Istisna 26

zameen kee pahelee paidaavaar rabb ko pesh karnaa

¹jab too us mulk men daakhil hoga jo rabb tera khuda tujhay meeraas men day raha hai aur too us par qabza karkay us men aabaad ho jaaegaa ²to jo bhee fasal too kaatega us kay pahelay phal men say kuchh tokray men rakh kar us jagah lay ja jo rabb tera khuda apnay naam kee sukoonat kay liyay chunega. ³vahaan khidmat karnay vaalay imaam say kah, “aaj main rabb apnay khuda kay huzoor elaan karta hoon ki us mulk men pahunch gaya hoon jis ka hamen denay ka vaada rabb nay qasam kha kar hamaaray baapdaada say kiya tha.”

⁴tab imaam tera tokra lay kar usay rabb teray khuda kee qurbaangaah kay saamnay rakh day. ⁵phir rabb apnay khuda kay huzoor kah, “mera baap aavaara phirnay vaala araamee tha jo apnay logon ko lay kar misr men aabaad hua. vahaan pahunchtay vaqt un kee taadaad kam thee, lekin hotay hotay vah badee aur taaqatvar qaum ban gaay. ⁶lekin misriyon nay hamaaray saath bura sulook kiya aur hamen daba kar sakht ghulaamee men phansa diya. ⁷phir ham nay chilla kar rabb apnay baapdaada kay khuda say faryaad kee, aur rabb nay hamaaree sunee. us nay hamaara dukh, hamaaree museebat aur dabee huee haalat dekhee ⁸aur baday ikhtiyaar aur qudrat ka izhaar karkay hamen misr say nikaal laaya. us vaqt us nay misriyon men dahshat phaila kar baday mojizay dikhaaay. ⁹vah hamen yahaan lay aaya aur yah mulk diya jis men doodh aur shahed kee kasrat hai. ¹⁰ai rabb, ab main tujhay us zameen ka pahela phal pesh karta hoon jo too nay hamen bakhshee hai.”

apnee paidaavaar ka tokra rabb apnay khuda kay saamnay rakh kar usay sijda karna. ¹¹khushee manaana ki rabb meray khuda nay mujhay aur meray gharaanay ko itnee achchhee cheezon say navaaza hai. is khushee men apnay darmiyaan rahenay vaalay laaviyon aur pardesiyon ko bhee shaamil karna.

fazl ka zarooratmandon kay liyay hissaa

¹²har teesray saal apnee tamaam faslon ka dasvaan hissa laaviyon, pardesiyon, yateemon aur bevaaon ko dena taaki vah teray shaheron men khaana kha kar ser ho jaaen. ¹³phir rabb apnay khuda say kah, “main nay vaisa hee kiya hai jaisa too nay mujhay hukm diya. main nay apnay ghar say teray liyay makhsoos-o-muqaddas hissa nikaal kar usay laaviyon, pardesiyon, yateemon aur bevaaon ko diya hai. main nay sab kuchh teree hidaayaat kay ain mutaabiq kiya hai aur kuchh naheen bhoola. ¹⁴maatam kartay vaqt main nay is makhsoos-o-muqaddas hissay say kuchh naheen khaaya. main isay utha kar ghar say baahar laatay vaqt naapaak naheen tha. main nay is men say murdon ko bhee kuchh pesh naheen kiya. main nay rabb apnay khuda kee itaaat karkay vah sab kuchh kiya hai jo too nay mujhay karnay ko farmaaya tha. ¹⁵chunaanchay aasmaan par apnay maqdis say nigaah karkay apnee qaum israaeel ko barkat day. us mulk ko bhee barkat day jis ka vaada too nay qasam kha kar hamaaray baapdaada say kiya aur jo too nay hamen bakhsh bhee diya hai, us mulk ko jis men doodh aur shahed kee kasrat hai.”

tum rabb kee qaum ho

¹⁶aaj rabb tera khuda farmaata hai ki in ahkaam aur hidaayaat kee pairvee kar. pooray dil-o-jaan say aur badee ehatiyaat say in par amal kar.

¹⁷aaj too nay elaan kiya hai, “rabb mera khuda hai. main us kee raahon par chalta rahoonga, us kay ahkaam kay taabay rahoonga aur us kee sunoonga.” ¹⁸aur aaj rabb nay elaan kiya hai, “too meree qaum aur meree apnee milkiyat hai jis tarah main nay tujh say vaada kiya hai. ab meray tamaam ahkaam kay mutaabiq zindagee guzaar. ¹⁹jitnee bhee qaumen main nay khalaq kee hain un sab par main tujhay sarfaraaz karoonga aur tujhay taareef, shuharat aur izzat ata karoonga. too rabb apnay khuda kay liyay makhsoos-o-muqaddas qaum hoga jis tarah main nay vaada kiya hai.”