Istisna 6

sab say bada hukm

¹yah vah tamaam ahkaam hain jo rabb tumhaaray khuda nay mujhay tumhen sikhaanay kay liyay kaha. us mulk men in par amal karna jis men tum jaanay vaalay ho taaki us par qabza karo. ²umr bhar too, teray bachchay aur potay-navaasay rabb apnay khuda ka khauf maanen aur us kay un tamaam ahkaam par chalen jo main tujhay day raha hoon. tab too der tak jeeta rahega. ³ai israaeel, yah meree baaten sun aur badee ehatiyaat say in par amal kar! phir rabb teray khuda ka vaada poora ho jaaega ki too kaamyaab rahega aur teree taadaad us mulk men khoob badhtee jaaegee jis men doodh aur shahed kee kasrat hai.

⁴sun ai israaeel! rabb hamaara khuda ek hee rabb hai. ⁵rabb apnay khuda say apnay pooray dil, apnee pooree jaan aur apnee pooree taaqat say piyaar karna. ⁶jo ahkaam main tujhay aaj bata raha hoon unhen apnay dil par naqsh kar. ⁷unhen apnay bachchon kay zahenanasheen kara. yahee baaten har vaqt aur har jagah teray labon par hon khwaah too ghar men baitha ya raastay par chalta ho, leta ho ya khada ho. ⁸unhen nishaan kay taur par aur yaaddahaanee kay liyay apnay baazooon aur maathay par laga. ⁹unhen apnay gharon kee chaukhton aur apnay shaheron kay darvaazon par likh.

¹⁰rabb teray khuda ka vaada poora hoga jo us nay qasam kha kar teray baapdaada ibraaheem, ishaaq aur yaaqoob kay saath kiya ki main tujhay kan’aan men lay jaaoonga. jo baday aur shaandaar shaher us men hain vah too nay khud naheen banaaay. ¹¹jo makaan us men hain vah aisee achchhee cheezon say bharay huay hain jo too nay un men naheen rakheen. jo kuen us men hain un ko too nay naheen khoda. jo angoor aur zaitoon kay baagh us men hain unhen too nay naheen lagaaya. yah haqeeqat yaad rakh. jab too us mulk men kasrat ka khaana kha kar ser ho jaaegaa ¹²to khabardaar! rabb ko na bhoolna jo tujhay misr kee ghulaamee say nikaal laaya.

¹³rabb apnay khuda ka khauf maanna. sirf usee kee ibaadat karna aur usee ka naam lay kar qasam khaana. ¹⁴deegar maaboodon kee pairvee na karna. is men tamaam padosee aqvaam kay devta bhee shaamil hain. ¹⁵varna rabb teray khuda ka ghazab tujh par naazil ho kar tujhay mulk men say mita daalega. kyoonki vah ghayoor khuda hai aur teray darmiyaan hee raheta hai.

¹⁶rabb apnay khuda ko us tarah na aazmaana jis tarah tum nay massa men kiya tha. ¹⁷dhyaan say rabb apnay khuda kay ahkaam kay mutaabiq chalo, un tamaam hidaayaat aur qavaaneen par jo us nay tujhay diay hain. ¹⁸jo kuchh rabb kee nazar men durust aur achchha hai vah kar. phir too kaamyaab rahega, too ja kar us achchhay mulk par qabza karega jis ka vaada rabb nay teray baapdaada say qasam kha kar kiya tha. ¹⁹tab rabb kee baat pooree ho jaaegee ki too apnay dushmanon ko apnay aagay aagay nikaal dega.

²⁰aanay vaalay dinon men teray bachchay poochhengay, “rabb hamaaray khuda nay aap ko in tamaam ahkaam par amal karnay ko kyoon kaha?” ²¹phir unhen javaab dena, “ham misr kay baadshaah firaaun kay ghulaam thay, lekin rabb hamen badee qudrat ka izhaar karkay misr say nikaal laaya. ²²hamaaray dekhtay dekhtay us nay baday baday nishaan aur mojizay kiay aur misr, firaaun aur us kay pooray gharaanay par haulnaak museebaten bhejeen. ²³us vaqt vah hamen vahaan say nikaal laaya taaki hamen lay kar vah mulk day jis ka vaada us nay qasam kha kar hamaaray baapdaada kay saath kiya tha. ²⁴rabb hamaaray khuda hee nay hamen kaha ki in tamaam ahkaam kay mutaabiq chalo aur rabb apnay khuda ka khauf maano. kyoonki agar ham aisa karen to phir ham hamesha kaamyaab aur zinda rahengay. aur aaj tak aisa hee raha hai. ²⁵agar ham rabb apnay khuda kay huzoor rah kar ehatiyaat say un tamaam baaton par amal karengay jo us nay hamen karnay ko kahee hain to vah hamen raastbaaz qaraar dega.”