Istisna 5
das ahkaam
1moosa nay tamaam israaeeliyon ko jama karkay kaha,
ay israaeel, dhyaan say vah hidaayaat aur ahkaam sun jo main tumhen aaj pesh kar raha hoon. unhen seekho aur badee ehatiyaat say un par amal karo. 2rabb hamaaray khuda nay horib yaanee seena pahaad par hamaaray saath ahd baandha. 3us nay yah ahd hamaaray baapdaada kay saath naheen balki hamaaray hee saath baandha hai, jo aaj is jagah par zinda hain. 4rabb pahaad par aag men say roo-ba-roo ho kar tum say hamkalaam hua. 5us vaqt main tumhaaray aur rabb kay darmiyaan khada hua taaki tumhen rabb kee baaten sunaaoon. kyoonki tum aag say dartay thay aur is liyay pahaad par na chadhay. us vaqt rabb nay kaha,
6“main rabb tera khuda hoon jo tujhay mulk-ay-misr kee ghulaamee say nikaal laaya. 7meray siva kisee aur maabood kee parastish na karna.
8apnay liyay but na banaana. kisee bhee cheez kee moorat na banaana, chaahay vah aasmaan men, zameen par ya samundar men ho. 9na buton kee parastish, na un kee khidmat karna, kyoonki main tera rabb ghayoor khuda hoon. jo mujh say nafrat kartay hain unhen main teesree aur chauthee pusht tak saza doonga. 10lekin jo mujh say muhabbat rakhtay aur meray ahkaam pooray kartay hain un par main hazaar pushton tak meharbaanee karoonga.
11rabb apnay khuda ka naam bemaqsad ya ghalat maqsad kay liyay istemaal na karna. jo bhee aisa karta hai usay rabb saza diay baghair naheen chhodega.
12sabat kay din ka khayaal rakhna. usay is tarah manaana ki vah makhsoos-o-muqaddas ho, usee tarah jis tarah rabb teray khuda nay tujhay hukm diya hai. 13haftay kay pahelay chhah din apna kaam-kaaj kar, 14lekin saatvaan din rabb teray khuda ka aaraam ka din hai. us din kisee tarah ka kaam na karna. na too, na tera beta, na teree betee, na tera naukar, na teree naukraanee, na tera bail, na tera gadha, na tera koee aur maveshee. jo pardesee teray darmiyaan raheta hai vah bhee kaam na karay. teray naukar aur teree naukraanee ko teree tarah aaraam ka mauqa milna hai. 15yaad rakhna ki too misr men ghulaam tha aur ki rabb tera khuda hee tujhay badee qudrat aur ikhtiyaar say vahaan say nikaal laaya. is liyay us nay tujhay hukm diya hai ki sabat ka din manaana.
16apnay baap aur apnee maan kee izzat karna jis tarah rabb teray khuda nay tujhay hukm diya hai. phir too us mulk men jo rabb tera khuda tujhay denay vaala hai khushhaal hoga aur der tak jeeta rahega.
17qatl na karna.
18zina na karna.
19choree na karna.
20apnay padosee kay baaray men jhootee gavaahee na dena.
21apnay padosee kee beevee ka laalach na karna. na us kay ghar ka, na us kee zameen ka, na us kay naukar ka, na us kee naukraanee ka, na us kay bail aur na us kay gadhay ka balki us kee kisee bhee cheez ka laalach na karna.”
22rabb nay tum sab ko yah ahkaam diay jab tum seena pahaad kay daaman men jama thay. vahaan tum nay aag, baadal aur gaheray andheray men say us kee zordaar aavaaz sunee. yahee kuchh us nay kaha aur bas. phir us nay unhen patthar kee do takhtiyon par likh kar mujhay day diya.
log rabb say dartay hain
23jab tum nay taareekee say yah aavaaz sunee aur pahaad kee jaltee huee haalat dekhee to tumhaaray qabeelon kay raahanuma aur buzurg meray paas aaay. 24unhon nay kaha, “rabb hamaaray khuda nay ham par apna jalaal aur azmat zaahir kee hai. aaj ham nay aag men say us kee aavaaz sunee hai. ham nay dekh liya hai ki jab allaah insaan say hamkalaam hota hai to zarooree naheen ki vah mar jaaay. 25lekin ab ham kyoon apnee jaan khatray men daalen? agar ham mazeed rabb apnay khuda kee aavaaz sunen to yah badee aag hamen bhasm kar degee aur ham apnee jaan say haath dho baithengay. 26kyoonki faanee insaanon men say kaun hamaaree tarah zinda khuda ko aag men say baaten kartay huay sun kar zinda raha hai? koee bhee naheen! 27aap hee qareeb ja kar un tamaam baaton ko sunen jo rabb hamaara khuda hamen bataana chaahata hai. phir laut kar hamen vah baaten sunaaen. ham unhen sunengay aur un par amal karengay.”
28jab rabb nay yah suna to us nay mujh say kaha, “main nay in logon kee yah baaten sun lee hain. vah theek kahetay hain. 29kaash un kee soch hamesha aisee hee ho! kaash vah hamesha isee tarah mera khauf maanen aur meray ahkaam par amal karen! agar vah aisa karengay to vah aur un kee aulaad hamesha kaamyaab rahengay. 30ja, unhen bata day ki apnay khaimon men laut jaao. 31lekin too yahaan meray paas rah taaki main tujhay tamaam qavaaneen aur ahkaam day doon. un ko logon ko sikhaana taaki vah us mulk men un kay mutaabiq chalen jo main unhen doonga.”
32chunaanchay ehatiyaat say un ahkaam par amal karo jo rabb tumhaaray khuda nay tumhen diay hain. un say na daaen hato na baaen. 33hamesha us raah par chaltay raho jo rabb tumhaaray khuda nay tumhen bataaee hai. phir tum kaamyaab hogay aur us mulk men der tak jeetay rahogay jis par tum qabza karogay.