Istisna 17

¹rabb apnay khuda ko naaqis gaay-bail ya bhed-bakree pesh na karna, kyoonki vah aisee qurbaanee say nafrat rakhta hai.

²jab too un shaheron men aabaad ho jaaega jo rabb tera khuda tujhay dega to ho sakta hai ki teray darmiyaan koee mard ya aurat rabb teray khuda ka ahd tod kar vah kuchh karay jo usay bura lagay. ³maslan vah deegar maaboodon ko ya sooraj, chaand ya sitaaron kay pooray lashkar ko sijda karay, haalaanki main nay yah mana kiya hai. ⁴jab bhee tujhay is qism kee khabar milay to is ka poora khoj laga. agar baat durust niklay aur aisee ghinaunee harkat vaaqaee israaeel men kee gaee ho ⁵to qusoorvaar ko shaher kay baahar lay ja kar sangasaar kar dena. ⁶lekin laazim hai ki pahelay kam az kam do ya teen log gavaahee den ki us nay aisa hee kiya hai. usay saza-ay-maut denay kay liyay ek gavaah kaafee naheen. ⁷pahelay gavaah us par patthar phainken, is kay baad baaqee tamaam log usay sangasaar karen. yoon too apnay darmiyaan say buraaee mita dega.

maqdis men aalaatreen adaalat

⁸agar teray shaher kay qaaziyon kay liyay kisee muqaddmay ka faisla karna mushkil ho to us maqdis men a kar apna muaamala pesh kar jo rabb tera khuda chunega, khwaah kisee ko qatl kiya gaya ho, usay zakhmee kar diya gaya ho ya koee aur masla ho. ⁹laavee kay qabeelay kay imaamon aur maqdis men khidmat karnay vaalay qaazee ko apna muqaddma pesh kar, aur vah faisla karen. ¹⁰jo faisla vah us maqdis men karengay jo rabb chunega usay maanna padega. jo bhee hidaayat vah den us par ehatiyaat say amal kar. ¹¹shareeat kee jo bhee baat vah tujhay sikhaaen aur jo bhee faisla vah den us par amal kar. jo kuchh bhee vah tujhay bataaen us say na daaeen aur na baaeen taraf mudna.

¹²jo maqdis men rabb teray khuda kee khidmat karnay vaalay qaazee ya imaam ko haqeer jaan kar un kee naheen sunta usay saza-ay-maut dee jaaay. yoon too israaeel say buraaee mita dega. ¹³phir tamaam log yah sun kar dar jaaengay aur aainda aisee gustaakhee karnay kee jur’at naheen karengay.

baadshaah kay baaray men usool

¹⁴too jald hee us mulk men daakhil hoga jo rabb tera khuda tujhay denay vaala hai. jab too us par qabza karkay us men aabaad ho jaaega to ho sakta hai ki too ek din kahay, “aao ham ird-gird kee tamaam qaumon kee tarah baadshaah muqarrar karen jo ham par hukoomat karay.” ¹⁵agar too aisa karay to sirf vah shakhs muqarrar kar jisay rabb tera khuda chunega. vah pardesee na ho balki tera apna israaeelee bhaaee ho. ¹⁶baadshaah bahut ziyaada ghoday na rakhay, na apnay logon ko unhen khareednay kay liyay misr bhejay. kyoonki rabb nay tujh say kaha hai ki kabhee vahaan vaapas na jaana. ¹⁷tera baadshaah ziyaada beeviyaan bhee na rakhay, varna us ka dil rabb say door ho jaaega. aur vah hadd say ziyaada sona-chaandee jama na karay.

¹⁸takhtnasheen hotay vaqt vah laavee kay qabeelay kay imaamon kay paas padee is shareeat kee naqal likhvaaay. ¹⁹yah kitaab us kay paas mahfooz rahay, aur vah umr bhar rozaana isay padhta rahay taaki rabb apnay khuda ka khauf maanna seekhay. tab vah shareeat kee tamaam baaton kee pairvee karega, ²⁰apnay aap ko apnay israaeelee bhaaiyon say ziyaada ahem naheen samjhega aur kisee tarah bhee shareeat say hat kar kaam naheen karega. nateejay men vah aur us kee aulaad bahut arsay tak israaeel par hukoomat karengay.