Istisna 7

doosree kan’aanee qaumon ko nikaalna hai

¹rabb tera khuda tujhay us mulk men lay jaaega jis par too ja kar qabza karega. vah teray saamnay say bahut see qaumen bhaga dega. go yah saat qaumen yaanee hittee, jirjaasee, amoree, kan’aanee, farizzee, hivvee aur yaboosee taadaad aur taaqat kay lihaaz say tujh say badee hongee ²to bhee rabb tera khuda unhen teray havaalay karega. jab too unhen shikast dega to un sab ko us kay liyay makhsoos karkay halaak kar dena hai. na un kay saath ahd baandhna aur na un par rahem karna. ³un men say kisee say shaadee na karna. na apnee betiyon ka rishta un kay beton ko dena, na apnay beton ka rishta un kee betiyon say karna. ⁴varna vah tumhaaray bachchon ko meree pairvee say door karengay aur vah meree naheen balki un kay devtaaon kee khidmat karengay. tab rabb ka ghazab tum par naazil ho kar jaldee say tumhen halaak kar dega. ⁵is liyay un kee qurbaangaahen dha dena. jin pattharon kee vah pooja kartay hain unhen chikna-choor kar dena, un kay yaseerat devee kay khambay kaat daalna aur un kay but jala dena.

⁶kyoonki too rabb apnay khuda kay liyay makhsoos-o-muqaddas hai. us nay duniya kee tamaam qaumon men say tujhay chun kar apnee qaum aur khaas milkiyat banaaya. ⁷rabb nay kyoon tumhaaray saath taalluq qaaim kiya aur tumhen chun liya? kya is vajah say ki tum taadaad men deegar qaumon kee nisbat ziyaada thay? hargiz naheen! tum to bahut kam thay. ⁸balki vajah yah thee ki rabb nay tumhen piyaar kiya aur vah vaada poora kiya jo us nay qasam kha kar tumhaaray baapdaada kay saath kiya tha. isee liyay vah fidya day kar tumhen badee qudrat say misr kee ghulaamee aur us mulk kay baadshaah kay haath say bacha laaya. ⁹chunaanchay jaan lay ki sirf rabb tera khuda hee khuda hai. vah vafaadaar khuda hai. jo us say muhabbat rakhtay aur us kay ahkaam par amal kartay hain un kay saath vah apna ahd qaaim rakhega aur un par hazaar pushton tak meharbaanee karega. ¹⁰lekin us say nafrat karnay vaalon ko vah un kay roo-ba-roo munaasib saza day kar barbaad karega. haan, jo us say nafrat kartay hain, un kay roo-ba-roo vah munaasib saza dega aur jhijhkega naheen.

¹¹chunaanchay dhyaan say un tamaam ahkaam par amal kar jo main aaj tujhay day raha hoon taaki too un kay mutaabiq zindagee guzaaray. ¹²agar too un par tavajjuh day aur ehatiyaat say un par chalay to phir rabb tera khuda teray saath apna ahd qaaim rakhega aur tujh par meharbaanee karega, bilkul us vaaday kay mutaabiq jo us nay qasam kha kar teray baapdaada say kiya tha. ¹³vah tujhay piyaar karega aur tujhay us mulk men barkat dega jo tujhay denay ka vaada us nay qasam kha kar teray baapdaada say kiya tha. tujhay bahut aulaad bakhshnay kay ilaava vah teray kheton ko barkat dega, aur tujhay kasrat ka anaaj, angoor aur zaitoon haasil hoga. vah teray revdon ko bhee barkat dega, aur teray gaay-bailon aur bhed-bakriyon kee taadaad badhtee jaaegee. ¹⁴tujhay deegar tamaam qaumon kee nisbat kaheen ziyaada barkat milegee. na tujh men aur na teray maveshiyon men baanjhpan paaya jaaega. ¹⁵rabb har beemaaree ko tujh say door rakhega. vah tujh men vah khatarnaak vabaaen phailnay naheen dega jin say too misr men vaaqif hua balki unhen un men phailaaega jo tujh say nafrat rakhtay hain.

¹⁶jo bhee qaumen rabb tera khuda teray haath men kar dega unhen tabaah karna laazim hai. un par rahem kee nigaah say na dekhna, na un kay devtaaon kee khidmat karna, varna too phans jaaega.

¹⁷go tera dil kahay, “yah qaumen ham say taaqatvar hain. ham kis tarah inhen nikaal saktay hain?” ¹⁸to bhee un say na dar. vahee kuchh zahen men rakh jo rabb teray khuda nay firaaun aur pooray misr kay saath kiya. ¹⁹kyoonki too nay apnee aankhon say rabb apnay khuda kee vah badee aazmaanay vaalee museebaten aur mojizay, us ka vah azeem ikhtiyaar aur qudrat dekhee jis say vah tujhay vahaan say nikaal laaya. vahee kuchh rabb tera khuda un qaumon kay saath bhee karega jin say too is vaqt darta hai. ²⁰na sirf yah balki rabb tera khuda un kay darmiyaan zamboor bhee bhejega taaki vah bhee tabaah ho jaaen jo pahelay hamlon say bach kar chhup gaay hain. ²¹un say dahshat na kha, kyoonki rabb tera khuda teray darmiyaan hai. vah azeem khuda hai jis say sab khauf khaatay hain. ²²vah rafta rafta un qaumon ko teray aagay say bhaga dega. too unhen ek dam khatm naheen kar sakega, varna janglee jaanvar tezee say badh kar tujhay nuqsaan pahuchaaengay.

²³rabb tera khuda unhen teray havaalay kar dega. vah un men itnee sakht afra-tafree paida karega ki vah barbaad ho jaaengay. ²⁴vah un kay baadshaahon ko bhee teray qaaboo men kar dega, aur too un ka naam-o-nishaan mita dega. koee bhee tera saamna naheen kar sakega balki too un sab ko barbaad kar dega.

²⁵un kay devtaaon kay mujassmay jala dena. jo chaandee aur sona un par chadhaaya hua hai us ka laalach na karna. usay na lena varna too phans jaaega. kyoonki in cheezon say rabb teray khuda ko ghin aatee hai. ²⁶is tarah kee makrooh cheez apnay ghar men na laana, varna tujhay bhee us kay saath alag karkay barbaad kiya jaaega. teray dil men us say shadeed nafrat aur ghin ho, kyoonki usay pooray taur par barbaad karnay kay liyay makhsoos kiya gaya hai.