Istisna 4
faramaambardaaree kee ashadd zaroorat
1ai israaeel, ab vah tamaam ahkaam dhyaan say sun lay jo main tumhen sikhaata hoon. un par amal karo taaki tum zinda raho aur ja kar us mulk par qabza karo jo rabb tumhaaray baapdaada ka khuda tumhen denay vaala hai. 2jo ahkaam main tumhen sikhaata hoon un men na kisee baat ka izaafa karo aur na un say koee baat nikaalo. rabb apnay khuda kay tamaam ahkaam par amal karo jo main nay tumhen diay hain. 3tum nay khud dekha hai ki rabb nay baal-faghoor say kya kuchh kiya. vahaan rabb teray khuda nay har ek ko halaak kar daala jis nay faghoor kay baal devta kee pooja kee. 4lekin tum men say jitnay rabb apnay khuda kay saath liptay rahay vah sab aaj tak zinda hain.
5main nay tumhen tamaam ahkaam yoon sikha diay hain jis tarah rabb meray khuda nay mujhay bataaya. kyoonki laazim hai ki tum us mulk men in kay taabay raho jis par tum qabza karnay vaalay ho. 6inhen maano aur in par amal karo to doosree qaumon ko tumhaaree daanishmandee aur samajh nazar aaegee. phir vah in tamaam ahkaam kay baaray men sun kar kahengee, “vaah, yah azeem qaum kaisee daanishmand aur samajhdaar hai!” 7kaun see azeem qaum kay maabood itnay qareeb hain jitna hamaara khuda hamaaray qareeb hai? jab bhee ham madad kay liyay pukaartay hain to rabb hamaara khuda maujood hota hai. 8kaun see azeem qaum kay paas aisay munsifaana ahkaam aur hidaayaat hain jaisay main aaj tumhen pooree shareeat suna kar pesh kar raha hoon?
9lekin khabardaar, ehatiyaat karna aur vah tamaam baaten na bhoolna jo teree aankhon nay dekhee hain. vah umr bhar teray dil men say mit na jaaen balki unhen apnay bachchon aur potay-potiyon ko bhee bataatay rahena. 10vah din yaad kar jab too horib yaanee seena pahaad par rabb apnay khuda kay saamnay haazir tha aur us nay mujhay bataaya, “qaum ko yahaan meray paas jama kar taaki main un say baat karoon aur vah umr bhar mera khauf maanen aur apnay bachchon ko meree baaten sikhaatay rahen.”
11us vaqt tum qareeb a kar pahaad kay daaman men khaday huay. vah jal raha tha, aur us kee aag aasmaan tak bhadak rahee thee jabki kaalay baadlon aur gaheray andheray nay usay nazron say chhupa diya. 12phir rabb aag men say tum say hamkalaam hua. tum nay us kee baaten suneen lekin us kee koee shakl na dekhee. sirf us kee aavaaz sunaaee dee. 13us nay tumhaaray liyay apnay ahd yaanee un 10 ahkaam ka elaan kiya aur hukm diya ki in par amal karo. phir us nay unhen patthar kee do takhtiyon par likh diya. 14rabb nay mujhay hidaayat kee, “unhen vah tamaam ahkaam sikha jin kay mutaabiq unhen chalna hoga jab vah darya-ay-yardan ko paar karkay kan’aan par qabza karengay.”
butparastee kay baaray men aagaahee
15jab rabb horib yaanee seena pahaad par tum say hamkalaam hua to tum nay us kee koee shakl na dekhee. chunaanchay khabardaar raho 16ki tum ghalat kaam karkay apnay liyay kisee bhee shakl ka but na banaao. na mard, aurat, 17zameen par chalnay vaalay jaanvar, parinday, 18rengnay vaalay jaanvar ya machhlee ka but banaao. 19jab too aasmaan kee taraf nazar utha kar aasmaan ka poora lashkar dekhay to sooraj, chaand aur sitaaron kee parastish aur khidmat karnay kee aazmaaish men na padna. rabb teray khuda nay in cheezon ko baaqee tamaam qaumon ko ata kiya hai, 20lekin tumhen us nay misr kay bhadaktay bhattay say nikaala hai taaki tum us kee apnee qaum aur us kee meeraas ban jaao. aur aaj aisa hee hua hai.
21tumhaaray sabab say rabb nay mujh say naaraaz ho kar qasam khaaee ki too darya-ay-yardan ko paar karkay us achchhay mulk men daakhil naheen hoga jo rabb tera khuda tujhay meeraas men denay vaala hai. 22main yaheen isee mulk men mar jaaoonga aur darya-ay-yardan ko paar naheen karoonga. lekin tum darya ko paar karkay us behtareen mulk par qabza karogay. 23har soorat men vah ahd yaad rakhna jo rabb tumhaaray khuda nay tumhaaray saath baandha hai. apnay liyay kisee bhee cheez kee moorat na banaana. yah rabb ka hukm hai, 24kyoonki rabb tera khuda bhasm kar denay vaalee aag hai, vah ghayoor khuda hai.
