Istisna 24

talaaq aur dubaara shaadee

¹ho sakta hai koee aadmee kisee aurat say shaadee karay lekin baad men usay pasand na karay, kyoonki usay beevee kay baaray men kisee sharmanaak baat ka pata chal gaya hai. vah talaaqnaama likh kar usay aurat ko deta aur phir usay ghar say vaapas bhej deta hai. ²is kay baad us aurat kee shaadee kisee aur mard say ho jaatee hai, ³aur vah bhee baad men usay pasand naheen karta. vah bhee talaaqnaama likh kar usay aurat ko deta aur phir usay ghar say vaapas bhej deta hai. khwaah doosra shauhar usay vaapas bhej day ya shauhar mar jaaay, ⁴aurat kay pahelay shauhar ko us say dubaara shaadee karnay kee ijaazat naheen hai, kyoonki vah aurat us kay liyay naapaak hai. aisee harkat rabb kee nazar men qaabil-ay-ghin hai. us mulk ko yoon gunaah’aalooda na karna jo rabb tera khuda tujhay meeraas men day raha hai.

mazeed hidaayaat

⁵agar kisee aadmee nay abhee abhee shaadee kee ho to too usay bhartee karkay jang karnay kay liyay naheen bhej sakta. too usay koee bhee aisee zimmaadaaree naheen day sakta, jis say vah ghar say door rahenay par majboor ho jaaay. ek saal tak vah aisee zimmaadaariyon say baree rahay taaki ghar men rah kar apnee beevee ko khush kar sakay.

⁶agar koee tujh say udhaar lay to zamaanat kay taur par us say na us kee chhotee chakkee, na us kee badee chakkee ka paat lena, kyoonki aisa karnay say too us kee jaan lega yaanee too vah cheez lega jis say us ka guzaara hota hai.

⁷agar kisee aadmee ko pakda jaaay jis nay apnay hamvatan ko aghva karkay ghulaam bana liya ya bech diya hai to usay saza-ay-maut dena hai. yoon too apnay darmiyaan say buraaee mita dega.

⁸agar koee vabaaee jildee beemaaree tujhay lag jaaay to badee ehatiyaat say laavee kay qabeelay kay imaamon kee tamaam hidaayaat par amal karna. jo bhee hukm main nay unhen diya usay poora karna. ⁹yaad kar ki rabb teray khuda nay mariyam kay saath kya kiya jab tum misr say nikal kar safar kar rahay thay.

ghareebon kay huqooq

¹⁰apnay hamvatan ko udhaar detay vaqt us kay ghar men na jaana taaki zamaanat kee koee cheez mile ¹¹balki baahar thaher kar intizaar kar ki vah khud ghar say zamaanat kee cheez nikaal kar tujhay day. ¹²agar vah itna zarooratmand ho ki sirf apnee chaadar day sakay to raat kay vaqt zamaanat teray paas na rahay. ¹³usay sooraj doobnay tak vaapas karna taaki qarzdaar us men lipat kar so sakay. phir vah tujhay barkat dega aur rabb tera khuda tera yah qadam raast qaraar dega.

¹⁴zarooratmand mazdoor say ghalat faaida na uthaana, chaahay vah israaeelee ho ya pardesee. ¹⁵usay rozaana sooraj doobnay say pahelay pahelay us kee mazdooree day dena, kyoonki is say us ka guzaara hota hai. kaheen vah rabb kay huzoor teree shikaayat na karay aur too qusoorvaar thaheray.

¹⁶vaalidain ko un kay bachchon kay jaraaim kay sabab say saza-ay-maut na dee jaaay, na bachchon ko un kay vaalidain kay jaraaim kay sabab say. agar kisee ko saza-ay-maut denee ho to us gunaah kay sabab say jo us nay khud kiya hai.

¹⁷pardesiyon aur yateemon kay huqooq qaaim rakhna. udhaar detay vaqt zamaanat kay taur par beva kee chaadar na lena. ¹⁸yaad rakh ki too bhee misr men ghulaam tha aur ki rabb teray khuda nay fidya day kar tujhay vahaan say chhudaaya. isee vajah say main tujhay yah hukm deta hoon.

¹⁹agar too fasal kee kataaee kay vaqt ek poola bhool kar khet men chhod aaay to usay laanay kay liyay vaapas na jaana. usay pardesiyon, yateemon aur bevaaon kay liyay vaheen chhod dena taaki rabb tera khuda teray har kaam men barkat day. ²⁰jab zaitoon kee fasal pak gaee ho to darakhton ko maar maar kar ek hee baar un men say phal utaar. is kay baad unhen na chhedna. bacha hua phal pardesiyon, yateemon aur bevaaon kay liyay chhod dena. ²¹isee tarah apnay angoor todnay kay liyay ek hee baar baagh men say guzarna. is kay baad usay na chhedna. bacha hua phal pardesiyon, yateemon aur bevaaon kay liyay chhod dena. ²²yaad rakh ki too khud misr men ghulaam tha. isee vajah say main tujhay yah hukm deta hoon.