Istisna 28

faramaambardaaree kee barkaten

¹rabb tera khuda tujhay duniya kee tamaam qaumon par sarfaraaz karega. shart yah hai ki too us kee sunay aur ehatiyaat say us kay un tamaam ahkaam par amal karay jo main tujhay aaj day raha hoon. ²rabb apnay khuda ka faramaambardaar rah to tujhay har tarah kee barkat haasil hogee. ³rabb tujhay shaher aur deehaat men barkat dega. ⁴teree aulaad phalay phoolegee, teree achchhee-khaasee faslen pakengee, teray gaay-bailon aur bhed-bakriyon kay bachchay taraqqee karengay. ⁵tera tokra phal say bhara rahega, aur aata goondhnay ka tera bartan aatay say khaalee naheen hoga. ⁶rabb tujhay ghar men aatay aur vahaan say nikaltay vaqt barkat dega.

⁷jab teray dushman tujh par hamla karengay to vah rabb kee madad say shikast khaaengay. go vah mil kar tujh par hamla karen to bhee too unhen chaaron taraf muntashir kar dega.

⁸allaah teray har kaam men barkat dega. anaaj kee kasrat kay sabab say teray godaam bharay rahengay. rabb tera khuda tujhay us mulk men barkat dega jo vah tujhay denay vaala hai. ⁹rabb apnee qasam kay mutaabiq tujhay apnee makhsoos-o-muqaddas qaum banaaega agar too us kay ahkaam par amal karay aur us kee raahon par chalay. ¹⁰phir duniya kee tamaam qaumen tujh say khauf khaaengee, kyoonki vah dekhengee ki too rabb kee qaum hai aur us kay naam say kahelaata hai.

¹¹rabb tujhay bahut aulaad dega, teray revad badhaaega aur tujhay kasrat kee faslen dega. yoon vah tujhay us mulk men barkat dega jis ka vaada us nay qasam kha kar teray baapdaada say kiya. ¹²rabb aasmaan kay khazaanon ko khol kar vaqt par teree zameen par baarish barasaaega. vah teray har kaam men barkat dega. too bahut see qaumon ko udhaar dega lekin kisee ka bhee qarzdaar naheen hoga. ¹³rabb tujhay qaumon kee dum naheen balki un ka sar banaaega. too taraqqee karta jaaega aur zavaal ka shikaar naheen hoga. lekin shart yah hai ki too rabb apnay khuda kay vah ahkaam maan kar un par amal karay jo main tujhay aaj day raha hoon. ¹⁴jo kuchh bhee main nay tujhay karnay ko kaha hai us say kisee tarah bhee hat kar zindagee na guzaarna. na deegar maaboodon kee pairvee karna, na un kee khidmat karna.

naafarmaanee kee laanten

¹⁵lekin agar too rabb apnay khuda kee na sunay aur us kay un tamaam ahkaam par amal na karay jo main aaj tujhay day raha hoon to har tarah kee laanat tujh par aaegee. ¹⁶shaher aur deehaat men tujh par laanat hogee. ¹⁷teray tokray aur aata goondhnay kay teray bartan par laanat hogee. ¹⁸teree aulaad par, teray gaay-bailon aur bhed-bakriyon kay bachchon par aur teray kheton par laanat hogee. ¹⁹ghar men aatay aur vahaan say nikaltay vaqt tujh par laanat hogee. ²⁰agar too ghalat kaam karkay rabb ko chhoday to jo kuchh bhee too karay vah tujh par laanten, pareshaaniyaan aur museebaten aanay dega. tab tera jaldee say satyaanaas hoga, aur too halaak ho jaaega.

²¹rabb tujh men vabaaee beemaariyaan phailaaega jin kay sabab say tujh men say koee us mulk men zinda naheen rahega jis par too abhee qabza karnay vaala hai. ²²rabb tujhay muhalak beemaariyon, bukhaar aur soojan say maarega. jhulsaanay vaalee garmee, kaal, patrog aur phaphoondee teree faslen khatm karegee. aisee museebaton kay baais too tabaah ho jaaega. ²³teray oopar aasmaan peetal jaisa sakht hoga jabki teray neechay zameen lohay kee maanind hogee. ²⁴baarish kee jagah rabb teray mulk par gard aur ret barasaaega jo aasmaan say teray mulk par chha kar tujhay barbaad kar degee.

