Istisna 19

panaah kay shaher

¹rabb tera khuda us mulk men aabaad qaumon ko tabaah karega jo vah tujhay day raha hai. jab too unhen bhaga kar un kay shaheron aur gharon men aabaad ho jaaegaa ^2-3 to pooray mulk ko teen hisson men taqseem kar. har hissay men ek markzee shaher muqarrar kar. un tak pahunchaanay vaalay raastay saaf-suthray rakhna. in shaheron men har vah shakhs panaah lay sakta hai jis kay haath say koee ghairiraadee taur par halaak hua hai. ⁴vah aisay shaher men ja kar intiqaam lenay vaalon say mahfooz rahega. shart yah hai ki us nay na qasdan aur na dushmanee kay baais kisee ko maar diya ho.

⁵maslan do aadmee jangal men darakht kaat rahay hain. kulhaadee chalaatay vaqt ek kee kulhaadee dastay say nikal kar us kay saathee ko lag jaaay aur vah mar jaaay. aisa shakhs faraar ho kar aisay shaher men panaah lay sakta hai taaki bacha rahay. ⁶is liyay zarooree hai ki aisay shaheron ka faasila ziyaada na ho. kyoonki jab intiqaam lenay vaala us ka taaqqub karega to khatra hai ki vah taish men usay pakad kar maar daalay, agarchi bhaagnay vaala bequsoor hai. jo kuchh us nay kiya vah dushmanee kay sabab say naheen balki ghairiraadee taur par hua. ⁷is liyay laazim hai ki too panaah kay teen shaher alag kar lay.

⁸baad men rabb tera khuda teree sarhadden mazeed badha dega, kyoonki yahee vaada us nay qasam kha kar teray baapdaada say kiya hai. apnay vaaday kay mutaabiq vah tujhay poora mulk dega, ⁹alabatta shart yah hai ki too ehatiyaat say un tamaam ahkaam kee pairvee karay jo main tujhay aaj day raha hoon. doosray alfaaz men shart yah hai ki too rabb apnay khuda ko piyaar karay aur hamesha us kee raahon men chalta rahay. agar too aisa hee karay aur nateejatan rabb ka vaada poora ho jaaay to laazim hai ki too panaah kay teen aur shaher alag kar lay. ¹⁰varna teray mulk men jo rabb tera khuda tujhay meeraas men day raha hai bequsoor logon ko jaan say maara jaaega aur too khud zimmaadaar thaherega.

¹¹lekin ho sakta hai koee dushmanee kay baais kisee kee taak men baith jaaay aur us par hamla karkay usay maar daalay. agar qaatil panaah kay kisee shaher men bhaag kar panaah le ¹²to us kay shaher kay buzurg ittila den ki usay vaapas laaya jaaay. usay intiqaam lenay vaalay kay havaalay kiya jaaay taaki usay saza-ay-maut milay. ¹³us par rahem mat karna. laazim hai ki too israaeel men say bequsoor kee maut ka daagh mitaaay taaki too khushhaal rahay.

zameenon kee hadden

¹⁴jab too us mulk men rahega jo rabb tera khuda tujhay meeraas men dega taaki too us par qabza karay to zameen kee vah hadden aagay peechhay na karna jo teray baapdaada nay muqarrar keen.

adaalat men gavaah

¹⁵too kisee ko ek hee gavaah kay kahenay par qusoorvaar naheen thahera sakta. jo bhee jurm sarzad hua hai, kam az kam do ya teen gavaahon kee zaroorat hai. varna too usay qusoorvaar naheen thahera sakta.

¹⁶agar jis par ilzaam lagaaya gaya hai inkaar karkay daava karay ki gavaah jhoot bol raha hai ¹⁷to donon maqdis men rabb kay huzoor a kar khidmat karnay vaalay imaamon aur qaaziyon ko apna muaamala pesh karen. ¹⁸qaazee is ka khoob khoj lagaaen. agar baat durust niklay ki gavaah nay jhoot bol kar apnay bhaaee par ghalat ilzaam lagaaya hai ¹⁹to us kay saath vah kuchh kiya jaaay jo vah apnay bhaaee kay liyay chaah raha tha. yoon too apnay darmiyaan say buraaee mita dega. ²⁰phir tamaam baaqee log yah sun kar dar jaaengay aur aainda teray darmiyaan aisee ghalat harkat karnay kee jur’at naheen karengay. ²¹qusoorvaar par rahem na karna. usool yah ho ki jaan kay badlay jaan, aankh kay badlay aankh, daant kay badlay daant, haath kay badlay haath, paaon kay badlay paaon.