Istisna 29
moaab men rabb kay saath naya ahd
1jab israaeelee moaab men thay to rabb nay moosa ko hukm diya ki israaeeliyon kay saath ek aur ahd baandhay. yah us ahd kay ilaava tha jo rabb horib yaanee seena par un kay saath baandh chuka tha. 2is silsilay men moosa nay tamaam israaeeliyon ko bula kar kaha, “tum nay khud dekha ki rabb nay misr kay baadshaah firaaun, us kay mulaazimon aur pooray mulk kay saath kya kuchh kiya. 3tum nay apnee aankhon say vah badee aazmaaishen, ilaahee nishaan aur mojizay dekhay jin kay zareeay rabb nay apnee qudrat ka izhaar kiya.
4magar afsos, aaj tak rabb nay tumhen na samajhdaar dil ata kiya, na aankhen jo dekh saken ya kaan jo sun saken. 5registaan men main nay 40 saal tak tumhaaree raahanumaaee kee. is dauraan na tumhaaray kapday phatay aur na tumhaaray jootay ghisay. 6na tumhaaray paas rotee thee, na mai ya mai jaisee koee aur cheez. to bhee rabb nay tumhaaree zarooriyaat pooree keen taaki tum seekh lo ki vahee rabb tumhaara khuda hai.
7phir ham yahaan aaay to hasbon ka baadshaah seehon aur basan ka baadshaah oj nikal kar ham say ladnay aaay. lekin ham nay unhen shikast dee. 8un kay mulk par qabza karkay ham nay usay roobin, jad aur manassee kay aadhay qabeelay ko meeraas men diya. 9ab ehatiyaat say is ahd kee tamaam sharaait pooree karo taaki tum har baat men kaamyaab ho.
10is vaqt tum sab rabb apnay khuda kay huzoor khaday ho, tumhaaray qabeelon kay sardaar, tumhaaray buzurg, nigahbaan, mard, 11aurten aur bachchay. teray darmiyaan rahenay vaalay pardesee bhee lakkadahaaron say lay kar paanee bharnay vaalon tak teray saath yahaan haazir hain. 12too is liyay yahaan jama hua hai ki rabb apnay khuda ka vah ahd tasleem karay jo vah aaj qasam kha kar teray saath baandh raha hai. 13is say vah aaj is kee tasdeeq kar raha hai ki too us kee qaum aur vah tera khuda hai yaanee vahee baat jis ka vaada us nay tujh say aur teray baapdaada ibraaheem, ishaaq aur yaaqoob say kiya tha. 14-15 lekin main yah ahd qasam kha kar na sirf tumhaaray saath jo haazir ho baandh raha hoon balki tumhaaree aanay vaalee naslon kay saath bhee.
butparastee kee sazaa
16tum khud jaantay ho ki ham misr men kis tarah zindagee guzaartay thay. yah bhee tumhen yaad hai ki ham kis tarah mukhtalif mamaalik men say guzartay huay yahaan tak pahunchay. 17tum nay un kay nafarat’angez but dekhay jo lakdee, patthar, chaandee aur sonay kay thay. 18dhyaan do ki yahaan maujood koee bhee mard, aurat, kumba ya qabeela rabb apnay khuda say hat kar doosree qaumon kay devtaaon kee pooja na karay. aisa na ho ki tumhaaray darmiyaan koee jad phoot kar zahereela aur kadva phal laaay.
19tum sab nay vah laanten sunee hain jo rabb naafaramaanon par bhejega. to bhee ho sakta hai ki koee apnay aap ko rabb kee barkat ka vaaris samajh kar kahay, “beshak main apnee ghalat raahon say hatnay kay liyay tayyaar naheen hoon, lekin koee baat naheen. main mahfooz rahoonga.” khabardaar, aisee harkat say vah na sirf apnay oopar balki pooray mulk par tabaahee laaega. [a] lafzee tarjuma : seraab zameen khushk zameen kay saath tabaah ho jaaegee. 20rabb kabhee bhee usay muaaf karnay par aamaada naheen hoga balki vah usay apnay ghazab aur ghairat ka nishaana banaaega. is kitaab men darj tamaam laanten us par aaengee, aur rabb duniya say us ka naam-o-nishaan mita dega. 21vah usay pooree jamaaat say alag karkay us par ahd kee vah tamaam laanten laaega jo shareeat kee is kitaab men likhee huee hain.
22mustaqbil men tumhaaree aulaad aur doordaraaz mamaalik say aanay vaalay musaafir un museebaton aur amraaz ka asar dekhengay jin say rabb nay mulk ko tabaah kiya hoga. 23chaaron taraf zameen jhulsee huee aur gandhak aur namak say dhakee huee nazar aaegee. beej us men boya naheen jaaega, kyoonki khudrau paudon tak kuchh naheen ugega. tumhaara mulk sadoom, amoora, adma aur zaboeem kee maanind hoga jin ko rabb nay apnay ghazab men tabaah kiya. 24tamaam qaumen poochhengee, ‘rabb nay is mulk kay saath aisa kyoon kiya? us kay sakht ghazab kee kya vajah thee?’ 25unhen javaab milega, ‘vajah yah hai ki is mulk kay baashindon nay rabb apnay baapdaada kay khuda ka ahd tod diya jo us nay unhen misr say nikaaltay vaqt un say baandha tha. 26unhon nay ja kar deegar maaboodon kee khidmat kee aur unhen sijda kiya jin say vah pahelay vaaqif naheen thay aur jo rabb nay unhen naheen diay thay. 27isee liyay us ka ghazab is mulk par naazil hua aur vah us par vah tamaam laanten laaya jin ka zikr is kitaab men hai. 28vah itna ghussay hua ki us nay unhen jad say ukhaad kar ek ajnabee mulk men phaink diya jahaan vah aaj tak aabaad hain.’
29bahut kuchh posheeda hai, aur sirf rabb hamaara khuda us ka ilm rakhta hai. lekin us nay ham par apnee shareeat ka inkishaaf kar diya hai. laazim hai ki ham aur hamaaree aulaad us kay faramaambardaar rahen.