Istisna 21
naamaaloom qatl ka kaffaaraa
1jab too us mulk men aabaad hoga jo rabb tujhay meeraas men day raha hai taaki too us par qabza karay to ho sakta hai ki koee laash khulay maidaan men kaheen padee paaee jaaay. agar maaloom na ho ki kis nay usay qatl kiya hai 2to pahelay ird-gird kay shaheron kay buzurg aur qaazee a kar pata karen ki kaun sa shaher laash kay ziyaada qareeb hai. 3phir us shaher kay buzurg ek javaan gaay chun len jo kabhee kaam kay liyay istemaal naheen huee. 4vah usay ek aisee vaadee men lay jaaen jis men na kabhee hal chalaaya gaya, na pauday lagaaay gaay hon. vaadee men aisee naher ho jo poora saal bahetee rahay. vaheen buzurg javaan gaay kee gardan tod daalen.
5phir laavee kay qabeelay kay imaam qareeb aaen. kyoonki rabb tumhaaray khuda nay unhen chun liya hai taaki vah khidmat karen, rabb kay naam say barkat den aur tamaam jhagdon aur hamlon ka faisla karen. 6un kay dekhtay dekhtay shaher kay buzurg apnay haath gaay kee laash kay oopar dho len. 7saath saath vah kahen, “ham nay is shakhs ko qatl naheen kiya, na ham nay dekha ki kis nay yah kiya. 8ai rabb, apnee qaum israaeel ka yah kaffaara qabool farma jisay too nay fidya day kar chhudaaya hai. apnee qaum israaeel ko is bequsoor kay qatl ka qusoorvaar na thahera.” tab maqtool ka kaffaara diya jaaega.
9yoon too aisay bequsoor shakhs kay qatl ka daagh apnay darmiyaan say mita dega. kyoonki too nay vahee kuchh kiya hoga jo rabb kee nazar men durust hai.
jangee qaidee aurat say shaadee
10ho sakta hai ki too apnay dushman say jang karay aur rabb tumhaara khuda tujhay fatah bakhshay. jangee qaidiyon ko jama kartay vaqt 11tujhay un men say ek khoobsoorat aurat nazar aatee hai jis kay saath tera dil lag jaata hai. too us say shaadee kar sakta hai. 12usay apnay ghar men lay a. vahaan vah apnay sar kay baalon ko mundavaaay, apnay naakhun taraashe 13aur apnay vah kapday utaaray jo vah pahenay huay thee jab usay qaid kiya gaya. vah pooray ek maheenay tak apnay vaalidain kay liyay maatam karay. phir too us kay paas ja kar us kay saath shaadee kar sakta hai.
14agar vah tujhay kisee vaqt pasand na aaay to usay jaanay day. vah vahaan jaaay jahaan us ka jee chaahay. tujhay usay bechanay ya us say laundee ka sa sulook karnay kee ijaazat naheen hai, kyoonki too nay usay majboor karkay us say shaadee kee hai.
pahelauthay kay huqooq
15ho sakta hai kisee mard kee do beeviyaan hon. ek ko vah piyaar karta hai, doosree ko naheen. donon beeviyon kay betay paida huay hain, lekin jis beevee say shauhar muhabbat naheen karta us ka beta sab say pahelay paida hua. 16jab baap apnee milkiyat vasiyat men taqseem karta hai to laazim hai ki vah apnay sab say baday betay ka mauroosee haq poora karay. usay pahelauthay ka yah haq us beevee kay betay ko muntaqil karnay kee ijaazat naheen jisay vah piyaar karta hai. 17usay tasleem karna hai ki us beevee ka beta sab say bada hai, jis say vah muhabbat naheen karta. nateejatan usay us betay ko doosray beton kee nisbat dugna hissa dena padega, kyoonki vah apnay baap kee taaqat ka pahela izhaar hai. usay pahelauthay ka haq haasil hai.
sarkash betaa
18ho sakta hai ki kisee ka beta hatdharm aur sarkash ho. vah apnay vaalidain kee itaaat naheen karta aur un kay tambeeh karnay aur saza denay par bhee un kee naheen sunta. 19is soorat men vaalidain usay pakad kar shaher kay darvaazay par lay jaaen jahaan buzurg jama hotay hain. 20vah buzurgon say kahen, “hamaara beta hatdharm aur sarkash hai. vah hamaaree itaaat naheen karta balki ayyaash aur sharaabee hai.” 21yah sun kar shaher kay tamaam mard usay sangasaar karen. yoon too apnay darmiyaan say buraaee mita dega. tamaam israaeel yah sun kar dar jaaega.
saza-ay-maut paanay vaalay ko usee din dafnaana hai
22jab too kisee ko saza-ay-maut day kar us kee laash kisee lakdee ya darakht say latkaata hai 23to usay aglee subah tak vahaan na chhodna. har soorat men usay usee din dafna dena, kyoonki jisay bhee darakht say latkaaya gaya hai us par allaah kee laanat hai. agar usay usee din dafnaaya na jaaay to too us mulk ko naapaak kar dega jo rabb tera khuda tujhay meeraas men day raha hai.