Istisna 30

tauba kay musbat nateeje

¹main nay tujhay bataaya hai ki teray liyay kya kuchh barkat ka aur kya kuchh laanat ka baais hai. jab rabb tera khuda tujhay teree ghalat harkaton kay sabab say mukhtalif qaumon men muntashir kar dega to too meree baaten maan jaaega. ²tab too aur teree aulaad rabb apnay khuda kay paas vaapas aaengay aur pooray dil-o-jaan say us kee sun kar un tamaam ahkaam par amal karengay jo main aaj tujhay day raha hoon. ³phir rabb tera khuda tujhay bahaal karega aur tujh par rahem karkay tujhay un tamaam qaumon say nikaal kar jama karega jin men us nay tujhay muntashir kar diya tha. ⁴haan, rabb tera khuda tujhay har jagah say jama karkay vaapas laaega, chaahay too sab say door mulk men kyoon na pada ho. ⁵vah tujhay teray baapdaada kay mulk men laaega, aur too us par qabza karega. phir vah tujhay teray baapdaada say ziyaada kaamyaabee bakhshega, aur teree taadaad ziyaada badhaaega.

⁶khatna rabb kee qaum ka zaahiree nishaan hai. lekin us vaqt rabb tera khuda teray aur teree aulaad ka baatinee khatna karega taaki too usay pooray dil-o-jaan say piyaar karay aur jeeta rahay. ⁷jo laanten rabb tera khuda tujh par laaya tha unhen vah ab teray dushmanon par aanay dega, un par jo tujh say nafrat rakhtay aur tujhay eeza pahunchaatay hain. ⁸kyoonki too dubaara rabb kee sunega aur us kay tamaam ahkaam kee pairvee karega jo main tujhay aaj day raha hoon. ⁹jo kuchh bhee too karega us men rabb tujhay badee kaamyaabee bakhshega, aur tujhay kasrat kee aulaad, maveshee aur faslen haasil hongee. kyoonki jis tarah vah teray baapdaada ko kaamyaabee denay men khushee mahsoos karta tha usee tarah vah tujhay bhee kaamyaabee denay men khushee mahsoos karega.

¹⁰shart sirf yah hai ki too rabb apnay khuda kee sunay, shareeat men darj us kay ahkaam par amal karay aur pooray dil-o-jaan say us kee taraf rujoo laaay.

¹¹jo ahkaam main aaj tujhay day raha hoon na vah hadd say ziyaada mushkil hain, na teree pahunch say baahar. ¹²vah aasmaan par naheen hain ki too kahay, ‘kaun aasmaan par chadh kar hamaaray liyay yah ahkaam neechay lay aaay taaki ham unhen sun saken aur un par amal kar saken?’ ¹³vah samundar kay paar bhee naheen hain ki too kahay, ‘kaun samundar ko paar karkay hamaaray liyay yah ahkaam laaega taaki ham unhen sun saken aur un par amal kar saken?’ ¹⁴kyoonki yah kalaam teray nihaayat qareeb balki teray munh aur dil men maujood hai. chunaanchay us par amal karnay men koee bhee rukaavat naheen hai.

zindagee ya maut ka chunaao

¹⁵dekh, aaj main tujhay do raastay pesh karta hoon. ek zindagee aur khushhaalee kee taraf lay jaata hai jabki doosra maut aur halaakat kee taraf. ¹⁶aaj main tujhay hukm deta hoon ki rabb apnay khuda ko piyaar kar, us kee raahon par chal aur us kay ahkaam kay taabay rah. phir too zinda rah kar taraqqee karega, aur rabb tera khuda tujhay us mulk men barkat dega jis men too daakhil honay vaala hai.

¹⁷lekin agar tera dil is raastay say hat kar naafarmaanee karay to barkat kee tavaqqo na kar. agar too aazmaaish men pad kar deegar maaboodon ko sijda aur un kee khidmat kare ¹⁸to tum zaroor tabaah ho jaaogay. aaj main elaan karta hoon ki is soorat men tum ziyaada der us mulk men aabaad naheen rahogay jis men too darya-ay-yardan ko paar karkay daakhil hoga taaki us par qabza karay.

¹⁹aaj aasmaan aur zameen tumhaaray khilaaf meray gavaah hain ki main nay tumhen zindagee aur barkaton ka raasta aur maut aur laanton ka raasta pesh kiya hai. ab zindagee ka raasta ikhtiyaar kar taaki too aur teree aulaad zinda rahay. ²⁰rabb apnay khuda ko piyaar kar, us kee sun aur us say lipta rah. kyoonki vahee teree zindagee hai aur vahee karega ki too der tak us mulk men jeeta rahega jis ka vaada us nay qasam kha kar teray baapdaada ibraaheem, ishaaq aur yaaqoob say kiya tha.”