Istisna 2

registaan men dubaara safar

¹phir jis tarah rabb nay mujhay hukm diya tha ham peechhay mud kar registaan men baher-ay-qulzum kee taraf safar karnay lagay. kaafee der tak ham saeer yaanee adom kay pahaadee ilaaqay kay kinaaray kinaaray phirtay rahay.

²ek din rabb nay mujh say kaha, ³“tum bahut der say is pahaadee ilaaqay kay kinaaray kinaaray phir rahay ho. ab shimaal kee taraf safar karo. ⁴qaum ko bataana, aglay dinon men tum saeer kay mulk men say guzrogay jahaan tumhaaray bhaaee esau kee aulaad aabaad hai. vah tum say darengay. to bhee badee ehatiyaat say guzarna. ⁵un kay saath jang na chhedna, kyoonki main tumhen un kay mulk ka ek murabba fut bhee naheen doonga. main nay saeer ka pahaadee ilaaqa esau aur us kee aulaad ko diya hai. ⁶laazim hai ki tum khaanay aur peenay kee tamaam zarooriyaat paisay day kar khareedo.”

⁷jo bhee kaam too nay kiya hai rabb nay us par barkat dee hai. is vasee registaan men pooray safar kay dauraan us nay teree nigahbaanee kee. in 40 saalon kay dauraan rabb tera khuda teray saath tha, aur teree tamaam zarooriyaat pooree hotee raheen.

⁸chunaanchay ham saeer ko chhod kar jahaan hamaaray bhaaee esau kee aulaad aabaad thee doosray raastay say aagay niklay. ham nay vah raasta chhod diya jo ailaat aur asyoon-jaabar kay shaheron say baheera-ay-murdaar tak pahunchaata hai aur moaab kay biyaabaan kee taraf badhnay lagay. ⁹vahaan rabb nay mujh say kaha, “moaab kay baashindon kee mukhaalafat na karna aur na un kay saath jang chhedna, kyoonki main un kay mulk ka koee bhee hissa tujhay naheen doonga. main nay aar shaher ko loot kee aulaad ko diya hai.”

¹⁰pahelay aimee vahaan rahetay thay jo anaaq kee aulaad kee tarah taaqatvar, daraazaqad aur taadaad men ziyaada thay. ¹¹anaaq kee aulaad kee tarah vah rafaaiyon men shumaar kiay jaatay thay, lekin moaabee unhen aimee kahetay thay.

¹²isee tarah qadeem zamaanay men horee saeer men aabaad thay, lekin esau kee aulaad nay unhen vahaan say nikaal diya tha. jis tarah israaeeliyon nay baad men us mulk men kiya jo rabb nay unhen diya tha usee tarah esau kee aulaad badhtay badhtay horiyon ko tabaah karkay un kee jagah aabaad huay thay.

¹³rabb nay kaha, “ab ja kar vaadee-ay-zarad ko uboor karo.” ham nay aisa hee kiya. ¹⁴hamen qaadis-barneea say ravaana huay 38 saal ho gaay thay. ab vah tamaam aadmee mar chukay thay jo us vaqt jang karnay kay qaabil thay. vaisa hee hua tha jaisa rabb nay qasam kha kar kaha tha. ¹⁵rabb kee mukhaalafat kay baais aakhirkaar khaimaagaah men us nasal ka ek mard bhee na raha. ¹⁶jab vah sab mar gaay the ¹⁷tab rabb nay mujh say kaha, ¹⁸“aaj tumhen aar shaher say ho kar moaab kay ilaaqay men say guzarna hai. ¹⁹phir tum ammoniyon kay ilaaqay tak pahunchogay. un kee bhee mukhaalafat na karna, aur na un kay saath jang chhedna, kyoonki main un kay mulk ka koee bhee hissa tumhen naheen doonga. main nay yah mulk loot kee aulaad ko diya hai.”

