Istisna 25
koday lagaanay kee munaasib sazaa
1agar log apna ek doosray kay saath jhagda khud nipta na saken to vah apna muaamala adaalat men pesh karen. qaazee faisla karay ki kaun bequsoor hai aur kaun mujrim. 2agar mujrim ko koday lagaanay kee saza denee hai to usay qaazee kay saamnay hee munh kay bal zameen par litaana. phir usay itnay koday lagaaay jaaen jitnon kay vah laaiq hai. 3lekin us ko ziyaada say ziyaada 40 koday lagaanay hain, varna teray israaeelee bhaaee kee sar-ay-aam beizzatee ho jaaegee.
bail ka munh na baandhnaa
4jab too fasal gaahanay kay liyay us par bail chalnay deta hai to us ka munh baandh kar na rakhna.
marhoom bhaaee kee beevee say shaadee karnay ka hukm
5agar koee shaadeeshuda mard beaulaad mar jaaay aur us ka saga bhaaee saath rahay to us ka farz hai ki beva say shaadee karay. beva shauhar kay khaandaan say hat kar kisee aur say shaadee na karay balki sirf apnay devar say. 6pahela beta jo is rishtay say paida hoga pahelay shauhar kay betay kee haisiyat rakhega. yoon us ka naam qaaim rahega.
7lekin agar devar bhaabee say shaadee karna na chaahay to bhaabee shaher kay darvaazay par jama honay vaalay buzurgon kay paas jaaay aur un say kahay, “mera devar mujh say shaadee karnay say inkaar karta hai. vah apna farz ada karnay ko tayyaar naheen ki apnay bhaaee ka naam qaaim rakhay.” 8phir shaher kay buzurg devar ko bula kar usay samjhaaen. agar vah is kay baavujood bhee us say shaadee karnay say inkaar kare 9to us kee bhaabee buzurgon kee maujoodgee men us kay paas ja kar us kee ek chappal utaar lay. phir vah us kay munh par thook kar kahay, “us aadmee say aisa sulook kiya jaata hai jo apnay bhaaee kee nasal qaaim rakhnay ko tayyaar naheen.” 10aainda israaeel men devar kee nasal “nangay paaon vaalay kee nasal” kahelaaegee.
jhagday men naazeba harkaten
11agar do aadmee lad rahay hon aur ek kee beevee apnay shauhar ko bachaanay kee khaatir mukhaalif kay uzv-ay-tanaasul ko pakad le 12to laazim hai ki too aurat ka haath kaat daalay. us par rahem na karna.
dhoka na denaa
13toltay vaqt apnay thailay men saheeh vazan kay baat rakh, aur dhoka denay kay liyay halkay baat saath na rakhna. 14isee tarah apnay ghar men anaaj kee paimaaish karnay ka saheeh bartan rakh, aur dhoka denay kay liyay chhota bartan saath na rakhna. 15saheeh vazan kay baat aur paimaaish karnay kay saheeh bartan istemaal karna taaki too der tak us mulk men jeeta rahay jo rabb tera khuda tujhay dega. 16kyoonki usay har dhokebaaz say ghin hai.
amaaleeqiyon ko saza denaa
17yaad rahay ki amaaleeqiyon nay tujh say kya kuchh kiya jab tum misr say nikal kar safar kar rahay thay. 18jab too thakaahaara tha to vah tujh par hamla karkay peechhay peechhay chalnay vaalay tamaam kamzoron ko jaan say maartay rahay. vah allaah ka khauf naheen maantay thay. 19chunaanchay jab rabb tera khuda tujhay ird-gird kay tamaam dushmanon say sukoon dega aur too us mulk men aabaad hoga jo vah tujhay meeraas men day raha hai taaki too us par qabza karay to amaaleeqiyon ko yoon halaak kar ki duniya men un ka naam-o-nishaan na rahay. yah baat mat bhoolna.