²⁵jab too apnay dushmanon ka saamna karay to rabb tujhay shikast dilaaega. go too mil kar un kee taraf badhega to bhee un say bhaag kar chaaron taraf muntashir ho jaaega. duniya kay tamaam mamaalik men logon kay rongtay khaday ho jaaengay jab vah teree museebaten dekhengay. ²⁶parinday aur janglee jaanvar teree laashon ko kha jaaengay, aur unhen bhagaanay vaala koee naheen hoga. ²⁷rabb tujhay un hee phodon say maarega jo misriyon ko niklay thay. aisay jildee amraaz phailengay jin ka ilaaj naheen hai. ²⁸too paagalpan ka shikaar ho jaaega, rabb tujhay andhaapan aur zahenee abtaree men mubtala kar dega. ²⁹dopaher kay vaqt bhee too andhay kee tarah tatol tatol kar phirega. jo kuchh bhee too karay us men naakaam rahega. roz-ba-roz log tujhay dabaatay aur loottay rahengay, aur tujhay bachaanay vaala koee naheen hoga.

³⁰teree mangnee kisee aurat say hogee to koee aur a kar us kee ismatdaree karega. too apnay liyay ghar banaaega lekin us men naheen rahega. too apnay liyay angoor ka baagh lagaaega lekin us ka phal naheen khaaega. ³¹teray dekhtay dekhtay tera bail zabah kiya jaaega, lekin too us ka gosht naheen khaaega. tera gadha tujh say chheen liya jaaega aur vaapas naheen kiya jaaega. teree bhed-bakriyaan dushman ko dee jaaengee, aur unhen chhudaanay vaala koee naheen hoga. ³²teray betay-betiyon ko kisee doosree qaum ko diya jaaega, aur too kuchh naheen kar sakega. roz-ba-roz too apnay bachchon kay intizaar men ufaq ko takta rahega, lekin dekhtay dekhtay teree aankhen dhundala jaaengee.

³³ek ajnabee qaum teree zameen kee paidaavaar aur teree mehanat-o-mashaqqat kee kamaaee lay jaaegee. tujhay umr bhar zulm aur dabaao bardaasht karna padega.

³⁴jo haulnaak baaten teree aankhen dekhengee un say too paagal ho jaaega. ³⁵rabb tujhay takleefdih aur laailaaj phodon say maarega jo talvay say lay kar chaandee tak pooray jism par phail kar teray ghutnon aur taangon ko mut’assir karengay.

³⁶rabb tujhay aur teray muqarrar kiay huay baadshaah ko ek aisay mulk men lay jaaega jis say na too aur na teray baapdaada vaaqif thay. vahaan too deegar maaboodon yaanee lakdee aur patthar kay buton kee khidmat karega. ³⁷jis jis qaum men rabb tujhay haank dega vahaan tujhay dekh kar logon kay rongtay khaday ho jaaengay aur vah tera mazaaq udaaengay. too un kay liyay ibrat’angez misaal hoga.

³⁸too apnay kheton men bahut beej bonay kay baavujood kam hee fasal kaatega, kyoonki tidday usay kha jaaengay. ³⁹too angoor kay baagh laga kar un par khoob mehanat karega lekin na un kay angoor todega, na un kee mai piega, kyoonki keeday unhen kha jaaengay. ⁴⁰go teray pooray mulk men zaitoon kay darakht hongay to bhee too un ka tel istemaal naheen kar sakega, kyoonki zaitoon kharaab ho kar zameen par gir jaaengay.

⁴¹teray betay-betiyaan to hongay, lekin too un say maheroom ho jaaega. kyoonki unhen giriftaar karkay kisee ajnabee mulk men lay jaaya jaaega. ⁴²tiddiyon kay ghol teray mulk kay tamaam darakhton aur faslon par qabza kar lengay. ⁴³teray darmiyaan rahenay vaala pardesee tujh say badh kar taraqqee karta jaaega jabki tujh par zavaal a jaaega. ⁴⁴us kay paas tujhay udhaar denay kay liyay paisay hongay jabki teray paas usay udhaar denay ko kuchh naheen hoga. aakhir men vah sar aur too dum hoga.

⁴⁵yah tamaam laanten tujh par aan padengee. jab tak too tabaah na ho jaaay vah tera taaqqub kartee rahengee, kyoonki too nay rabb apnay khuda kee na sunee aur us kay ahkaam par amal na kiya. ⁴⁶yoon yah hamesha tak teray aur teree aulaad kay liyay ek mojizaana aur ibrat’angez ilaahee nishaan rahengee.

⁴⁷choonki too nay dilee khushee say us vaqt rabb apnay khuda kee khidmat na kee jab teray paas sab kuchh thaa ⁴⁸is liyay too un dushmanon kee khidmat karega jinhen rabb teray khilaaf bhejega. too bhooka, piyaasa, nanga aur har cheez ka haajatmand hoga, aur rabb teree gardan par lohay ka jooa rakh kar tujhay mukammal tabaahee tak lay jaaega.

