Istisna 27
aibaal pahaad par qurbaangaah banaana hai
1phir moosa nay buzurgon say mil kar qaum say kaha, “tamaam hidaayaat kay taabay raho jo main tumhen aaj day raha hoon. 2jab tum darya-ay-yardan ko paar karkay us mulk men daakhil hogay jo rabb tera khuda tujhay day raha hai to vahaan baday patthar khaday karkay un par saphedee kar. 3un par lafz-ba-lafz pooree shareeat likh. darya ko paar karnay kay baad yahee kuchh kar taaki too us mulk men daakhil ho jo rabb tera khuda tujhay dega aur jis men doodh aur shahed kee kasrat hai. kyoonki rabb teray baapdaada kay khuda nay yah denay ka tujh say vaada kiya hai. 4chunaanchay yardan ko paar karkay pattharon ko aibaal pahaad par khada karo aur un par saphedee kar.
5vahaan rabb apnay khuda kay liyay qurbaangaah banaana. jo patthar too us kay liyay istemaal karay unhen lohay kay kisee auzaar say na taraashna. 6sirf saalim patthar istemaal kar. qurbaangaah par rabb apnay khuda ko bhasm honay vaalee qurbaaniyaan pesh kar. 7salaamatee kee qurbaaniyaan bhee us par chadha. unhen vahaan rabb apnay khuda kay huzoor kha kar khushee mana. 8vahaan khaday kiay gaay pattharon par shareeat kay tamaam alfaaz saaf saaf likhay jaaen.”
aibaal pahaad par say laanat
9phir moosa nay laavee kay qabeelay kay imaamon say mil kar tamaam israaeeliyon say kaha, “ai israaeel, khaamoshee say sun. ab too rabb apnay khuda kee qaum ban gaya hai, 10is liyay us ka faramaambardaar rah aur us kay un ahkaam par amal kar jo main tujhay aaj day raha hoon.”
11usee din moosa nay israaeeliyon ko hukm day kar kaha, 12“darya-ay-yardan ko paar karnay kay baad shamaaoon, laavee, yahoodaah, ishkaar, yoosuf aur binyameen kay qabeelay garizeem pahaad par khaday ho jaaen. vahaan vah barkat kay alfaaz bolen. 13baaqee qabeelay yaanee roobin, jad, aashar, zabooloon, daan aur naftaalee aibaal pahaad par khaday ho kar laanat kay alfaaz bolen.
14phir laavee tamaam logon say mukhaatib ho kar oonchee aavaaz say kahen,
15‘us par laanat jo but taraash kar ya dhaal kar chupkay say khada karay. rabb ko kaareegar kay haathon say banee huee aisee cheez say ghin hai.’
javaab men sab log kahen, ‘aameen!’
16phir laavee kahen, ‘us par laanat jo apnay baap ya maan kee tahqeer karay.’
sab log kahen, ‘aameen!’
17‘us par laanat jo apnay padosee kee zameen kee hudood aagay peechhay karay.’
sab log kahen, ‘aameen!’
18‘us par laanat jo kisee andhay kee raahanumaaee karkay usay ghalat raastay par lay jaaay.’
sab log kahen, ‘aameen!’
19‘us par laanat jo pardesiyon, yateemon ya bevaaon kay huqooq qaaim na rakhay.’
sab log kahen, ‘aameen!’
20‘us par laanat jo apnay baap kee beevee say hambistar ho jaaay, kyoonki vah apnay baap kee behuramtee karta hai.’
sab log kahen, ‘aameen!’
21‘us par laanat jo jaanvar say jinsee taalluq rakhay.’
sab log kahen, ‘aameen!’
22‘us par laanat jo apnee sagee bahen, apnay baap kee betee ya apnee maan kee betee say hambistar ho jaaay.’
sab log kahen, ‘aameen!’
23‘us par laanat jo apnee saas say hambistar ho jaaay.’
sab log kahen, ‘aameen!’
24‘us par laanat jo chupkay say apnay hamvatan ko qatl kar day.’
sab log kahen, ‘aameen!’
25‘us par laanat jo paisay lay kar kisee bequsoor shakhs ko qatl karay.’
sab log kahen, ‘aameen!’
26‘us par laanat jo is shareeat kee baaten qaaim na rakhay, na in par amal karay.’
sab log kahen, ‘aameen!’