Istisna 31

yashooa ko moosa kee jagah muqarrar kiya jaata hai

¹moosa nay ja kar tamaam israaeeliyon say mazeed kaha,

²“ab main 120 saal ka ho chuka hoon. mera chalna phirna mushkil ho gaya hai. aur vaisay bhee rabb nay mujhay bataaya hai, ‘too darya-ay-yardan ko paar naheen karega.’ ³rabb tera khuda khud teray aagay aagay ja kar yardan ko paar karega. vahee teray aagay aagay in qaumon ko tabaah karega taaki too un kay mulk par qabza kar sakay. darya ko paar kartay vaqt yashooa teray aagay chalega jis tarah rabb nay farmaaya hai. ⁴rabb vahaan kay logon ko bilkul usee tarah tabaah karega jis tarah vah amoriyon ko un kay baadshaahon seehon aur oj samet tabaah kar chuka hai. ⁵rabb tumhen un par ghaalib aanay dega. us vaqt tumhen un kay saath vaisa sulook karna hai jaisa main nay tumhen bataaya hai. ⁶mazboot aur diler ho. un say khauf na khaao, kyoonki rabb tera khuda teray saath chalta hai. vah tujhay kabhee naheen chhodega, tujhay kabhee tark naheen karega.”

⁷is kay baad moosa nay tamaam israaeeliyon kay saamnay yashooa ko bulaaya aur us say kaha, “mazboot aur diler ho, kyoonki too is qaum ko us mulk men lay jaaega jis ka vaada rabb nay qasam kha kar un kay baapdaada say kiya tha. laazim hai ki too hee usay taqseem karkay har qabeelay ko us ka mauroosee ilaaqa day. ⁸rabb khud teray aagay aagay chaltay huay teray saath hoga. vah tujhay kabhee naheen chhodega, tujhay kabhee naheen tark karega. khauf na khaana, na ghabraana.”

har saat saal kay baad shareeat kee tilaavat

⁹moosa nay yah pooree shareeat likh kar israaeel kay tamaam buzurgon aur laavee kay qabeelay kay un imaamon kay sapurd kee jo safar kartay vaqt ahd ka sandooq utha kar lay chaltay thay. us nay un say kaha, ^10-11 “har saat saal kay baad is shareeat kee tilaavat karna, yaanee bahaalee kay saal men jab tamaam qarz mansookh kiay jaatay hain. tilaavat us vaqt karna hai jab israaeelee jhompadiyon kee eed kay liyay rabb apnay khuda kay saamnay us jagah haazir hongay jo vah maqdis kay liyay chunega. ¹²tamaam logon ko mardon, aurton, bachchon aur pardesiyon samet vahaan jama karna taaki vah sun kar seekhen, rabb tumhaaray khuda ka khauf maanen aur ehatiyaat say is shareeat kee baaton par amal karen. ¹³laazim hai ki un kee aulaad jo is shareeat say naavaaqif hai isay sunay aur seekhay taaki umr bhar us mulk men rabb tumhaaray khuda ka khauf maanay jis par tum darya-ay-yardan ko paar karkay qabza karogay.”

rabb moosa ko aakhiree hidaayaat deta hai

¹⁴rabb nay moosa say kaha, “ab teree maut qareeb hai. yashooa ko bula kar us kay saath mulaaqaat kay khaimay men haazir ho ja. vahaan main usay us kee zimmaadaariyaan saumpoonga.”

moosa aur yashooa a kar khaimay men haazir hue ¹⁵to rabb khaimay kay darvaazay par baadal kay satoon men zaahir hua. ¹⁶us nay moosa say kaha, “too jald hee mar kar apnay baapdaada say ja milega. lekin yah qaum mulk men daakhil honay par zina karkay us kay ajnabee devtaaon kee pairvee karnay lag jaaegee. vah mujhay tark karkay vah ahd tod degee jo main nay un kay saath baandha hai. ¹⁷phir mera ghazab un par bhadkega. main unhen chhod kar apna chihara un say chhupa loonga. tab unhen kachcha chaba liya jaaega aur bahut saaree haibtanaak museebaten un par aaengee . us vaqt vah kahengay, ‘kya yah museebaten is vajah say ham par naheen aaeen ki rabb hamaaray saath naheen hai?’ ¹⁸aur aisa hee hoga. main zaroor apna chihara un say chhupaaay rakhoonga, kyoonki deegar maaboodon kay peechhay chalnay say unhon nay ek nihaayat shareer qadam uthaaya hoga.

¹⁹ab zail ka geet likh kar israaeeliyon ko yoon sikhaao ki vah zabaanee yaad rahay aur meray liyay un kay khilaaf gavaahee diya karay. ²⁰kyoonki main unhen us mulk men lay ja raha hoon jis ka vaada main nay qasam kha kar un kay baapdaada say kiya tha, us mulk men jis men doodh aur shahed kee kasrat hai. vahaan itnee khuraak hogee ki un kee bhook jaatee rahegee aur vah motay ho jaaengay. lekin phir vah deegar maaboodon kay peechhay lag jaaengay aur un kee khidmat karengay. vah mujhay radd karengay aur mera ahd todengay. ²¹nateejay men un par bahut saaree haibtanaak museebaten aaengee . phir yah geet jo un kee aulaad ko yaad rahega un kay khilaaf gavaahee dega. kyoonki go main unhen us mulk men lay ja raha hoon jis ka vaada main nay qasam kha kar un say kiya tha to bhee main jaanta hoon ki vah ab tak kis tarah kee soch rakhtay hain.”

²²moosa nay usee din yah geet likh kar israaeeliyon ko sikhaaya.

²³phir rabb nay yashooa bin noon say kaha, “mazboot aur diler ho, kyoonki too israaeeliyon ko us mulk men lay jaaega jis ka vaada main nay qasam kha kar un say kiya tha. main khud teray saath hoonga.”

²⁴jab moosa nay pooree shareeat ko kitaab men likh liyaa ²⁵to vah un laaviyon say mukhaatib hua jo safar kartay vaqt ahd ka sandooq utha kar lay jaatay thay. ²⁶“shareeat kee yah kitaab lay kar rabb apnay khuda kay ahd kay sandooq kay paas rakhna. vahaan vah padee rahay aur teray khilaaf gavaahee detee rahay. ²⁷kyoonki main khoob jaanta hoon ki too kitna sarkash aur hatdharm hai. meree maujoodgee men bhee tum nay kitnee dafa rabb say sarkashee kee. to phir meray marnay kay baad tum kya kuchh naheen karogay! ²⁸ab meray saamnay apnay qabeelon kay tamaam buzurgon aur nigahbaanon ko jama karo taaki vah khud meree yah baaten sunen aur aasmaan aur zameen un kay khilaaf gavaah hon. ²⁹kyoonki mujhay maaloom hai ki meree maut kay baad tum zaroor bigad jaaogay aur us raastay say hat jaaogay jis par chalnay kee main nay tumhen taakeed kee hai. aakhirkaar tum par museebat aaegee, kyoonki tum vah kuchh karogay jo rabb ko bura lagta hai, tum apnay haathon kay kaam say usay ghussa dilaaogay.”

³⁰phir moosa nay israaeel kee tamaam jamaaat kay saamnay yah geet shuroo say lay kar aakhir tak pesh kiyaa