Istisna 8

rabb ko na bhoolnaa

¹ehatiyaat say un tamaam ahkaam par amal karo jo main aaj tujhay day raha hoon. kyoonki aisa karnay say tum jeetay rahogay, taadaad men badhogay aur ja kar us mulk par qabza karogay jis ka vaada rabb nay tumhaaray baapdaada say qasam kha kar kiya tha.

²vah poora vaqt yaad rakh jab rabb tera khuda registaan men 40 saal tak teree raahanumaaee karta raha taaki tujhay aajiz karkay aazmaaay aur maaloom karay ki kya too us kay ahkaam par chalega ki naheen. ³us nay tujhay aajiz karkay bhookay honay diya, phir tujhay mann khilaaya jis say na too aur na teray baapdaada vaaqif thay. kyoonki vah tujhay sikhaana chaahata tha ki insaan kee zindagee sirf rotee par munhasir naheen hotee balki har us baat par jo rabb kay munh say nikaltee hai.

⁴in 40 saalon kay dauraan teray kapday na ghisay na phatay, na teray paaon soojay. ⁵chunaanchay dil men jaan lay ki jis tarah baap apnay betay kee tarbeeyat karta hai usee tarah rabb hamaara khuda hamaaree tarbiyat karta hai.

⁶rabb apnay khuda kay ahkaam par amal karkay us kee raahon par chal aur us ka khauf maan. ⁷kyoonki vah tujhay ek behtareen mulk men lay ja raha hai jis men naheren aur aisay chashmay hain jo pahaadiyon aur vaadiyon kee zameen say phoot nikaltay hain. ⁸us kee paidaavaar anaaj, jau, angoor, anjeer, anaar, zaitoon aur shahed hai. ⁹us men rotee kee kamee naheen hogee, aur too kisee cheez say maheroom naheen rahega. us kay pattharon men loha paaya jaata hai, aur khudaaee say too us kee pahaadiyon say taamba haasil kar sakega.

¹⁰jab too kasrat ka khaana kha kar ser ho jaaega to phir rabb apnay khuda kee tamjeed karna jis nay tujhay yah shaandaar mulk diya hai. ¹¹khabardaar, rabb apnay khuda ko na bhool aur us kay un ahkaam par amal karnay say gurez na kar jo main aaj tujhay day raha hoon. ¹²kyoonki jab too kasrat ka khaana kha kar ser ho jaaega, too shaandaar ghar bana kar un men rahegaa ¹³aur teray revad, sonay-chaandee aur baaqee tamaam maal men izaafa hogaa ¹⁴to kaheen too maghroor ho kar rabb apnay khuda ko bhool na jaaay jo tujhay misr kee ghulaamee say nikaal laaya. ¹⁵jab too us vasee aur haulnaak registaan men safar kar raha tha jis men zahereelay saamp aur bichchhoo thay to vahee teree raahanumaaee karta raha. paanee say maheroom us ilaaqay men vahee sakht patthar men say paanee nikaal laaya. ¹⁶registaan men vahee tujhay mann khilaata raha, jis say teray baapdaada vaaqif na thay. in mushkilaat say vah tujhay aajiz karkay aazmaata raha taaki aakhirkaar too kaamyaab ho jaaay.

¹⁷jab tujhay kaamyaabee haasil hogee to yah na kahena ki main nay apnee hee quvvat aur taaqat say yah sab kuchh haasil kiya hai. ¹⁸balki rabb apnay khuda ko yaad karna jis nay tujhay daulat haasil karnay kee qaabiliyat dee hai. kyoonki vah aaj bhee usee ahd par qaaim hai jo us nay teray baapdaada say kiya tha.

¹⁹rabb apnay khuda ko na bhoolna, aur na deegar maaboodon kay peechhay pad kar unhen sijda aur un kee khidmat karna. varna main khud gavaah hoon ki tum yaqeenan halaak ho jaaogay. ²⁰agar tum rabb apnay khuda kee itaaat naheen karogay to phir vah tumhen un qaumon kee tarah tabaah kar dega jo tum say pahelay is mulk men rahetee theen.