh aasmaan talay kiya jaata hai us kee hikmat kay zareeay tafteesh-o-tahqeeq karoon. yah kaam naagvaar hai go allaah nay khud insaan ko is men mehanat-mashaqqat karnay kee zimmaadaaree dee hai.

¹⁴main nay tamaam kaamon ka mulaahaza kiya jo sooraj tulay hotay hain, to nateeja yah nikla ki sab kuchh baatil aur hava ko pakadnay kay baraabar hai. ¹⁵jo pechdaar hai vah seedha naheen ho sakta, jis kee kamee hai usay gina naheen ja sakta.

¹⁶main nay dil men kaha, “hikmat men main nay itna izaafa kiya aur itnee taraqqee kee ki un sab say sabqat lay gaya jo mujh say pahelay yarooshalam par hukoomat kartay thay. meray dil nay bahut hikmat aur ilm apna liya hai.” ¹⁷main nay apnee pooree zahenee taaqat is par lagaaee ki hikmat samjhoon, neez ki mujhay deevaangee aur hamaaqat kee samajh bhee aaay. lekin mujhay maaloom hua ki yah bhee hava ko pakadnay kay baraabar hai. ¹⁸kyoonki jahaan hikmat bahut hai vahaan ranjeedgee bhee bahut hai. jo ilm-o-irfaan men izaafa karay, vah dukh men izaafa karta hai.