Istisna 9

mulk milnay ka sabab israaeel kee raastee naheen hai

¹sun ai israaeel! aaj too darya-ay-yardan ko paar karnay vaala hai. doosree taraf too aisee qaumon ko bhaga dega jo tujh say badee aur taaqatvar hain aur jin kay shaandaar shaheron kee faseelen aasmaan say baaten kartee hain. ²vahaan anaaqee bastay hain jo taaqatvar aur daraazaqad hain. too khud jaanta hai ki un kay baaray men kaha jaata hai, “kaun anaaqiyon ka saamna kar sakta hai?” ³lekin aaj jaan lay ki rabb tera khuda teray aagay aagay chaltay huay unhen bhasm kar denay vaalee aag kee tarah halaak karega. vah teray aagay aagay un par qaaboo paaega, aur too unhen nikaal kar jaldee mita dega, jis tarah rabb nay vaada kiya hai.

⁴jab rabb tera khuda unhen teray saamnay say nikaal dega to too yah na kahena, “main raastbaaz hoon, isee liyay rabb mujhay laaiq samajh kar yahaan laaya aur yah mulk meeraas men day diya hai.” yah baat hargiz durust naheen hai. rabb un qaumon ko un kee ghalat harkaton kee vajah say teray saamnay say nikaal dega. ⁵too apnee raastbaazee aur diyaanatdaaree kee bina par us mulk par qabza naheen karega balki rabb unhen un kee shareer harkaton kay baais teray saamnay say nikaal dega. doosray, jo vaada us nay teray baapdaada ibraaheem, ishaaq aur yaaqoob kay saath qasam kha kar kiya tha usay poora hona hai.

⁶chunaanchay jaan lay ki rabb tera khuda tujhay teree raastee kay baais yah achchha mulk naheen day raha. haqeeqat to yah hai ki too hatdharm qaum hai.

sonay ka bachhdaa

⁷yaad rakh aur kabhee na bhool ki too nay registaan men rabb apnay khuda ko kis tarah naaraaz kiya. misr say nikaltay vaqt say lay kar yahaan pahunchnay tak tum rabb say sarkash rahay ho. ⁸khaaskar horib yaanee seena kay daaman men tum nay rabb ko itna ghussa dilaaya ki vah tumhen halaak karnay ko tha. ⁹us vaqt main pahaad par chadh gaya tha taaki patthar kee takhtiyaan yaanee us ahd kee takhtiyaan mil jaaen jo rabb nay tumhaaray saath baandha tha. kuchh khaaay piay baghair main 40 din aur raat vahaan raha.

^10-11 jo kuchh rabb nay aag men say kaha tha jab tum pahaad kay daaman men jama thay vahee kuchh us nay apnee unglee say donon takhtiyon par likh kar mujhay diya. ¹²us nay mujh say kaha, “fauran yahaan say utar ja. teree qaum jisay too misr say nikaal laaya bigad gaee hai. vah kitnee jaldee say meray ahkaam say hat gaay hain. unhon nay apnay liyay but dhaal liya hai. ¹³main nay jaan liya hai ki yah qaum kitnee ziddee hai. ¹⁴ab mujhay chhod day taaki main unhen tabaah karkay un ka naam-o-nishaan duniya men say mita daaloon. un kee jagah main tujh say ek qaum bana loonga jo un say badee aur taaqatvar hogee.”

¹⁵main mud kar pahaad say utra jo ab tak bhadak raha tha. meray haathon men ahd kee donon takhtiyaan theen. ¹⁶tumhen dekhtay hee mujhay maaloom hua ki tum nay rabb apnay khuda ka gunaah kiya hai. tum nay apnay liyay bachhday ka but dhaal liya tha. tum kitnee jaldee say rabb kee muqarrara raah say hat gaay thay.

¹⁷tab main nay tumhaaray dekhtay dekhtay donon takhtiyon ko zameen par patakh kar tukday tukday kar diya. ¹⁸ek aur baar main rabb kay saamnay munh kay bal gira. main nay na kuchh khaaya, na kuchh piya. 40 din aur raat main tumhaaray tamaam gunaahon kay baais isee haalat men raha. kyoonki jo kuchh tum nay kiya tha vah rabb ko nihaayat bura laga, is liyay vah ghazabnaak ho gaya tha. ¹⁹vah tum say itna naaraaz tha ki main bahut dar gaya. yoon lag raha tha ki vah tumhen halaak kar dega. lekin is baar bhee us nay meree sun lee. ²⁰main nay haaroon kay liyay bhee dua kee, kyoonki rabb us say bhee nihaayat naaraaz tha aur usay halaak kar dena chaahata tha.

²¹jo bachhda tum nay gunaah karkay banaaya tha usay main nay jala diya, phir jo kuchh baaqee rah gaya usay kuchal diya aur pees pees kar paaudar bana diya. yah paaudar main nay us chashmay men phaink diya jo pahaad par say bah raha tha.

²²tum nay rabb ko tabaera, massa aur qabrot-hattaava men bhee ghussa dilaaya. ²³qaadis-barneea men bhee aisa hee hua. vahaan say rabb nay tumhen bhej kar kaha tha, “jaao, us mulk par qabza karo jo main nay tumhen day diya hai.” lekin tum nay sarkash ho kar rabb apnay khuda kay hukm kee khilaafvarzee kee. tum nay us par etimaad na kiya, na us kee sunee. ²⁴jab say main tumhen jaanta hoon tumhaara rabb kay saath ravayya baaghiyaana hee raha hai.

²⁵main 40 din aur raat rabb kay saamnay zameen par munh kay bal raha, kyoonki rabb nay kaha tha ki vah tumhen halaak kar dega. ²⁶main nay us say minnat karkay kaha, “ai rabb qaadir-ay-mutlaq, apnee qaum ko tabaah na kar. vah to teree hee milkiyat hai jisay too nay fidya day kar apnee azeem qudrat say bachaaya aur baday ikhtiyaar kay saath misr say nikaal laaya. ²⁷apnay khaadimon ibraaheem, ishaaq aur yaaqoob ko yaad kar, aur is qaum kee zid, shareer harkaton aur gunaah par tavajjuh na day. ²⁸varna misree kahengay, ‘rabb unhen us mulk men laanay kay qaabil naheen tha jis ka vaada us nay kiya tha, balki vah un say nafrat karta tha. haan, vah unhen halaak karnay kay liyay registaan men lay aaya.’ ²⁹vah to teree qaum hain, teree milkiyat jisay too apnee azeem qudrat aur ikhtiyaar say misr say nikaal laaya.”