Istisna 32
moosa ka geet
1ai aasmaan, meree baat par ghaur kar! ai zameen, mera geet sun!
2meree taaleem boonda-baandee jaisee ho, meree baat shabnam kee tarah zameen par pad jaaay. vah baarish kee maanind ho jo hariyaalee par barastee hai.
3main rabb ka naam pukaaroonga. hamaaray khuda kee azmat kee tamjeed karo!
4vah chataan hai, aur us ka kaam kaamil hai. us kee tamaam raahen raast hain. vah vafaadaar khuda hai jis men fareb naheen hai balki jo aadil aur diyaanatdaar hai.
5ek tedhee aur kajrau nasal nay us ka gunaah kiya. vah us kay farzand naheen balki daagh saabit huay hain.
6ai meree ahemaq aur besamajh qaum, kya tumhaara rabb say aisa ravayya theek hai? vah to tumhaara baap aur khaaliq hai, jis nay tumhen banaaya aur qaaim kiya.
7qadeem zamaanay ko yaad karna, maazee kee naslon par tavajjuh dena. apnay baap say poochhna to vah tujhay bata dega, apnay buzurgon say pata karna to vah tujhay ittila dengay.
8jab allaah t’aala nay har qaum ko us ka apna apna mauroosee ilaaqa day kar tamaam insaanon ko mukhtalif gurohon men alag kar diya to us nay qaumon kee sarhadden israaeeliyon kee taadaad kay mutaabiq muqarrar keen.
9kyoonki rabb ka hissa us kee qaum hai, yaaqoob ko us nay meeraas men paaya hai.
10yah qaum usay registaan men mil gaee, veeraan-o-sunsaan biyaabaan men jahaan chaaron taraf haulnaak aavaazen goonjtee theen. us nay usay gher kar us kee dekh-bhaal kee, usay apnee aankh kee putlee kee tarah bachaaay rakha.
11jab uqaab apnay bachchon ko udna sikhaata hai to vah unhen ghonslay say nikaal kar un kay saath udta hai. agar vah gir bhee jaaen to vah haazir hai aur un kay neechay apnay paron ko phaila kar unhen zameen say takra jaanay say bachaata hai. rabb ka israaeel kay saath yahee sulook tha.
12rabb nay akelay hee us kee raahanumaaee kee. kisee ajnabee maabood nay shirkat na kee.
13us nay usay rath par savaar karkay mulk kee bulandiyon par say guzarnay diya aur usay khet ka phal khila kar usay chataan say shahed aur sakht patthar say zaitoon ka tel muhayya kiya. [a] lafzee tarjuma : choosnay diya.
14us nay usay gaay kee lassee aur bhed-bakree ka doodh cheeda bhed kay bachchon samet khilaaya aur usay basan kay motay-taazay mendhay, bakray aur behtareen anaaj ata kiya. us vaqt too aala angoor kee umda mai say lutf’andoz hua.
15lekin jab yasooroon [b] yaanee israaeel. mota ho gaya to vah dolattiyaan jhaadnay laga. jab vah halaq tak bhar kar tanomand aur farba hua to us nay apnay khuda aur khaaliq ko radd kiya, us nay apnee najaat kee chataan ko haqeer jaana.
16apnay ajnabee maaboodon say unhon nay us kee ghairat ko josh dilaaya, apnay ghinaunay buton say usay ghussa dilaaya.
17unhon nay badroohon ko qurbaaniyaan pesh keen jo khuda naheen hain, aisay maaboodon ko jin say na vah aur na un kay baapdaada vaaqif thay, kyoonki vah thodee der pahelay vujood men aaay thay.
18too vah chataan bhool gaya jis nay tujhay paida kiya, vahee khuda jis nay tujhay janm diya.
19rabb nay yah dekh kar unhen radd kiya, kyoonki vah apnay betay-betiyon say naaraaz tha.
20us nay kaha, “main apna chihara un say chhupa loonga. phir pata lagega ki meray baghair un ka kya anjaam hota hai. kyoonki vah saraasar bigad gaay hain, un men vafaadaaree paaee naheen jaatee.
21unhon nay us kee parastish say jo khuda naheen hai meree ghairat ko josh dilaaya, apnay bekaar buton say mujhay ghussa dilaaya hai. chunaanchay main khud hee unhen ghairat dilaaoonga, ek aisee qaum kay zareeay jo haqeeqat men qaum naheen hai. ek naadaan qaum kay zareeay main unhen ghussa dilaaoonga.
22kyoonki meray ghussay say aag bhadak uthee hai jo paataal kee tah tak pahunchegee aur zameen aur us kee paidaavaar hadap karkay pahaadon kee bunyaadon ko jala degee.
23main un par museebat par museebat aanay doonga aur apnay tamaam teer un par chalaaoonga.
24bhook kay maaray un kee taaqat jaatee rahegee, aur vah bukhaar aur vabaaee amraaz ka luqma banengay. main un kay khilaaf phaadnay vaalay jaanvar aur zahereelay saamp bhej doonga.
