Istisna 3

basan kay baadshaah oj kee shikast

¹is kay baad ham shimaal men basan kee taraf badh gaay. basan ka baadshaah oj apnee tamaam fauj kay saath nikal kar hamaara muqaabla karnay kay liyay idraee aaya. ²rabb nay mujh say kaha, “us say mat dar. main usay, us kee pooree fauj aur us ka mulk teray havaalay kar chuka hoon. us kay saath vah kuchh kar jo too nay amoree baadshaah seehon kay saath kiya jo hasbon men hukoomat karta tha.”

³aisa hee hua. rabb hamaaray khuda kee madad say ham nay basan kay baadshaah oj aur us kee tamaam qaum ko shikast dee. ham nay sab ko halaak kar diya. koee bhee na bacha. ⁴usee vaqt ham nay us kay tamaam shaheron par qabza kar liya. ham nay kul 60 shaheron par yaanee arjoob kay saaray ilaaqay par qabza kiya jis par oj kee hukoomat thee. ⁵in tamaam shaheron kee hifaazat oonchee oonchee faseelon aur kunday vaalay darvaazon say kee gaee thee. deehaat men bahut see aisee aabaadiyaan bhee mil gaeen jin kee faseelen naheen theen. ⁶ham nay un kay saath vah kuchh kiya jo ham nay hasbon kay baadshaah seehon kay ilaaqay kay saath kiya tha. ham nay sab kuchh rabb kay havaalay karkay har shaher ko aur tamaam mardon, aurton aur bachchon ko halaak kar daala. ⁷ham nay sirf tamaam maveshee aur shaheron ka loota hua maal apnay liyay bachaaay rakha.

⁸yoon ham nay us vaqt amoriyon kay in do baadshaahon say darya-ay-yardan ka mashriqee ilaaqa vaadee-ay-arnon say lay kar harmoon pahaad tak chheen liya. ⁹(saida kay baashinday harmoon ko siryoon kahetay hain jabki amoriyon nay us ka naam saneer rakha). ¹⁰ham nay oj baadshaah kay pooray ilaaqay par qabza kar liya. is men maidaan-ay-murtafa kay tamaam shaher shaamil thay, neez salka aur idraee tak jiliaad aur basan kay pooray ilaaqay.

¹¹baadshaah oj deo qabeelay rafaaee ka aakhiree mard tha. us ka lohay ka taaboot 13 say zaaid fut lamba aur chhah fut chauda tha aur aaj tak ammoniyon kay shaher raba men dekha ja sakta hai.

yardan kay mashriq men mulk kee taqseem

¹²jab ham nay darya-ay-yardan kay mashriqee ilaaqay par qabza kiya to main nay roobin aur jad kay qabeelon ko us ka junoobee hissa shaheron samet diya. is ilaaqay kee junoobee sarhadd darya-ay-arnon par vaaqay shaher aroeer hai jabki shimaal men is men jiliaad kay pahaadee ilaaqay ka aadha hissa bhee shaamil hai. ¹³jiliaad ka shimaalee hissa aur basan ka mulk main nay manassee kay aadhay qabeelay ko diya.

(basan men arjoob ka ilaaqa hai jahaan pahelay oj baadshaah kee hukoomat thee aur jo rafaaiyon yaanee deon ka mulk kahelaata tha. ¹⁴manassee kay qabeelay kay ek aadmee banaam yaaeer nay arjoob par jasooriyon aur maakaatiyon kee sarhadd tak qabza kar liya tha. us nay is ilaaqay kee bastiyon ko apna naam diya. aaj tak yahee naam havvot-yaaeer yaanee yaaeer kee bastiyaan chalta hai.)

¹⁵main nay jiliaad ka shimaalee hissa manassee kay kumbay makeer ko diyaa ¹⁶lekin jiliaad ka junoobee hissa roobin aur jad kay qabeelon ko diya. is hissay kee ek sarhadd junoob men vaadee-ay-arnon kay beech men say guzartee hai jabki doosree sarhadd darya-ay-yabboq hai jis kay paar ammoniyon kee hukoomat hai. ¹⁷us kee maghribee sarhadd darya-ay-yardan hai yaanee kinnarat (galeel) kee jheel say lay kar baheera-ay-murdaar tak jo pisga kay pahaadee silsilay kay daaman men hai.

¹⁸us vaqt main nay roobin, jad aur manassee kay qabeelon say kaha, “rabb tumhaaray khuda nay tumhen meeraas men yah mulk day diya hai. lekin shart yah hai ki tumhaaray tamaam jang karnay kay qaabil mard musallah ho kar tumhaaray israaeelee bhaaiyon kay aagay aagay darya-ay-yardan ko paar karen. ¹⁹sirf tumhaaree aurten aur bachchay peechhay rah kar un shaheron men intizaar kar saktay hain jo main nay tumhaaray liyay muqarrar kiay hain. tum apnay maveshiyon ko bhee peechhay chhod saktay ho, kyoonki mujhay pata hai ki tumhaaray bahut ziyaada jaanvar hain. ²⁰apnay bhaaiyon kay saath chaltay huay un kee madad kartay raho. jab rabb tumhaara khuda unhen darya-ay-yardan kay maghrib men vaaqay mulk dega aur vah tumhaaree tarah aaraam aur sukoon say vahaan aabaad ho jaaengay tab tum apnay mulk men vaapas ja saktay ho.”

moosa ko yardan paar karnay kee ijaazat naheen miltee

²¹saath saath main nay yashooa say kaha, “too nay apnee aankhon say sab kuchh dekh liya hai jo rabb tumhaaray khuda nay in donon baadshaahon seehon aur oj say kiya. vah yahee kuchh har us baadshaah kay saath karega jis kay mulk par too darya ko paar karkay hamla karega. ²²un say na daro. tumhaara khuda khud tumhaaray liyay jang karega.”

²³us vaqt main nay rabb say iltija karkay kaha, ²⁴“ai rabb qaadir-ay-mutlaq, too apnay khaadim ko apnee azmat aur qudrat dikhaanay laga hai. kya aasmaan ya zameen par koee aur khuda hai jo teree tarah kay azeem kaam kar sakta hai? hargiz naheen! ²⁵meharbaanee karkay mujhay bhee darya-ay-yardan ko paar karkay us achchhay mulk yaanee us behtareen pahaadee ilaaqay ko lubnaan tak dekhnay kee ijaazat day.”

²⁶lekin tumhaaray sabab say rabb mujh say naaraaz tha. us nay meree na sunee balki kaha, “bas kar! aainda meray saath is ka zikr na karna. ²⁷pisga kee chotee par chadh kar chaaron taraf nazar dauda. vahaan say ghaur say dekh, kyoonki too khud darya-ay-yardan ko uboor naheen karega. ²⁸apnee jagah yashooa ko muqarrar kar. us kee hausalaaafzaaee kar aur usay mazboot kar, kyoonki vahee is qaum ko darya-ay-yardan kay maghrib men lay jaaega aur qabeelon men us mulk ko taqseem karega jisay too pahaad say dekhega.”

²⁹chunaanchay ham bait-faghoor kay qareeb vaadee men thaheray.