Istisna 15
qarzdaaron kee bahaalee ka saal
1har saat saal kay baad ek doosray kay karzay muaaf kar dena. 2us vaqt jis nay bhee kisee israaeelee bhaaee ko qarz diya hai vah usay mansookh karay. vah apnay padosee ya bhaaee ko paisay vaapas karnay par majboor na karay, kyoonki rabb kee taazeem men qarz muaaf karnay kay saal ka elaan kiya gaya hai. 3is saal men too sirf ghairmulkee qarzdaaron ko paisay vaapas karnay par majboor kar sakta hai. apnay israaeelee bhaaee kay tamaam qarz muaaf kar dena.
4teray darmiyaan koee bhee ghareeb naheen hona chaahiay, kyoonki jab too us mulk men rahega jo rabb tera khuda tujhay meeraas men denay vaala hai to vah tujhay bahut barkat dega. 5lekin shart yah hai ki too pooray taur par us kee sunay aur ehatiyaat say us kay un tamaam ahkaam par amal karay jo main tujhay aaj day raha hoon. 6phir rabb tumhaara khuda tujhay apnay vaaday kay mutaabiq barkat dega. too kisee bhee qaum say udhaar naheen lega balki bahut see qaumon ko udhaar dega. koee bhee qaum tujh par hukoomat naheen karegee balki too bahut see qaumon par hukoomat karega.
7jab too us mulk men aabaad hoga jo rabb tera khuda tujhay denay vaala hai to apnay darmiyaan rahenay vaalay ghareeb bhaaee say sakht sulook na karna, na kanjoos hona. 8khulay dil say us kee madad kar. jitnee usay zaroorat hai usay udhaar kay taur par day. 9khabardaar, aisa mat soch ki qarz muaaf karnay ka saal qareeb hai, is liyay main usay kuchh naheen doonga. agar too aisee shareer baat apnay dil men sochtay huay zarooratmand bhaaee ko qarz denay say inkaar karay aur vah rabb kay saamnay teree shikaayat karay to too qusoorvaar thaherega. 10usay zaroor kuchh day balki khushee say day. phir rabb tera khuda teray har kaam men barkat dega. 11mulk men hamesha ghareeb aur zarooratmand log paaay jaaengay, is liyay main tujhay hukm deta hoon ki khulay dil say apnay ghareeb aur zarooratmand bhaaiyon kee madad kar.
ghulaamon ko aazaad karnay ka farz
12agar koee israaeelee bhaaee ya bahen apnay aap ko bech kar tera ghulaam ban jaaay to vah chhah saal teree khidmat karay. lekin laazim hai ki saatven saal usay aazaad kar diya jaaay. 13aazaad kartay vaqt usay khaalee haath faarigh na karnaa 14balki apnee bhed-bakriyon, anaaj, tel aur mai say usay fayyaazee say kuchh day, yaanee un cheezon men say jin say rabb teray khuda nay tujhay barkat dee hai. 15yaad rakh ki too bhee misr men ghulaam tha aur ki rabb teray khuda nay fidya day kar tujhay chhudaaya. isee liyay main aaj tujhay yah hukm deta hoon.
16lekin mumkin hai ki tera ghulaam tujhay chhodna na chaahay, kyoonki vah tujh say aur teray khaandaan say muhabbat rakhta hai, aur vah teray paas rah kar khushhaal hai. 17is soorat men usay darvaazay kay paas lay ja aur us kay kaan kee lau chaukhat kay saath laga kar usay sutaalee yaanee tez auzaar say chhed day. tab vah zindagee bhar tera ghulaam bana rahega. apnee laundee kay saath bhee aisa hee karna.
18agar ghulaam tujhay chhah saal kay baad chhodna chaahay to bura na maanna. aakhir agar us kee jagah koee aur vahee kaam tankhwaah kay liyay karta to teray akhraajaat dugnay hotay. usay aazaad karna to rabb tera khuda teray har kaam men barkat dega.
jaanvaron kay pahelauthay makhsoos hain
19apnee gaaiyon aur bhed-bakriyon kay nar pahelauthay rabb apnay khuda kay liyay makhsoos karna. na gaay kay pahelauthay ko kaam kay liyay istemaal karna, na bhed kay pahelauthay kay baal katarna. 20har saal aisay bachchay us jagah lay ja jo rabb apnay maqdis kay liyay chunega. vahaan unhen rabb apnay khuda kay huzoor apnay pooray khaandaan samet khaana.
21agar aisay jaanvar men koee kharaabee ho, vah andha ya langda ho ya us men koee aur nuqs ho to usay rabb apnay khuda kay liyay qurbaan na karna. 22aisay jaanvar too ghar men zabah karkay kha sakta hai. vah hiran aur ghazaal kee maanind hain jinhen too kha to sakta hai lekin qurbaanee kay taur par pesh naheen kar sakta. paak aur naapaak shakhs donon usay kha saktay hain. 23lekin khoon na khaana. usay paanee kee tarah zameen par undel kar zaaay kar dena.