⁴⁹rabb teray khilaaf ek qaum khadee karega jo door say balki duniya kee intiha say a kar uqaab kee tarah tujh par jhapatta maaregee. vah aisee zabaan bolegee jis say too vaaqif naheen hoga. ⁵⁰vah sakht qaum hogee jo na buzurgon ka lihaaz karegee aur na bachchon par rahem karegee. ⁵¹vah teray maveshee aur faslen kha jaaegee aur too bhookon mar jaaega. too halaak ho jaaega, kyoonki teray liyay kuchh naheen bachega, na anaaj, na mai, na tel, na gaay-bailon ya bhed-bakriyon kay bachchay. ⁵²dushman teray mulk kay tamaam shaheron ka muhaasara karega. aakhirkaar jin oonchee aur mazboot faseelon par too etimaad karega vah bhee sab gir padengee. dushman us mulk ka koee bhee shaher naheen chhodega jo rabb tera khuda tujhay denay vaala hai.

⁵³jab dushman teray shaheron ka muhaasara karega to too un men itna shadeed bhooka ho jaaega ki apnay bachchon ko kha lega jo rabb teray khuda nay tujhay diay hain. ^54-55 muhaasaray kay dauraan tum men say sab say shareef aur shaaista aadmee bhee apnay bachchay ko zabah karkay khaaega, kyoonki us kay paas koee aur khuraak naheen hogee. us kee haalat itnee buree hogee ki vah usay apnay sagay bhaaee, beevee ya baaqee bachchon kay saath taqseem karnay kay liyay tayyaar naheen hoga. ^56-57 tum men say sab say shareef aur shaaista aurat bhee aisa hee karegee, agarchi pahelay vah itnee naazuk thee ki farsh ko apnay talvay say chhoonay kee jur’at naheen kartee thee. muhaasaray kay dauraan usay itnee shadeed bhook hogee ki jab us kay bachcha paida hoga to vah chhup chhup kar usay khaaegee. na sirf yah balki vah paidaaish kay vaqt bachchay kay saath khaarij huee aalaaeesh bhee khaaegee aur usay apnay shauhar ya apnay baaqee bachchon men baantnay kay liyay tayyaar naheen hogee. itnee museebat tujh par muhaasaray kay dauraan aaegee.

⁵⁸gharaz ehatiyaat say shareeat kee un tamaam baaton kee pairvee kar jo is kitaab men darj hain, aur rabb apnay khuda kay purjalaal aur baarob naam ka khauf maanna. ⁵⁹varna vah tujh aur teree aulaad men sakht aur laailaaj amraaz aur aisee dahshatanaak vabaaen phailaaega jo rokee naheen ja sakengee. ⁶⁰jin tamaam vabaaon say too misr men dahshat khaata tha vah ab teray darmiyaan phail kar teray saath chimtee rahengee. ⁶¹na sirf shareeat kee is kitaab men bayaan kee huee beemaariyaan aur museebaten tujh par aaengee balki rabb aur bhee tujh par bhejega, jab tak ki too halaak na ho jaaay.

⁶²agar too rabb apnay khuda kee na sunay to aakhirkaar tum men say bahut kam bachay rahengay, go tum pahelay sitaaron jaisay beshumaar thay. ⁶³jis tarah pahelay rabb khushee say tumhen kaamyaabee deta aur tumhaaree taadaad badhaata tha usee tarah ab vah tumhen barbaad aur tabaah karnay men khushee mahsoos karega. tumhen zabardastee us mulk say nikaala jaaega jis par too is vaqt daakhil ho kar qabza karnay vaala hai. ⁶⁴tab rabb tujhay duniya kay ek siray say lay kar doosray siray tak tamaam qaumon men muntashir kar dega. vahaan too deegar maaboodon kee pooja karega, aisay devtaaon kee jin say na too aur na teray baapdaada vaaqif thay.

⁶⁵un mamaalik men bhee na too aaraam-o-sukoon paaega, na teray paaon jam jaaengay. rabb honay dega ki tera dil thartharaata rahega, teree aankhen pareshaanee kay baais dhundala jaaengee aur teree jaan say ummeed kee har kiran jaatee rahegee. ⁶⁶teree jaan har vaqt khatray men hogee aur too din raat dahshat khaatay huay marnay kee tavaqqo karega. ⁶⁷subah uth kar too kahega, “kaash shaam ho!” aur shaam kay vaqt, “kaash subah ho!” kyoonki jo kuchh too dekhega us say teray dil ko dahshat gher legee.

⁶⁸rabb tujhay jahaazon men bitha kar misr vaapas lay jaaega agarchi main nay kaha tha ki too usay dubaara kabhee naheen dekhega. vahaan pahunch kar tum apnay dushmanon say baat karkay apnay aap ko ghulaam kay taur par bechanay kee koshish karogay, lekin koee bhee tumhen khareedna naheen chaahega.”