Istisna 18

imaamon aur laaviyon ka hissaa

¹israaeel kay har qabeelay ko meeraas men us ka apna ilaaqa milega siva-ay-laavee kay qabeelay kay jis men imaam bhee shaamil hain. vah jalnay vaalee aur deegar qurbaaniyon men say apna hissa lay kar guzaara karen. ²un kay paas doosron kee tarah mauroosee zameen naheen hogee balki rabb khud un ka mauroosee hissa hoga. yah us nay vaada karkay kaha hai.

³jab bhee kisee bail ya bhed ko qurbaan kiya jaaay to imaamon ko us ka shaana, jabday aur ojhdee milnay ka haq hai. ⁴apnee faslon ka pahela phal bhee unhen dena yaanee anaaj, mai, zaitoon ka tel aur bhedon kee pahelee katree huee oon. ⁵kyoonki rabb nay teray tamaam qabeelon men say laavee kay qabeelay ko hee maqdis men rabb kay naam men khidmat karnay kay liyay chuna hai. yah hamesha kay liyay un kee aur un kee aulaad kee zimmaadaaree rahegee.

⁶kuchh laavee maqdis kay paas naheen balki israaeel kay mukhtalif shaheron men rahengay. agar un men say koee us jagah aana chaahay jo rabb maqdis kay liyay chunegaa ⁷to vah vahaan kay khidmat karnay vaalay laaviyon kee tarah maqdis men rabb apnay khuda kay naam men khidmat kar sakta hai. ⁸usay qurbaaniyon men say doosron kay baraabar laaviyon ka hissa milna hai, khwaah usay khaandaanee milkiyat bechanay say paisay mil gaay hon ya naheen.

jaadoogree mana hai

⁹jab too us mulk men daakhil hoga jo rabb tera khuda tujhay day raha hai to vahaan kee rahenay vaalee qaumon kay ghinaunay dastoor na apnaana. ¹⁰teray darmiyaan koee bhee apnay betay ya betee ko qurbaanee kay taur par na jalaaay. na koee ghaibdaanee karay, na faal ya shugoon nikaalay ya jaadoogree karay. ¹¹isee tarah mantr padhna, haaziraat karna, qismat ka haal bataana ya murdon kee roohon say raabita karna sakht mana hai. ¹²jo bhee aisa karay vah rabb kee nazar men qaabil-ay-ghin hai. in hee makrooh dastooron kee vajah say rabb tera khuda teray aagay say un qaumon ko nikaal dega. ¹³is liyay laazim hai ki too rabb apnay khuda kay saamnay bequsoor rahay.

nabee ka vaadaa

¹⁴jin qaumon ko too nikaalnay vaala hai vah un kee suntee hain jo faal nikaaltay aur ghaibdaanee kartay hain. lekin rabb teray khuda nay tujhay aisa karnay kee ijaazat naheen dee.

¹⁵rabb tera khuda teray vaastay teray bhaaiyon men say mujh jaisay nabee ko barpa karega. us kee sunna. ¹⁶kyoonki horib yaanee seena pahaad par jama hotay vaqt too nay khud rabb apnay khuda say darakhwaast kee, “na main mazeed rabb apnay khuda kee aavaaz sunna chaahata, na yah bhadaktee huee aag dekhna chaahata hoon, varna mar jaaoonga.” ¹⁷tab rabb nay mujh say kaha, “jo kuchh vah kahetay hain vah theek hai. ¹⁸aainda main un men say tujh jaisa nabee khada karoonga. main apnay alfaaz us kay munh men daal doonga, aur vah meree har baat un tak pahunchaaega. ¹⁹jab vah nabee meray naam men kuchh kahay to laazim hai ki too us kee sun. jo naheen sunega us say main khud javaab talab karoonga. ²⁰lekin agar koee nabee gustaakh ho kar meray naam men koee baat kahay jo main nay usay bataanay ko naheen kaha tha to usay saza-ay-maut denee hai. isee tarah us nabee ko bhee halaak kar dena hai jo deegar maaboodon kay naam men baat karay.”

²¹shaayad teray zahen men savaal ubhar aaay ki ham kis tarah maaloom kar saktay hain ki koee kalaam vaaqaee rabb kee taraf say hai ya naheen. ²²javaab yah hai ki agar nabee rabb kay naam men kuchh kahay aur vah poora na ho jaaay to matlab hai ki nabee kee baat rabb kee taraf say naheen hai balki us nay gustaakhee karkay baat kee hai. is soorat men us say mat darna.