Istisna 22
madad karnay kay liyay tayyaar rahenaa
1agar tujhay kisee hamvatan bhaaee ka bail ya bhed-bakree bhatkee huee nazar aaay to usay nazar’andaaz na karna balki maalik kay paas vaapas lay jaana. 2agar maalik ka ghar qareeb na ho ya tujhay maaloom na ho ki maalik kaun hai to jaanvar ko apnay ghar la kar us vaqt tak sambhaalay rakhna jab tak ki maalik usay dhoondnay na aaay. phir jaanvar ko usay vaapas kar dena. 3yahee kuchh kar agar teray hamvatan bhaaee ka gadha bhatka hua nazar aaay ya us ka gumshuda kot ya koee aur cheez kaheen nazar aaay. usay nazar’andaaz na karna.
4agar too dekhay ki kisee hamvatan ka gadha ya bail raastay men gir gaya hai to usay nazar’andaaz na karna. jaanvar ko khada karnay men apnay bhaaee kee madad kar.
qudratee intizaam kay tahet rahenaa
5aurat kay liyay mardon kay kapday pahenna mana hai. isee tarah mard kay liyay aurton kay kapday pahenna bhee mana hai. jo aisa karta hai us say rabb teray khuda ko ghin aatee hai.
6agar tujhay kaheen raastay men, kisee darakht men ya zameen par ghonsla nazar aaay aur parinda apnay bachchon ya andon par baitha hua ho to maan ko bachchon samet na pakadna. 7tujhay bachchay lay jaanay kee ijaazat hai lekin maan ko chhod dena taaki too khushhaal aur der tak jeeta rahay.
8naya makaan taameer kartay vaqt chhat par chaaron taraf deevaar banaana. varna too us shakhs kee maut ka zimmaadaar thaherega jo teree chhat par say gir jaaay.
9apnay angoor kay baagh men do qism kay beej na bona. varna sab kuchh maqdis kay liyay makhsoos-o-muqaddas hoga, na sirf vah fasal jo tum nay angoor kay ilaava lagaaee balki angoor bhee.
10bail aur gadhay ko jod kar hal na chalaana.
11aisay kapday na pahenna jin men bantay vaqt oon aur kataan milaaay gaay hain.
12apnee chaadar kay chaaron konon par phundanay lagaana.
izdivaajee zindagee kee hifaazat
13agar koee aadmee shaadee karnay kay thodee der baad apnee beevee ko pasand na kare 14aur phir us kee badnaamee karkay kahay, “is aurat say shaadee karnay kay baad mujhay pata chala ki vah kunvaaree naheen hai.” 15javaab men beevee kay vaalidain shaher kay darvaazay par jama honay vaalay buzurgon kay paas saboot [a] yaanee vah kapda jis par naya joda soya hua tha. lay aaen ki betee shaadee say pahelay kunvaaree thee. 16beevee ka baap buzurgon say kahay, “main nay apnee betee kee shaadee is aadmee say kee hai, lekin yah us say nafrat karta hai. 17ab is nay us kee badnaamee karkay kaha hai, ‘mujhay pata chala ki tumhaaree betee kunvaaree naheen hai.’ lekin yahaan saboot hai ki meree betee kunvaaree thee.” phir vaalidain shaher kay buzurgon ko mazkoora kapda dikhaaen.
18tab buzurg us aadmee ko pakad kar saza den, 19kyoonki us nay ek israaeelee kunvaaree kee badnaamee kee hai. is kay ilaava usay jurmaanay kay taur par beevee kay baap ko chaandee kay 100 sikkay denay padengay. laazim hai ki vah shauhar kay faraaiz ada karta rahay. vah umr bhar usay talaaq naheen day sakega.
20lekin agar aadmee kee baat durust niklay aur saabit na ho sakay ki beevee shaadee say pahelay kunvaaree thee 21to usay baap kay ghar laaya jaaay. vahaan shaher kay aadmee usay sangasaar kar den. kyoonki apnay baap kay ghar men rahetay huay badkaaree karnay say us nay israaeel men ek ahemaqaana aur bedeen harkat kee hai. yoon too apnay darmiyaan say buraaee mita dega. 22agar koee aadmee kisee kee beevee kay saath zina karay aur vah pakday jaaen to donon ko saza-ay-maut denee hai. yoon too israaeel say buraaee mita dega.
23agar aabaadee men kisee mard kee mulaaqaat kisee aisee kunvaaree say ho jis kee kisee aur kay saath mangnee huee hai aur vah us kay saath hambistar ho jaae 24to laazim hai ki tum donon ko shaher kay darvaazay kay paas la kar sangasaar karo. vajah yah hai ki ladkee nay madad kay liyay na pukaara agarchi us jagah log aabaad thay. mard ka jurm yah tha ki us nay kisee aur kee mangetar kee ismatdaree kee hai. yoon too apnay darmiyaan say buraaee mita dega.
25lekin agar mard ghair’aabaad jagah men kisee aur kee mangetar kee ismatdaree karay to sirf usee ko saza-ay-maut dee jaaay. 26ladkee ko koee saza na dena, kyoonki us nay kuchh naheen kiya jo maut kay laaiq ho. ziyaadtee karnay vaalay kee harkat us shakhs kay baraabar hai jis nay kisee par hamla karkay usay qatl kar diya hai. 27choonki us nay ladkee ko vahaan paaya jahaan log naheen rahetay, is liyay agarchi ladkee nay madad kay liyay pukaara to bhee usay koee na bacha saka.
28ho sakta hai koee aadmee kisee ladkee kee ismatdaree karay jis kee mangnee naheen huee hai. agar unhen pakda jaae 29to vah ladkee kay baap ko chaandee kay 50 sikkay day. laazim hai ki vah usee ladkee say shaadee karay, kyoonki us nay us kee ismatdaree kee hai. na sirf yah balki vah umr bhar usay talaaq naheen day sakta.
30apnay baap kee beevee say shaadee karna mana hai. jo koee yah karay vah apnay baap kee behuramtee karta hai.