²⁰haqeeqat men ammoniyon ka mulk bhee rafaaiyon ka mulk samjha jaata tha jo qadeem zamaanay men vahaan aabaad thay. ammonee unhen zamzumee kahetay thay, ²¹aur vah deo thay, taaqatvar aur taadaad men ziyaada. vah anaaq kee aulaad jaisay daraazaqad thay. jab ammonee mulk men aaay to rabb nay rafaaiyon ko un kay aagay aagay tabaah kar diya. chunaanchay ammonee badhtay badhtay unhen nikaaltay gaay aur un kee jagah aabaad huay, ²²bilkul usee tarah jis tarah rabb nay esau kee aulaad kay aagay aagay horiyon ko tabaah kar diya tha jab vah saeer kay mulk men aaay thay. vahaan bhee vah badhtay badhtay horiyon ko nikaaltay gaay aur un kee jagah aabaad huay. ²³isee tarah ek aur qadeem qaum banaam avvee ko bhee us kay mulk say nikaala gaya. avvee ghazza tak aabaad thay, lekin jab kaftooree kaftoor yaanee kretay say aaay to unhon nay unhen tabaah kar diya aur un kee jagah aabaad ho gaay.

seehon baadshaah say jang

²⁴rabb nay moosa say kaha, “ab ja kar vaadee-ay-arnon ko uboor karo. yoon samjho ki main hasbon kay amoree baadshaah seehon ko us kay mulk samet tumhaaray havaalay kar chuka hoon. us par qabza karna shuroo karo aur us kay saath jang karnay ka mauqa dhoondo. ²⁵isee din say main tamaam qaumon men tumhaaray baaray men dahshat aur khauf paida karoonga. vah tumhaaree khabar sun kar khauf kay maaray thartharaaengee aur kaampengee.”

²⁶main nay dasht-ay-qadeemaat say hasbon kay baadshaah seehon kay paas qaasid bhejay. mera paighaam nafrat aur mukhaalafat say khaalee tha. vah yah tha, ²⁷“hamen apnay mulk men say guzarnay den. ham shaaharaah par hee rahengay aur us say na baaeen, na daaeen taraf hatengay. ²⁸ham khaanay aur peenay kee tamaam zarooriyaat kay liyay munaasib paisay dengay. hamen paidal apnay mulk men say guzarnay den, ²⁹jis tarah saeer kay baashindon esau kee aulaad aur aar kay rahenay vaalay moaabiyon nay hamen guzarnay diya. kyoonki hamaaree manzil darya-ay-yardan kay maghrib men hai, vah mulk jo rabb hamaara khuda hamen denay vaala hai.”

³⁰lekin hasbon kay baadshaah seehon nay hamen guzarnay na diya, kyoonki rabb tumhaaray khuda nay usay belachak aur hamaaree baat say inkaar karnay par aamaada kar diya tha taaki seehon hamaaray qaaboo men a jaaay. aur baad men aisa hee hua. ³¹rabb nay mujh say kaha, “yoon samajh lay ki main seehon aur us kay mulk ko teray havaalay karnay laga hoon. ab nikal kar us par qabza karna shuroo karo.”

³²jab seehon apnee saaree fauj lay kar hamaara muqaabla karnay kay liyay yahez aayaa ³³to rabb hamaaray khuda nay hamen pooree fatah bakhshee. ham nay seehon, us kay beton aur pooree qaum ko shikast dee. ³⁴us vaqt ham nay us kay tamaam shaheron par qabza kar liya aur un kay tamaam mardon, aurton aur bachchon ko maar daala. koee bhee na bacha. ³⁵ham nay sirf maveshee aur shaheron ka loota hua maal apnay liyay bachaaay rakha.

³⁶vaadee-ay-arnon kay kinaaray par vaaqay aroeer say lay kar jiliaad tak har shaher ko shikast maannee padee. is men vah shaher bhee shaamil tha jo vaadee-ay-arnon men tha. rabb hamaaray khuda nay un sab ko hamaaray havaalay kar diya. ³⁷lekin tum nay ammoniyon ka mulk chhod diya aur na darya-ay-yabboq kay ird-gird kay ilaaqay, na us kay pahaadee ilaaqay kay shaheron ko chheda, kyoonki rabb hamaaray khuda nay aisa karnay say tumhen mana kiya tha.