Istisna 16
fasah kee eed
1abeeb kay maheene [a] maarch ta aprail. men rabb apnay khuda kee taazeem men fasah kee eed manaana, kyoonki is maheenay men vah tujhay raat kay vaqt misr say nikaal laaya. 2us jagah jama ho ja jo rabb apnay naam kee sukoonat kay liyay chunega. usay qurbaanee kay liyay bhed-bakriyaan ya gaay-bail pesh karna. 3gosht kay saath bekhameeree rotee khaana. saat din tak yahee rotee kha, bilkul usee tarah jis tarah too nay kiya jab jaldee jaldee misr say nikla. museebat kee yah rotee is liyay kha taaki vah din teray jeetay jee yaad rahay jab too misr say ravaana hua. 4laazim hai ki eed kay haftay kay dauraan teray pooray mulk men khameer na paaya jaaay.
jo qurbaanee too eed kay pahelay din kee shaam ko pesh karay us ka gosht usee vaqt kha lay. aglee subah tak kuchh baaqee na rah jaaay. 5fasah kee qurbaanee kisee bhee shaher men jo rabb tera khuda tujhay dega na chadhaanaa 6balki sirf us jagah jo vah apnay naam kee sukoonat kay liyay chunega. misr say nikaltay vaqt kee tarah qurbaanee kay jaanvar ko sooraj doobtay vaqt zabah kar. 7phir usay bhoon kar us jagah khaana jo rabb tera khuda chunega. aglee subah apnay ghar vaapas chala ja. 8eed kay pahelay chhah din bekhameeree rotee khaata rah. saatven din kaam na karna balki rabb apnay khuda kee ibaadat kay liyay jama ho jaana.
fasal kee kataaee kee eed
9jab anaaj kee fasal kee kataaee shuroo hogee to pahelay din kay saat haftay baad 10fasal kee kataaee kee eed manaana. rabb apnay khuda ko utna pesh kar jitna jee chaahay. vah us barkat kay mutaabiq ho jo us nay tujhay dee hai. 11is kay liyay bhee us jagah jama ho ja jo rabb apnay naam kee sukoonat kay liyay chunega. vahaan us kay huzoor khushee mana. teray baal-bachchay, teray ghulaam aur laundiyaan aur teray shaheron men rahenay vaalay laavee, pardesee, yateem aur bevaaen sab teree khushee men shareek hon. 12in ahkaam par zaroor amal karna aur mat bhoolna ki too misr men ghulaam tha.
jhompadiyon kee eed
13anaaj gaahanay aur angoor ka ras nikaalnay kay baad jhompadiyon kee eed manaana jis ka dauraaniya saat din ho. 14eed kay mauqay par khushee manaana. teray baal-bachchay, teray ghulaam aur laundiyaan aur teray shaheron men basnay vaalay laavee, pardesee, yateem aur bevaaen sab teree khushee men shareek hon. 15jo jagah rabb tera khuda maqdis kay liyay chunega vahaan us kee taazeem men saat din tak yah eed manaana. kyoonki rabb tera khuda teree tamaam faslon aur mehanat ko barkat dega, is liyay khoob khushee manaana.
16israaeel kay tamaam mard saal men teen martaba us maqdis par haazir ho jaaen jo rabb tera khuda chunega yaanee bekhameeree rotee kee eed, fasal kee kataaee kee eed aur jhompadiyon kee eed par. koee bhee rabb kay huzoor khaalee haath na aaay. 17har koee us barkat kay mutaabiq day jo rabb teray khuda nay usay dee hai.
qaazee muqarrar karnaa
18apnay apnay qabaailee ilaaqay men qaazee aur nigahbaan muqarrar kar. vah har us shaher men hon jo rabb tera khuda tujhay dega. vah insaaf say logon kee adaalat karen. 19na kisee kay huqooq maarna, na jaanibdaaree dikhaana. rishvat qabool na karna, kyoonki rishvat daanishmandon ko andha kar detee aur raastbaaz kee baaten palat detee hai. 20sirf aur sirf insaaf kay mutaabiq chal taaki too jeeta rahay aur us mulk par qabza karay jo rabb tera khuda tujhay dega.
butparastee kee sazaa
21jahaan too rabb apnay khuda kay liyay qurbaangaah banaaega vahaan na yaseerat devee kee pooja kay liyay lakdee ka khambaa 22aur na koee aisa patthar khada karna jis kee pooja log kartay hain. rabb tera khuda in cheezon say nafrat rakhta hai.