25tum mulk men ja kar vahaan rahogay. tumhaaray bachchay aur potay-navaasay us men paida ho jaaengay. jab is tarah bahut vaqt guzar jaaega to khatra hai ki tum ghalat kaam karkay kisee cheez kee moorat banaao. aisa kabhee na karna. yah rabb tumhaaray khuda kee nazar men bura hai aur usay ghussa dilaaega. 26aaj aasmaan aur zameen meray gavaah hain ki agar tum aisa karo to jaldee say us mulk men say mit jaaogay jis par tum darya-ay-yardan ko paar karkay qabza karogay. tum der tak vahaan jeetay naheen rahogay balki pooray taur par halaak ho jaaogay. 27rabb tumhen mulk say nikaal kar mukhtalif qaumon men muntashir kar dega, aur vahaan sirf thoday hee afraad bachay rahengay. 28vahaan tum insaan kay haathon say banay huay lakdee aur patthar kay buton kee khidmat karogay, jo na dekh saktay, na sun saktay, na kha saktay aur na soongh saktay hain.
29vaheen too rabb apnay khuda ko talaash karega, aur agar usay pooray dil-o-jaan say dhoonday to vah tujhay mil bhee jaaega. 30jab too is takleef men mubtala hoga aur yah saara kuchh tujh par say guzrega phir aakhirkaar rabb apnay khuda kee taraf rujoo karkay us kee sunega. 31kyoonki rabb tera khuda raheem khuda hai. vah tujhay na tark karega aur na barbaad karega. vah us ahd ko naheen bhoolega jo us nay qasam kha kar teray baapdaada say baandha tha.
rabb hee hamaara khuda hai
32duniya men insaan kee takhleeq say lay kar aaj tak maazee kee tafteesh kar. aasmaan kay ek siray say doosray siray tak khoj laga. kya is say pahelay kabhee is tarah ka mojizaana kaam hua hai? kya kisee nay is say pahelay is qism kay azeem kaam kee khabar sunee hai? 33too nay aag men say boltee huee allaah kee aavaaz sunee to bhee jeeta bacha! kya kisee aur qaum kay saath aisa hua hai? 34kya kisee aur maabood nay kabhee jur’at kee hai ki rabb kee tarah pooree qaum ko ek mulk say nikaal kar apnee milkiyat banaaya ho? us nay aisa hee tumhaaray saath kiya. us nay tumhaaray dekhtay dekhtay misriyon ko aazmaaya, unhen baday mojizay dikhaaay, un kay saath jang kee, apnee badee qudrat aur ikhtiyaar ka izhaar kiya aur haulnaak kaamon say un par ghaalib a gaya.
35tujhay yah sab kuchh dikhaaya gaya taaki too jaan lay ki rabb khuda hai. us kay siva koee aur naheen hai. 36us nay tujhay naseehat denay kay liyay aasmaan say apnee aavaaz sunaaee. zameen par us nay tujhay apnee azeem aag dikhaaee jis men say too nay us kee baaten suneen. 37usay teray baapdaada say piyaar tha, aur us nay tujhay jo un kee aulaad hain chun liya. is liyay vah khud haazir ho kar apnee azeem qudrat say tujhay misr say nikaal laaya. 38us nay teray aagay say tujh say ziyaada badee aur taaqatvar qaumen nikaal deen taaki tujhay un ka mulk meeraas men mil jaaay. aaj aisa hee ho raha hai.
39chunaanchay aaj jaan lay aur zahen men rakh ki rabb aasmaan aur zameen ka khuda hai. koee aur maabood naheen hai. 40us kay ahkaam par amal kar jo main tujhay aaj suna raha hoon. phir too aur teree aulaad kaamyaab hongay, aur too der tak us mulk men jeeta rahega jo rabb tujhay hamesha kay liyay day raha hai.
yardan kay mashriq men panaah kay shaher
41yah kah kar moosa nay darya-ay-yardan kay mashriq men panaah kay teen shaher chun liyay. 42un men vah shakhs panaah lay sakta tha jis nay dushmanee kee bina par naheen balki ghairiraadee taur par kisee ko jaan say maar diya tha. aisay shaher men panaah lenay kay sabab say usay badlay men qatl naheen kiya ja sakta tha. 43is kay liyay roobin kay qabeelay kay liyay maidaan-ay-murtafa ka shaher basar, jad kay qabeelay kay liyay jiliaad ka shaher raamaat aur manassee kay qabeelay kay liyay basan ka shaher jaulaan chuna gaya.
shareeat ka peshlafz
44darj-ay-zail vah shareeat hai jo moosa nay israaeeliyon ko pesh kee. 45moosa nay yah ahkaam aur hidaayaat us vaqt pesh keen jab vah misr say nikal kar 46darya-ay-yardan kay mashriqee kinaaray par thay. bait-faghoor un kay muqaabil tha, aur vah amoree baadshaah seehon kay mulk men khaimaazan thay. seehon kee rihaaish hasbon men thee aur usay israaeeliyon say shikast huee thee jab vah moosa kee raahanumaaee men misr say nikal aaay thay. 47us kay mulk par qabza karkay unhon nay basan kay mulk par bhee fatah paaee thee jis ka baadshaah oj tha. in donon amoree baadshaahon ka yah poora ilaaqa un kay haath men a gaya tha. yah ilaaqa darya-ay-yardan kay mashriq men tha. 48us kee junoobee sarhadd darya-ay-arnon kay kinaaray par vaaqay shaher aroeer thee jabki us kee shimaalee sarhadd siryoon yaanee harmoon pahaad thee. 49darya-ay-yardan ka poora mashriqee kinaara pisga kay pahaadee silsilay kay daaman men vaaqay baheera-ay-murdaar tak us men shaamil tha.