25baahar talvaar unhen beaulaad kar degee, aur ghar men dahshat phail jaaegee. sheerakhwaar bachchay, naujavaan ladkay-ladkiyaan aur buzurg sab us kee girift men a jaaengay.
26mujhay kahena chaahiay tha ki main unhen chikna-choor karkay insaanon men say un ka naam-o-nishaan mita doonga.
27lekin andesha tha ki dushman ghalat matlab nikaal kar kahay, ‘ham khud un par ghaalib aaay, is men rabb ka haath naheen hai’.”
28kyoonki yah qaum besamajh aur hikmat say khaalee hai.
29kaash vah daanishmand ho kar yah baat samjhen! kaash vah jaan len ki un ka kya anjaam hai.
30kyoonki dushman ka ek aadmee kis tarah hazaar israaeeliyon ka taaqqub kar sakta hai? us kay do mard kis tarah das hazaar israaeeliyon ko bhaga saktay hain? vajah sirf yah hai ki un kee chataan nay unhen dushman kay haath bech diya. rabb nay khud unhen dushman kay qabzay men kar diya.
31hamaaray dushman khud maantay hain ki israaeel kee chataan hamaaree chataan jaisee naheen hai.
32un kee bel to sadoom kee bel aur amoora kay baagh say hai, un kay angoor zahereelay aur un kay guchchhay kadvay hain.
33un kee mai saampon ka muhalak zaher hai.
34rabb farmaata hai, “kya main nay in baaton par muhar laga kar unhen apnay khazaanay men mahfooz naheen rakha?
35intiqaam lena mera hee kaam hai, main hee badla loonga. ek vaqt aaega ki un ka paaon phislega. kyoonki un kee tabaahee ka din qareeb hai, un ka anjaam jald hee aanay vaala hai.”
36yaqeenan rabb apnee qaum ka insaaf karega. vah apnay khaadimon par taras khaaega jab dekhega ki un kee taaqat jaatee rahee hai aur koee naheen bacha.
37us vaqt vah poochhega, “ab un kay devta kahaan hain, vah chataan jis kee panaah unhon nay lee?
38vah devta kahaan hain jinhon nay un kay behtareen jaanvar khaaay aur un kee mai kee nazren pee leen. vah tumhaaree madad kay liyay uthen aur tumhen panaah den.
39ab jaan lo ki main aur sirf main khuda hoon. meray siva koee aur khuda naheen hai. main hee halaak karta aur main hee zinda kar deta hoon. main hee zakhmee karta aur main hee shifa deta hoon. koee meray haath say naheen bacha sakta.
40main apna haath aasmaan kee taraf utha kar elaan karta hoon ki meree abdee hayaat kee qasam,
41jab main apnee chamaktee huee talvaar ko tez karkay adaalat kay liyay pakad loonga to apnay mukhaalifon say intiqaam aur apnay nafrat karnay vaalon say badla loonga.
42meray teer khoon pee pee kar nashay men dhut ho jaaengay, meree talvaar maqtoolon aur qaidiyon kay khoon aur dushman kay sardaaron kay saron say ser ho jaaegee.”
43ai deegar qaumo, us kee ummat kay saath khushee manaao! kyoonki vah apnay khaadimon kay khoon ka intiqaam lega. vah apnay mukhaalifon say badla lay kar apnay mulk aur qaum ka kaffaara dega.
44moosa aur yashooa bin noon nay a kar israaeeliyon ko yah poora geet sunaaya. 45-46 phir moosa nay un say kaha, “aaj main nay tumhen in tamaam baaton say aagaah kiya hai. laazim hai ki vah tumhaaray dilon men baith jaaen. apnee aulaad ko bhee hukm do ki ehatiyaat say is shareeat kee tamaam baaton par amal karay. 47yah khaalee baaten naheen balki tumhaaree zindagee ka sarchashma hain. in kay mutaabiq chalnay kay baais tum der tak us mulk men jeetay rahogay jis par tum darya-ay-yardan ko paar karkay qabza karnay vaalay ho.”
moosa ka naboo pahaad par intiqaal
48usee din rabb nay moosa say kaha, 49“pahaadee silsilay abaareem kay pahaad naboo par chadh ja jo yareehoo kay saamnay lekin yardan kay mashriqee kinaaray par yaanee moaab kay mulk men hai. vahaan say kan’aan par nazar daal, us mulk par jo main israaeeliyon ko day raha hoon. 50is kay baad too vahaan mar kar apnay baapdaada say ja milega, bilkul usee tarah jis tarah tera bhaaee haaroon hor pahaad par mar kar apnay baapdaada say ja mila hai. 51kyoonki tum donon israaeeliyon kay roo-ba-roo bevafa huay. jab tum dasht-ay-seen men qaadis kay qareeb thay aur mareeba kay chashmay par israaeeliyon kay saamnay khaday thay to tum nay meree quddoosiyat qaaim na rakhee. 52is sabab say too vah mulk sirf door say dekhega jo main israaeeliyon ko day raha hoon. too khud us men daakhil naheen hoga.”