Istisna 23
muqaddas ijtima men shareek honay kee sharaait
1jab israaeelee rabb kay maqdis kay paas jama hotay hain to usay haazir honay kee ijaazat naheen jo kaatnay ya kuchalnay say khoja ban gaya hai. 2isee tarah vah bhee muqaddas ijtima say door rahay jo naajaaiz taalluqaat kay nateejay men paida hua hai. us kee aulaad bhee dasveen pusht tak us men naheen a saktee.
3koee bhee ammonee ya moaabee muqaddas ijtima men shareek naheen ho sakta. in qaumon kee aulaad dasveen pusht tak bhee is jamaaat men haazir naheen ho saktee, 4kyoonki jab tum misr say nikal aaay to vah rotee aur paanee lay kar tum say milnay na aaay. na sirf yah balki unhon nay masoputaamiya kay shaher fator men ja kar bal’aam bin baor ko paisay diay taaki vah tujh par laanat bhejay. 5lekin rabb teray khuda nay bal’aam kee na sunee balki us kee laanat barkat men badal dee. kyoonki rabb tera khuda tujh say piyaar karta hai. 6umr bhar kuchh na karna jis say in qaumon kee salaamatee aur khushhaalee badh jaaay.
7lekin adomiyon ko makrooh na samajhna, kyoonki vah tumhaaray bhaaee hain. isee tarah misriyon ko bhee makrooh na samajhna, kyoonki too un kay mulk men pardesee mehamaan tha. 8un kee teesree nasal kay log rabb kay muqaddas ijtima men shareek ho saktay hain.
khaimaagaah men naapaakee
9apnay dushmanon say jang kartay vaqt apnee lashkargaah men har naapaak cheez say door rahena. 10maslan agar koee aadmee raat kay vaqt ehatilaam kay baais naapaak ho jaaay to vah lashkargaah kay baahar ja kar shaam tak vahaan thaheray. 11din dhaltay vaqt vah naha lay to sooraj doobnay par lashkargaah men vaapas a sakta hai.
12apnee haajat rafa karnay kay liyay lashkargaah say baahar koee jagah muqarrar kar. 13jab kisee ko haajat kay liyay baithna ho to vah is kay liyay gadha khoday aur baad men usay mittee say bhar day. is liyay apnay saamaan men khudaaee ka koee aala rakhna zarooree hai.
14rabb tera khuda teree lashkargaah men teray darmiyaan hee ghoomta phirta hai taaki too mahfooz rahay aur dushman teray saamnay shikast khaaay. is liyay laazim hai ki teree lashkargaah us kay liyay makhsoos-o-muqaddas ho. aisa na ho ki allaah vahaan koee sharmanaak baat dekh kar tujh say door ho jaaay.
faraar huay ghulaamon kee madad karnaa
15agar koee ghulaam teray paas panaah lay to usay maalik ko vaapas na karna. 16vah teray saath aur teray darmiyaan hee rahay, vahaan jahaan vah basna chaahay, us shaher men jo usay pasand aaay. usay na dabaana.
mandir men ismatafaroshee mana hai
17kisee devta kee khidmat men ismatafaroshee karna har israaeelee aurat aur mard kay liyay mana hai. 18mannat maantay vaqt na kasbee ka ajr, na kuttay kay paise [a] yaqeen say naheen kaha ja sakta ki kuttay kay paisay say kya muraad hai. ghaaliban is kay peechhay butparastee ka koee dastoor hai. rabb kay maqdis men laana, kyoonki rabb teray khuda ko donon cheezon say ghin hai.
apnay hamvatanon say sood na lenaa
19agar koee israaeelee bhaaee tujh say qarz lay to us say sood na lena, khwaah too nay usay paisay, khaana ya koee aur cheez dee ho. 20apnay israaeelee bhaaee say sood na lay balki sirf pardesee say. phir jab too mulk par qabza karkay us men rahega to rabb tera khuda teray har kaam men barkat dega.
apnee mannat pooree karnaa
21jab too rabb apnay khuda kay huzoor mannat maanay to usay poora karnay men der na karna. rabb tera khuda yaqeenan tujh say is ka mutaalba karega. agar too usay poora na karay to qusoorvaar thaherega. 22agar too mannat maannay say baaz rahay to qusoorvaar naheen thaherega, 23lekin agar too apnee dilee khushee say rabb kay huzoor mannat maanay to har soorat men usay poora kar.
doosray kay baagh men say guzarnay ka ravayyaa
24kisee hamvatan kay angoor kay baagh men say guzartay vaqt tujhay jitna jee chaahay us kay angoor khaanay kee ijaazat hai. lekin apnay kisee bartan men phal jama na karna. 25isee tarah kisee hamvatan kay anaaj kay khet men say guzartay vaqt tujhay apnay haathon say anaaj kee baaliyaan todnay kee ijaazat hai. lekin daraantee istemaal na karna.