Istisna 20

jang kay usool

¹jab too jang kay liyay nikal kar dekhta hai ki dushman taadaad men ziyaada hain aur un kay paas ghoday aur rath bhee hain to mat darna. rabb tera khuda jo tujhay misr say nikaal laaya ab bhee teray saath hai. ²jang kay liyay nikalnay say pahelay imaam saamnay aaay aur fauj say mukhaatib ho kar ³kahay, “san ai israaeel! aaj tum apnay dushman say ladnay ja rahay ho. un kay sabab say pareshaan na ho. un say na khauf khaao, na ghabraao, ⁴kyoonki rabb tumhaara khuda khud tumhaaray saath ja kar dushman say ladega. vahee tumhen fatah bakhshega.”

⁵phir nigahbaan fauj say mukhaatib hon, “kya yahaan koee hai jis nay haal men apna naya ghar mukammal kiya lekin usay makhsoos karnay ka mauqa na mila? vah apnay ghar vaapas chala jaaay. aisa na ho ki vah jang kay dauraan maara jaaay aur koee aur ghar ko makhsoos karkay us men basnay lagay. ⁶kya koee hai jis nay angoor ka baagh laga kar is vaqt us kee pahelee fasal kay intizaar men hai? vah apnay ghar vaapas chala jaaay. aisa na ho ki vah jang men maara jaaay aur koee aur baagh ka faaida uthaaay. ⁷kya koee hai jis kee mangnee huee hai aur jo is vaqt shaadee kay intizaar men hai? vah apnay ghar vaapas chala jaaay. aisa na ho ki vah jang men maara jaaay aur koee aur us kee mangetar say shaadee karay.”

⁸nigahbaan kahen, “kya koee khaufzada ya pareshaan hai? vah apnay ghar vaapas chala jaaay taaki apnay saathiyon ko pareshaan na karay.” ⁹is kay baad faujiyon par afsar muqarrar kiay jaaen.

¹⁰kisee shaher par hamla karnay say pahelay us kay baashindon ko hathiyaar daal denay ka mauqa dena. ¹¹agar vah maan jaaen aur apnay darvaazay khol den to vah teray liyay begaar men kaam karkay teree khidmat karen. ¹²lekin agar vah hathiyaar daalnay say inkaar karen aur jang chhid jaaay to shaher ka muhaasara kar. ¹³jab rabb tera khuda tujhay shaher par fatah dega to us kay tamaam mardon ko halaak kar dena. ¹⁴too tamaam maal-ay-ghaneemat aurton, bachchon aur maveshiyon samet rakh sakta hai. dushman kee jo cheezen rabb nay teray havaalay kar dee hain un sab ko too istemaal kar sakta hai. ¹⁵yoon un shaheron say nipatna jo teray apnay mulk say baahar hain.

¹⁶lekin jo shaher us mulk men vaaqay hain jo rabb tera khuda tujhay meeraas men day raha hai, un kay tamaam jaandaaron ko halaak kar dena. ¹⁷unhen rabb kay sapurd karkay mukammal taur par halaak karna, jis tarah rabb teray khuda nay tujhay hukm diya hai. is men hittee, amoree, kan’aanee, farizzee, hivvee aur yaboosee shaamil hain. ¹⁸agar too aisa na karay to vah tumhen rabb tumhaaray khuda ka gunaah karnay par ukasaaengay. jo ghinaunee harkaten vah apnay devtaaon kee pooja kartay vaqt kartay hain unhen vah tumhen bhee sikhaaengay.

¹⁹shaher ka muhaasara kartay vaqt ird-gird kay phaldaar darakhton ko kaat kar tabaah na kar dena khwaah badee der bhee ho jaaay, varna too un ka phal naheen kha sakega. unhen na kaatna. kya darakht teray dushman hain jin ka muhaasara karna hai? hargiz naheen! ²⁰un darakhton kee aur baat hai jo phal naheen laatay. unhen too kaat kar muhaasaray kay liyay istemaal kar sakta hai jab tak shaher shikast na khaaay.