Istisna 34

moosa kee vafaat

¹yah barkat day kar moosa moaab ka maidaanee ilaaqa chhod kar yareehoo kay muqaabil naboo pahaad par chadh gaya. naboo pisga kay pahaadee silsilay kee ek chotee tha. vahaan say rabb nay usay vah poora mulk dikhaaya jo vah israaeel ko denay vaala tha yaanee jiliaad kay ilaaqay say lay kar daan kay ilaaqay tak, ²naftaalee ka poora ilaaqa, ifraaeem aur manassee ka ilaaqa, yahoodaah ka ilaaqa baheera-ay-room tak, ³junoob men dasht-ay-najab aur khajoor kay shaher yareehoo kee vaadee say lay kar zughar tak. ⁴rabb nay us say kaha, “yah vah mulk hai jis ka vaada main nay qasam kha kar ibraaheem, ishaaq aur yaaqoob say kiya. main nay un say kaha tha ki un kee aulaad ko yah mulk milega. too us men daakhil naheen hoga, lekin main tujhay yahaan lay aaya hoon taaki too usay apnee aankhon say dekh sakay.”

⁵is kay baad rabb ka khaadim moosa vaheen moaab kay mulk men faut hua, bilkul usee tarah jis tarah rabb nay kaha tha. ⁶rabb nay usay bait-faghoor kee kisee vaadee men dafan kiya, lekin aaj tak kisee ko bhee maaloom naheen ki us kee qabr kahaan hai.

⁷apnee vafaat kay vaqt moosa 120 saal ka tha. aakhir tak na us kee aankhen dhundalaaeen, na us kee taaqat kam huee. ⁸israaeeliyon nay moaab kay maidaanee ilaaqay men 30 din tak us ka maatam kiya.

⁹phir yashooa bin noon moosa kee jagah khada hua. vah hikmat kee rooh say maamoor tha, kyoonki moosa nay apnay haath us par rakh diay thay. israaeeliyon nay us kee sunee aur vah kuchh kiya jo rabb nay unhen moosa kee maarifat bataaya tha.

¹⁰is kay baad israaeel men moosa jaisa nabee kabhee na utha jis say rabb roo-ba-roo baat karta tha. ¹¹kisee aur nabee nay aisay ilaahee nishaan aur mojizay naheen kiay jaisay moosa nay firaaun baadshaah, us kay mulaazimon aur pooray mulk kay saamnay kiay jab rabb nay usay misr bheja. ¹²kisee aur nabee nay is qism ka bada ikhtiyaar na dikhaaya, na aisay azeem aur haibtanaak kaam kiay jaisay moosa nay israaeeliyon kay saamnay kiay.